不甘心嘅我,又再開始上網爬文,搵搵其他減肥方法。遇然地睇到一個網站,原來健行都可以減肥,而且比起跑步,可以減少因為身體重量而對雙腳造成嘅傷害。
「行吓都唔係好辛苦啫,咪當行街囉」本住咁嘅心態,一開始就沿慈雲山->九龍城->佛光街->亞皆老街->慈雲山,12.5km急行2個幾鐘,出咗一身汗,返到屋企沖個涼就瞓。經過呢次體驗,我就好鐘意健行,可以每日設定不同路線,行得上癮,有時同朋友食完飯,九龍區就不論幾遠都行返屋企,香港區就搭地鐵去到油塘,再由油塘行返去。
當然嗰段時間都要控制飲食,九月份買咗一個貴貴嘅電子磅 - 可以check埋體脂及有Wifi功能,可以自動將測出嚟嘅數據upload上網嗰種。第一次上磅,80.1kg,體脂率19.8%,輕咗5kg,開心得不得了,反正覺得好玩,就keep住繼續努力不停行,繼續控制飲食。但呢個80kg維持咗個幾月都無再跌,再去爬文睇吓仲有無其他減肥方法,跟住又學多一個新名稱:「平原期」,就係要我唔好放棄,繼續做運動;再加上用咗Nike+嘅Apps,朋友知道我正在做運動,喺Facebook點個Like,我就即時喺電話收到歡呼聲,鼓勵我繼續做落去。到咗10月底,體重又再開始慢慢下降,高興之餘,25/10,終於可以喺慈雲山運動場用跑「捱」到第1個10km。跑完呢日,覺得跑運動場太悶,27/10就開始嘗試跑街,行咗咁耐,儲埋好多路線,就搵咗一條有上下斜嘅路線,第一次跑,pacing平均9分14秒,只係比急行快少少。唔知邊度嚟嘅勇氣,31/10報咗人生第一隻10K香港馬拉松。報咗名,覺得有咗目標更加唔衰得,10/11開始朝早5點鐘起身跑10km,就算天寒地凍......到咗12月底,pacing已經可以去到平均7分12秒,而且體重亦開始下降至77kg左右,而且慢慢愛上跑步......