買左Hong Kong Air來回溫哥華飛機票,連稅,直航,$34xx。真係超抵。再買埋由溫哥華至Alaska飛機票,坐加拿大航空$3000,來回,連稅,直航。平到唔信。時間好,無浪費。初前唸住去黃刀鎮睇極光,但check過,五月已經無得睇。所以改去Alaska玩。係溫哥華訂左四晚住宿,係起步點和終點的中間位置,$200每人每晚,價錢接受得到。
計劃係,五日前飛到溫哥華,適應下天氣,跑完的星期一就係市中心鑼架車,渣去Banff國家公園,玩。玩完,渣番架車去溫哥華機場,直飛Alaska。然後,又係Alaska機場鑼架車,渣去國家公園。睇冰川,遊冰湖,坐Alaska觀光火車。
我十幾年前參加全馬,當年係我個Age Group and above,有成幾千人。後黎跑步熱潮,我的age group and above有過萬人。現在,十幾年過去,我的Age Group and above,已所剩無幾,可能連一千人都無。咁即係當年同我一起跑的,現在絕大部份已無再參加全馬的比賽。可能因為健康,年老衰退,失去興趣,等等理由,已經絕跡跑場。我的目標,係長跑長有,我每年都無停過跑全馬的賽事,平均一年會跑四個全馬。希望將來還有好多個十年,我仍然地在跑。
跑完溫哥華馬,完成時間超唔理想。半程都keep到好時間,但下半程就爆左,甩曬,要懶番去終點。比賽當日,紫外線爆燈,氣溫約20度,比較上熱。體感溫度,好像25/6度,難頂。賽路初段已經要上坡,不斷上坡。十多公里後,轉為上上落落,直到終點。自己carbo load做得唔夠足,加上氣溫熱左一點,懶到返終點,已經算萬幸。我每到一水站,都要補水。我跑左馬拉松近這五,六年,都未試過每水站都要飲水。但奇怪,我唸住跑得咁差,但完成的總名次和年齡組別名次,竟然屬中上級。唔知係唔係賽路和天氣,玩殘曬d跑友?賽路,高低相差100米,即係約四十層樓咁高。而賽道上上落落,頗消耗體力。
跑完,就渣車去左Banff和Jasper National Parks玩。行左幾次山,入山林。係British Columbia行山,好行,路線清楚,遊人頗多,風景真係無得頂。一路行,就一路影相,航拍。Banff/Jasper,風景頗靚,雪山/冰川湖/楓樹林,倒影,春天花又開。剩係這個配搭,已經無得輸。但咁講,當我睇左十零個這些雪山/冰川湖/楓樹林,日日都係咁靚,漸漸已經覺得有點悶。係Banff/Jasper玩左九日。係Banff/Jasper,係路邊見到黑熊,頗近。
然後就回溫哥華,坐飛機去Alaska。係Alaska北上FairBanks睇極光,Denali National Park,然後南落Seward睇冰川海灣。係Alaska又行左幾次山,但頗驚險。因為Alaska,行山林/雪山,遊人不多。入山林頗陰暗,而且最危險係會隨時遇到野生動物,如熊。Alaska的行山徑,無British Columbia的咁人工化,比較上原始。地面情況,有時都幾壞,雪/泥水/溪水,乜都有。我著左重型全能行山鞋,才可以應付。差唔多係每個行山徑的入口/Camping Site/Picnic Area,都有"熊出沒"的驚告牌,相當嚇人。我行入山林,四野無人,而且週不時聽到動物聲,感覺心寒。路面上,常見大型動物的腳印,動物走過弄斷的樹枝,和新鮮的屎便。係Alaska行山,要打醒十二精神。係Alaska,係Denali National Park,見到不少野生動物,遠處見到有Grizzy Bear係度獵食。Denali National Park,亦層經發生過熊咬死遊客的意外,所以,Park Ranger一見到有"熊出沒",就好緊張,把遊客隔到老遠。
係Alaska,行山要小心。我行左幾次入山林,都係膽粗粗,保持最高的警察性。山林,無乜人行山,如果有意外或給動物攻擊受傷,就好麻煩。係Fairbank,天氣唔好,陰天下雨,check過極光網站,食白果。我到的兩天內,都唔會睇到極光,有點失望。渣左去North Pole聖經老人村,無乜野睇,影左d家相就走頭。不過,我咁大個仔,都未試過同聖誕老人影相,今次係North Pole聖誕老人村可以同聖誕老人影相,都係第一次。係British Columbia睇左十幾個靚到飛起的雪山/冰川/湖/楓樹林,黎到Denali National Park,就唔會覺得特別靚。因為,實在睇到悶。
南落去Seward,參加左一個冰川海灣遊。我人生第一次見咁大型的冰川,都算一開眼界。這種冰川,係高清台常見。海灣遊,還見到大大小小的鯨魚,海獅,等。都值得去。不過,如果有motion sickness的人,就會覺得貼錢買難受。我見,有幾個遊客,出海不久已經唔係咁老黎,像是有motion sickness。整個船遊,六小時,如果有motion sickness,真係會渡日如年。
係Alaska九日,陰天下雨,晴天祇得兩天。不過,陰雨天,有陰雨天的美,像水墨畫。係British Columbia的Banff/Jasper National Park,就藍天白雲,天氣好靚。Alaska Anchorage,係免稅城市,d野都幾平。紀念品買得落手,我係Alaska食左好多餐蟹,長腳,皇帝,Alaska Crab,真係好好味呀!我係超市買,係賓館煮黎食,食蟹可以食飽。價錢,平到你唔信,超正。係加拿大,就食三文魚,有smoked Salmon和新鮮三文魚腩,又係平靚正,食到滿口油,入口溶化。
總共玩左二十三日,d相好似poster咁。唔係我影相/航拍技術好,而是d境真係靚,傻瓜都立變攝影大師。我影左唔少野生動物相,我好似去左National Geographic的Sahari tour。香港人,好少係Alaska行山,多是參加Alaska遊輪。如果參加遊輪,我覺得就睇唔到Alaska真實的一面。朋友睇左我上載的相,才知Alaska原來可以咁玩,d境咁靚。已經有幾個朋友,問我鑼條線,住宿,租車,飛機票的問題。不過,我都係唔建議朋友黎行山,因為一旦遇到熊出沒,就會樂極生悲。我行完無事,都可能祇是時運高。而且,d track有危險性,維修唔多,總之見我無事好玩,就以為好好玩。
係British Columbia的Banff/Jasper National Parks,撞口撞面都係香港人,大陸人,普通話人,廣東話人。每個境點,都係人山人海。但到左Alaska,係境點我無見過一個香港人,大陸人。係Denali National Park的賓館,祇見過四個台灣人。可想而知,Alaska唔係一個人氣旅遊的目的地。亞洲人,唔多。係國外境點遊,我第一次,去一個地方旅遊,竟然無見到香港人/大陸人。
今次,我係第一次帶航拍機去旅遊。但到左,發現真係到處都標示"No Drones"的警告牌。有點掃興。Canada/Alaska,湖多。一有湖,就係海上飛機的機場或起降點。即係,見到湖,就唔飛得航拍機。咁,即係見到靚境,都無得影。我經過或去過的旅遊點,到處都係水上飛機場,或,小城飛機場,難找位航拍。有時,開左個DJI GO 4 APP,才知,原來個山後面已有飛機場,又唔飛得。但係咁,我都影左好多航拍相,都算滿意,不致白鑼。