香港長跑網 - 長跑長友

標題: 一個孤獨冠軍的誕生全馬最快香港選手 [打印本頁]

作者: bunbun 時間: 2015-1-30 08:08
標題: 一個孤獨冠軍的誕生全馬最快香港選手
am730 2015-01-30

一個孤獨冠軍的誕生全馬最快香港選手

一年一度的香港馬拉松曲終人散，傳媒的鎂光燈都聚焦在港產半馬季軍紀嘉文及女子長跑好手姚潔貞等人身上，卻沒有人注意到有一名24歲香港選手，以2小時34分跑畢全馬，獲得同場舉行的第15屆亞太錦標賽的第8名，也是整個全馬中跑得最快的香港選手。這名24歲小子，10歲開始練跑，過往曾代表香港出戰澳門馬拉松，儘管寂寂無名，但一直在跑道上默默耕耘，期望有朝一日，可獲得晉身亞運的入場券。文：黃子配、圖：黃文山

這位「香港第一」叫徐志堅，小學時與長跑結緣，小五時老師見他和孿生弟弟有天份，帶他們到香港體育學院接受專業訓練，兩兄弟的跑績甚至獲得推薦入讀拔萃男書院的機會，但被兩人拒絕，最後入讀老家附近的運動名校張振興伉儷書院。該校一向體育水平高，經常在比賽場上與傳統名校叮噹馬頭，徐志堅中四那年，便獲得集合全港精英的學界賽第一組別的男子乙組冠軍。

運動員要有天資，也講求後天努力，長大後原本投身飛機工程的他，因為需輪班工作，生活作息不定時，影響練習的質量，前年10月，他收到田徑總會通

知可以代表香港參加澳門馬拉松，他毅然辭工，專心練跑應戰。他甚至為轉職工時穩定的工作，入地盤做工地測量，每天晨早6時許由柴灣的家出發到天水圍上班，下班後則堅持每星期最少4日到運動場練習。

「冇諗過可以跑到依家」

徐志堅在運動場上是精英，人生首個馬拉松已在3小時內完成，他坦言「其實唔難」，「其實都冇諗過可以跑到依家，最多跑到讀完書，但始終只有馬拉松先拎到成功感，如果要我跑10公里同半馬，都未去到最高水平，最多去到頭十名，贏唔到。」徐志堅想名揚海外，一直踴躍參與外地賽，前年首次代表香港到澳門參加馬拉松，接到消息的一刻，「好興奮，係榮耀嚟」，可惜卻未能做到他理想的成績。

去年11月再戰首爾馬拉松，雖然未獲殊榮，但贏了自己，以當時個人最佳的2小時35分完成賽事。因為成績好，徐志堅反而一度萌生過退意，「覺得再上唔到，會諗係咪仲有進步空間呢？就算有，又係咪會有大突破呢？」他又稱：「成日想做到滿意時間就唔跑，但次次做到，啲人會話繼續努力，唔想辜負佢地，又想跑落去。」

「運動員呢條路唔易行」

即使有天份有毅力，在香港當運動員的路不好走，政府和田徑總會給予的資源少之又少，徐的教練仇季新建議資助他到台灣接受為期兩年的全職訓練，徐坦承心動，但遲遲未下決定，他帶點感慨地說：「呢條路唔易行，有資助就有壓力，雖然人地話冇所謂，但全力去做就要交到功課。加上依家已經練得好辛苦，驚全職訓練會應付唔到，要追時間，驚付出同結果不成正比。」性格害羞的他平日喜歡獨自練習，「唔想俾人知我練乜，如果一齊練習時跑得慢會好大打擊，有壓力。」他不時提及「唔想再跑」，「驚冇成績」，聽得出他的壓力和包袱，「我是個偏向悲觀的人，其實跑步應該正面啲」。

「做得香港代表冇得輸」

徐志堅今次得到「香港第一」，但翌日只得兩家傳媒報道，問他會否覺得被忽視，「我好低調，唔識公關嘢。跑步初衷唔係為名氣同物質，係為自己、為榮譽。」不過，近年逐漸跑出成績，他開始想得到外界認識，「一步步嚟啦，想有人識，但唔想人地覺得好勁，喺香港第一又點，同其他國家比都係不外如是。但我絕對明白，做得香港隊就﹃冇得輸﹄，否則唔應該做香港代表。

作者: little-fish 時間: 2015-1-30 08:46
閱，係香港運動員路真難行

作者: Johnny1977 時間: 2015-1-30 09:50
佢真係好犀利

作者: macuLam 時間: 2015-1-30 10:02
支持佢接受支助到臺灣全職訓練...
咁後生又有heart, 2,3年時間, 輸得起喎

作者: nicolechung 時間: 2015-1-30 10:16
"為左跑,你可以去到幾盡?!" , 睇到C HING 既報導, 好感動, 不為名氣, 默默耕耘!

作者: 深圳港農 時間: 2015-1-30 10:46
看出在香港做運動員的無奈................
支持到台灣全職訓練，為港爭光！

作者: pp3824 時間: 2015-1-30 12:00
支持佢接受支助到臺灣全職訓練 X 3

作者: cybercoffee 時間: 2015-1-30 14:14
今日睇報紙都睇到, 希望佢加油唔好放棄, 香港好多人支持佢架! 支持佢接受支助到臺灣全職訓練 X4

作者: timduncan 時間: 2015-1-30 16:34
這篇是少數有質素的文章之一
令人好感動
做工地測量好辛苦架
我知道

作者: mor23ten 時間: 2015-1-30 23:23
值得敬佩的 (香港) 跑手

作者: mander.lala 時間: 2015-1-31 00:07
敬佩

作者: timduncan 時間: 2015-1-31 06:52
版主，這類文章才有意義
那些什麽你中槍嗎？跑步會容易發達等
真是不知所謂

作者: teruteru 時間: 2015-1-31 09:33
支持佢接受支助到臺灣全職訓練 X 4

作者: timduncan 時間: 2015-1-31 10:40
難得咁有熱誠及天份
我都支持
好過特區正苦攞錢來資助垃圾電影業！

作者: kennychan 時間: 2015-1-31 12:29
支持！

作者: chuen3182 時間: 2015-1-31 13:40
支持+敬佩+正能量

歡迎光臨香港長跑網 - 長跑長友 (https://www.longrun.hk/)