癲友跑山盡情癲...喇喟!!

pck

恭喜癲友成功完成毅行！雖然當曰我無出過一分力，祇是整曰留意面書提供你們的最新消息，從中分享大家的友誼、毅力、團結、喜悅、激動等等.....有如自己親身落場的感覺。
認識到大家係小弟的光榮。

tank1438

全靠一顆"癲"的心,去年癲友初次毅行都叫圓滿結束,今年卷土重來而且星期六晚已經正式開操麥456
各界山友有機會山上見

                               
登錄/註冊後可看大圖

                               
登錄/註冊後可看大圖

Turtle

毅行情未了.........

首先恭喜中簽既癲友 ! 小弟今年將不會出戰, 但承諾會全力support 癲友同其他朋友. 亦希望中途加入，陪癲友去完成餘下賽段.

今季已參加了2-3 課同癲友既操練, 情況尤如重覆番上年我, 坦克, 蝦隊長同Eddy所做既一樣....乜咁快又一年 ? 水浪窩依然喺一個熟悉又愛又恨既地方,  行行吓好眼瞓唔知點算, 大家依然喺埋怨獅子亭夜晚無汽水飲,倒塔咁早操完商量去邊度飲茶......感覺很是奇妙....

希望今年癲友毅行隊當日能享受過程　! 祝成功!

Rhys

tank1438 發表於 2012-11-20 22:57
我都我手寫我心啫，未有癲友前我幾十年黎都扮演一條可憐虫的角色，在此得到大家的尊重，令我信心大增 ...

果然今年由銓隊長領軍！恭喜銓隊！

Rhys

大家好，我是今年癲友隊Denny隊的隊員，見隊友們都在起草感想，我自己就想到什麼寫什麼吧

話說何時生起參加毅行的念頭？
應該是參加Salamon TTT比賽那早上吧？當時有銓兄，Bonsir和小二班長，談天說地間不知為何說到毅行，大家都說想人生該完成一次吧？不理時間，慢慢的行總會完成？抽籤時就入紙吧....
話雖這麼說，內心對於完成毅行這回事還是不太相信能成功........

六月了，抽籤日子到了，大家都興致勃勃，我也下了籤，不幸...( 想當然，我一向沒抽籤運）

結果癲友只有Denny 和銓兄抽中了，有幸Denny隊長接受我這個不成材的隊員加入，令我終於有機會完成一個我想也沒想過的人生壯舉.......

待續.....

Rhys

開始訓練，完全未行過麥徑(應該話完全未行過山吧)，最初以試路為主，間間斷斷和癲友們於各麥徑路段郊遊，夏天天氣一是滂沱大雨，一是烈陽如焰，還好和大家說說笑笑，實在還真享受。

由於工作時間關係，發覺很難集合全體隊員一同訓練，最後只能獨自或兩個隊員的上山，我每星期最多也只能操一課，整個八月更因家事完全停止了練習，全隊同練只試過一次麥1,2，更令我擔憂是就在那次我發現和隊員能力有一段距離，之前自己的郊遊式訓練完全出錯，真的令我憂心不已....

我會拖累隊友吧？訓練沒一次超過50km，我真能完成嗎？定下的目標呢？會受傷嗎？
在毅行將至的日子，其實我是擔心到不得了...

毅行前五天，我終於感冒了，一直叫自己小心，不要在這時候病，但可能一個在晚上夜跑的比賽著涼了，唯有吃點維他命ｃ，加強身體抵抗力，還好過三四天，身體果然好轉不少，只是呼吸有點不暢而已.....

待續.....

tank1438

瘋癲48小時.....蟻行十卜前傳

癲友唔知幸運定不幸,竟然中左兩支簽!上年正規軍全化身十卜,支援未玩過的今年上路

癲A...0695 DENNY隊長, RHYS, PCK,BONSIR
癲B...0664 銓隊長,小二,WILSON,GORDON

支援隊...蝦佬,成成,JUDY,EDDY,WILLY,WUSO,TANK

幸與不幸都好,既然中簽當然去馬,由於兩隊都覺時間唔係問題,只以享受之心去感受毅行精神,所以都無找太多十卜!
都係一顆癲的心,兩隊都在有驚無險之下完成,本人亦在各種因素下不能陪走全程,心有點點歉疚!

當初心中計劃係陪A隊全走後,回頭去JOIN B隊一同完成餘下路段,但當敬錚請求我帶他上廣州跑全馬,
而我又應允後,已經知道咁走法係我能力範圍以外的事.再加上之前幾個月操TNF已經常常周未不在家,
在種種壓力下,只可應承A隊陪走頭半,之後回家休息,再在第二日下午去陪B隊返終點!

Rhys

雖然萬般憂心，毅行的日子還是無情地走到面前,但反正都要面對，就開開心心上路吧！

天氣太好了，萬里無雲，實在更添我的煩惱，我其中一個大問題就是當烈陽高照，我的狀態會不成正比地大幅下降，不過也擔心不了太多，早上約了隊員和support們在彩虹吃完早餐就高高興興地乖車進北潭涌去。

每樣都是新經驗，和大家影影相，說說笑，準備該準備的東西，大概十二點十五分就上線去，由於有村民示威，臨時需要改道，有說賽道難度有降低，但我也沒想太多了，一開始大家輕輕鬆鬆的，時而慢跑，時而急行，很快就到到上西灣山的路上，當我還未有狀況時，成成已主動幫我拿水背，太陽對於我來說太猛烈了，很快我就跟不上大隊，最後在西灣亭和隊友匯合，我需要休息一下........

待續....

Turtle

偷懶十扑wuso 後記~~~

小弟乃癲友A 隊(0695)無用十扑. 本人不材, 未能遵守承諾,陪0695 去到金山.  對此心感歉意.

我本身負責喺水浪窩送外賣同陪0695行至金山郊野公園. 事先與隊長D 已確認隊員以飯團填肚, D 也一再向我鎖定馬安山站最近賣飯團同的士站既位置. 因為我要務求一擊即中, 放工,到馬安山站,買飯團,飛的到水浪窩.一秒都不能浪費, 否則就趕不上會合A 隊了!

當天下午,人雖然身在公司,但個心不斷追蹤著A 及 B 隊, 盤算A 隊幾時到CP2 ? 比預期快左 ? 我要唔要早D走 ???  最後515pm 決定收工去準備同A 隊會合!

馬安山PK 果然有多種sushi 可供選擇. 但隊員只需要簡單又易食既飯團來填肚, 偏偏當時只剩下5舊 (我需要10 舊!) , 只好再買其他roll sushi 搭夠吧! 事前隊長D 亦好細心,發現裡面有齌老味可供Rhys 作晚餐,所以又買了一 pack . 之後再掃水特同coke.

水朗窩當晚人山人海,旺過旺角, 想搵個位企都難,莫講話開餐. 等了大約45 mins, A 隊終於到, 見各人都十分輕鬆,依然有講有笑. 隊員花了大約30 mins 已掃清所有食物, 我仲記得隊長D 同 Bonsir 臨走前再趙多塊麵包同飲個湯....食力果然強勁!

由Cp3-4 其實無乜嘢特別好寫....得個"塞"字!  小弟俾夾在中間,前後都看不到隊員, 自己走自己咁....想過人又因路窄行不通,前面蟻行既人依然故我, 話知你後面大塞車, 完全無唸過去讓.......

好不容易去到獅子亭, 見到Willy 已苦候2 小時, 當時已經喺接近零時2 點, 因為星期六尚要上班,所以將陪行既責任交俾佢!  我同大克就飛的返回TW.

直至到第二日大約中午,已傳來A 隊完成既喜訊, 我放下了心頭大石.  雖則A 隊去到獅子亭時依然狀態大勇, 但完成其後既50K 仍需要天時地理人和. A 隊完成了, 我又將焦點放喺B 隊.......打算放工後去打攪佢地!

要預時間跟B 隊會合其實很不容易, 因種種原因, 當時決定大約500pm同大蝦一齊上扶輪為B 隊送上晚飯. 及後得知佢地可能會比預期遲,送飯計劃有變. 而我又因為有老朋友從海外回來,當晚會到我家作客及過夜, 所以也不能太夜上扶輪了. 最後我只可以喺9 段田夫仔營地見一見佢地! 真喺只想見佢地一面,特別喺阿全, 同佢地打打氣! 作為前毅行者既我, 在未段見到朋友,一句打氣,一啖可樂, 幾句有味笑話, 我相信是有莫大既幫助 !!!

同老友在家吃罷晚飯後, 便收到B 隊已離開扶輪既訊息. 我就立即拎幾罐可樂,菊花茶,一支打狗棒加頭燈, 帶著幾分醉意由深井經清快唐支路殺上麥9 會合B 隊. 我朋友也興之所至,跟蹤我上山去. 可惜未到一半他已經頂唔順, 表示要落山,讓他在家等候會比較安全...

我逆行麥9希望早點同B 隊會合, 大約30-40 mins 後B 隊出現了!!!!! 首先聽到既喺Judy 同大蝦孰識既笑聲, B 隊隊員也隨之而來. 各人既狀態其實比我預期好. 阿全隊長一路行, 一路食住power bar,飲住可樂, 各人都帶著超重既身軀同步伐, 逐K逐K睚吓去!! 我當時想就這樣密密食,不用想太多,有路就行吧, 終點好快就喺大家面前!!! 全隊長腳跟有少踵, 我同佢講已到Cp9, 真的不要放棄. 之後再拍拍Wilson 膊頭, 叫佢提起精神 ! 短短幾分鐘, 我又返回往清快唐既支路, 看著他們既背影慢慢消失後, 我再轉左返回深山了. 回程既路上, 我記得自言自語講左好多句: 佢地一定得!

再過幾個小時後, 收到meesage, 佢地真喺得左!
對各隊員有感:
Bonsir: 超黑馬 ! 估佢唔到, 行到超過一半依然活力充沛,全無倦容,有講有笑. 全程與大克都處於頭隊位置.
Denny 隊長: 盡責細心隊長! 全力照顧後面隊員, 做好做"鴨尾"的角色. 雖處於比賽作戰既心情,眼睛依然不忘四周吃冰淇淋, 我服左你!
PCK: 耐力王, 全程已均速前進, 我相信頭50K 對佢來說喺warm up 而言. 雖則有少感冒未癒, 但依然收收埋埋大把貨, 功力深不見底...
Rhys: 可能喺早上暴晒上西灣山, 令至佢有輕微既狀態,但入夜後已見慢慢恢復. 毫無怨言永不言倦跟大隊一山過一山, 毅行既精神可以喺佢身上看出來!
Tank: 因為山上勁塞人, 無得比佢癲, 佢話行完50K好似無行過咁...我無話可說...
Willy: 因為山上勁塞人, 此君喺獅子亭等後超過2 小時,已變成雪條. btw, 多謝碗仔翅!

最後再恭喜A 同 B 隊順利完成!

                               
登錄/註冊後可看大圖

tank1438

瘋癲48小時 之 癲A頭半十卜

晨早起床見陽光普照...心中暗想...大鑊鳥,Rhys有見光死的別號,擔心之情湧上心頭!
早上一同在彩虹飲茶,食飽先上路,Bonsir帶埋太太同bb黎,立時增加唔不少歡樂氣氛!

飽飽後打的往起步點,之後向各方山友跑友問好吹水,再找施sir的隊伍,佢果隊的其中
一個隊員原來係我以前波友希哥的兒子揚揚,當然不忘鼓勵下佢,很高興佢可以跟施sir
出戰,佢地最後亦成功完成,good job!

起步前得知有村霸欄路,雖然古語有云:好狗唔欄路......但我真心覺得佢地係好狗!
癲A,癲B一同影相上線很是高慶

                               
登錄/註冊後可看大圖

因披醒唔同,我同成成帶A隊,蝦佬帶B隊上路,起步後無耐見到幾條鯊魚回頭很是敬佩,輕鬆地上斜平路行落斜
jog,釘隊長仲不時尋找target,十二點.....十二點方向,一點...一點方向,而當target被她的男隊友拖住手仔時即
時噓聲四起.....,輕輕鬆鬆的1:18就到東霸,補水後上山,細心的成成知道rhys應該在烈日下上山會較辛苦,主動
幫佢揹水背,而我就帶速慢步上山,由於太陽伯伯都真係幾熱情,途中一隊年輕人有一個差不多中暑,睇真D原來
佢係領跑2公高進,真係估唔到,堂堂一個準體育教師都咁容易中招!到浪茄時rhys真係開始辛苦,他好不容易的跟
我們到西灣頂的亭,食令女派的檸檬,休息後再上路,此時成成就將rhys的水背交給我保管,仲話:益你喇落斜先
交俾你:')....就係咁,我就成隻烏龜咁前後水背前行,慢慢地落山到吹筒坳,原本要轉右,現在轉左,失去了美麗的
西灣,咸田灣....毅行好似硬係少咁d野咁.....改為跑幾k的馬路...真係無癮!到西灣亭補水後落西灣路,還幸天
色好,水塘顏色好令,令人心壙神宜!釘隊長同pck一馬當先,我地留後睇住rhys在上北潭郊遊徑後收到釘隊長電
話,佢地竟然在北潭路去廁所,之後等我地,但我地原來已經過左頭,結果在cp2等佢地又浪費左十幾分鐘!不過相
對上又可以俾rhys多點時間休息,430到cp2...在此見到joe同paul在十卜他們的山友!

休息補給完後,成成在此等癲B,我就繼續帶隊,上牛耳石山時我就攞出兩支山杖分別給BONSIR同RHYS使用,而因
山路長我就分左RHYS的重物,俾回水背RHYS自用!我同釘隊長先行,BONSIR隨後,PCK同RHYS慢上,在天黑前過牛
耳石山,到嶂上時天已黑齊,我同釘隊長在一燒烤爐坐下等佢地,十五分鐘左右PCK同RHYS到達,但奇怪不見BONSIR,
打電話給他,原來天太黑佢跟人龍走,已經過了我們近3個麥徑號數牌,RHYS用水量真係好高,好彩嶂上士多識擺檔
揾錢,佢先仲有水飲,跟住我同釘隊長去追BONSIR,但人龍真係長到不能,仲要過完一條又一條!所以想快都難,而上
雞公山時釘隊長唔想浪費體力,所以無跟我追BONSIR,而我亦都在上了半個雞公先追到佢,真係估佢唔到,操得最少的
BONSIR行得最穩定,可能同佢打壁球的背景有關!之後帶佢過人,分亨下上落山技巧,佢亦跟到晒我的步速,看來天份
真係好高,下年真係組快隊挑戰SUPER的話有多個選擇!落山時塞到想喊,聽到車聲開始都要廿分鐘先落到水浪
7:16先到CP3....到後終於見到衰鬼胡SO....多謝佢的可樂和壽司.....飲完可樂個人谷住條氣先順番D,等齊人都近廿分鐘,
攪下呢樣攪下果樣成48分鐘先再上路,而臨行時山寶已經追上,而且早我地少少出發添...@@

一行六人行條死人斜路,唯有都係傾下計解悶,到入山徑的M73牌開始,胡SO首先放火,我就死跟.....哈哈陪行十卜放火真過份!
到上馬鞍前再等下人,知道RHYS較落後胡SO就回頭找他,而我同BONSIR就先行,行行下又追到山寶果隊,陪行左佢地一陣!仲
醒左幾粒電解片俾佢地.之後我同BONSIR過左佢地,再在人龍中穿梭,塞到好似旺角行人專區一樣@@...到萬里長城好似聽到
有人為過人被撞到而打交,真係人都癲!期間同BONSIR都係傾計解悶,傾下揍仔經時間好快過,說來都算跟他有緣,小BONBON
同坦克妹剛好相差10年,係同一日生日.....慢行予3個幾鐘先到基維爾.....等齊人又半個鐘,之後又半個鐘先出發@@

出發時剛好遇到猛山龍隊,又一令人敬佩的隊伍,向他們加油致敬後再上路,由於唔好意思WILLY在C子亭等太耐我同胡SO一出馬路
落斜就飛奔落去,開到4分幾一K,十分鐘唔夠就到!見到WILLY好高興,我任務完成了,知道胡SO因太夜要走,我有一刻想過留低,但當的士剛停在前面,誘惑太大,因此即同胡SO飛的回家休息,準備十卜下半場....................

Rhys

休息了一下，下山時輕鬆不少，因仍然不用拿水背，有成成一路陪伴，提點我要主意什麼的，真的很感謝他，慢慢地走到北潭郊遊徑，重會大師兄坦克和Bonsir，走了一段聽到大師兄說原來Denny和PCK再早段去了洗手間，出來後計劃等我們，冷不防我們就在去洗手間那一刻越過了他們，他們就變成呆等了，也好，不要永遠我也在最後嘛，哈哈。

終於去到CP2遇到Paul哥和Joe哥，佢地問我ok嗎，我當然話ok!補水吃點東西我們又重新再路，由於成成要等B隊，我們唯有依依不捨地分別了。

三段開始就要上級，大師兄主動給了一支山杖給我用，之前自己一路都覺得山杖麻煩，又要拿著，又阻著跑步，但當走了廿多公里再上山時才發現真的很有用，節省了不少體力。
當然情況還是一樣，上了半座山，隊友們已領前不少，PCK墮後一點陪著我走前段，行著行著，天色開始暗了，我的頭燈遺留在大師兄那裡，只好跟著PCK慢慢的行，在嶂上再見到大師兄和Denny，大師兄奇怪地問我們: Bonsir 呢？,我說他不是跟著你嗎？原來Bonsir因體力太多，早已不知不覺間絕塵而去，在我們一兩公里外了。

我發現嶂上居然有人在賣飲品，大喜下我當然不放過機會入貨，整頓一下，由大師兄處接回頭燈又再上路，三段真的很多人，又可能有部份人開始累了，路段又窄，天又黑，前面的人越行越慢，我慢慢跟著跟著，竟又和大隊分開了，心想還只是三段，不要太衝，慢慢地跟著前面，心裡沒想太多，只不停同自己講，要小心，不要受傷，首要目標是完成，傷了便大件事了。

終於都不知用了多少時間，聽到車聲，就知到了水浪窩，找回大隊，見到WUSO就知可以吃東西了，心知自己浪費了不少時間，也希望盡快解決食物，補補水就盡快出發，但不知怎地還是用了很多時間才出發，臨出發時已遇到兩點出發的山寶，一如我所料...

四段開始時還好，還可以跟上大隊，一轉入上山路，幾個轉折間，我又和大隊分開了，四段真的多人得太緊要，就算有力前進，要扒頭也不容易，自己又不習慣扒頭，便呆呆的跟著前面一步一步的行(可能是自己最錯的一著）,走著走著，去到茅坪收到Denny電話，但接收非常不良，隱約間聽到說他會回頭找我，反正我還是要前行，也理不得那麼多，加快腳步繼續前行，但實在是太多人了，有些人甚至坐在路邊，去到四段後段，就一路跟著猛龍隊前行，真得佩服他們，那些山石路，連我們都要金晴火眼地以防絆倒，他們不方便還能以不慢的速度前進，不知下了多少苦功，而且領導員和隊員間士氣高昂，氣氛真的十分好，衷心祝賀他們順利完成。

去到基維爾營先知發生此行最大失誤，原想用電話聯絡大隊，居然發覺隊友們都收不到訊號，唯有四處行行看看，走了差不多10分鐘才看到大隊，但原來我和Denny又對頭不遇，變成Denny還在四段，心裡真是擔心，不幸中的大幸，等了沒多夠Denny就出現了，由於自己又浪費了不少時間，換了襪，喝了杯湯，擦一擦防磨損，就趕去和大隊出發。可憐的Willy因為我在獅子亭吃著寒風，真不好意思....

Rhys

續....


終於走到獅子亭，Willy已久候多時，早準備好飯團和碗仔翅給我們充飢，當我們狼吞虎嚥之間，胡蘇和坦克因為還要為第二天的support準備而要先行離開，還好Willy準備了山杖給我和Bonsir，讓我們繼續有山杖依靠，而且這裡開始Willy會陪伴我們到終點，又再有強援實在是好，稍作補給便再上征途。

開始上山，隊友們可能覺得我之前跟得有點辛苦，決定讓我行前領速，不知為什麼，這段開始行得非常順，沒有回不過氣的情況出現，有可能是自己走自己的步速，也有可能是日落已久，或可能道路稍寬，又或是起步前喝了一罐紅牛的關係，總之開始一步一步的走著，見人過人，信心回復不少，當我還以為還要走兩個山頭之際，原來已經到達畢架山CP5了。

在CP5遇見Gary和他的隊友，他們圍著毛毯，看來是遇到麻煩了，原來他們有隊友不舒服，食不下嚥，被迫在check point休息一下，為著希望在天亮前走得越遠越好，我們只稍作逗留便立刻起步，順著之前的步伐，我們越過不少隊伍，輕輕鬆鬆的抵達金山郊野公園。

在這段路上，原來華哥還在等我們，在這深夜時份，黑漆漆的地段居然還有朋友守候著給我們補給！我們多了一堆薯仔，飲品等補給，實在太感動了，為了趕路，我們也不停留太久便一步一步的繼續行，由於此段都是上鈄路，前面又有針草帽在等著我們，所以我們也不敢太亂來，只慢慢的邊行邊談天一番，過了CP6，走向城門燒烤場去。

城門燒烤場滿熱鬧的，但之前實在浪費太多時間，而且自己狀態也不知能維持多久，所以沒停多久便急急離開，走向最後挑戰針草帽，走上針山，由於又是地窄山急，人龍又再一次出現，要過頭也實在費勁，唯有跟著前面一個一個地走，看準安全機會才越過其他朋友，走到針山頂大家都說有點餓，我們便坐下來吃點之前Willy準備的飯團，時值深夜，繁星滿天，自己很久也沒看過那麼多星星了，生活在香港這大城市，強調不停的發展，社會似再容不下其他動物，樹林，郊野，大自然，光害越來越嚴重，相信將來我們或我們的子孫看到星星的機會越來越少了。

走下針山，草山相對易走，走了大半段，鉛礦坳前天就開始亮了，走到CP7，這裡有杯麵，有飲品，我們坐下來稍息，以杯麵作早餐，天已亮，唯太陽光還未太猛烈，趁著時機我們再起程上大帽山去，這次也是由我領速，因為害怕被陽光再度打擊，我盡自己所能急急上山，這時感覺還可以，氣不喘地走過四方山，開始走到鈄石屎路段時，漸漸開始感到吃力，一步一步的，想快也快不來，期間Bonsir懇求說恐防受傷，到下山時不要跑下山，我心有同感，覺得終於有知心人了，豈知一到白波山頂，Bonsir便和Denny,PCK直奔下山，果然跑山跑步的多是老實人，我在不知所措下唯有盡量慢跑跟著，還好有Willy陪伴，路途不至太孤單，走到CP8時實在已感到有點疲了。

在CP8補點水，休息一會再出發，走到CP9開始，不知那來靈感，有人說只要用二小時多點的時間走完剩下的廿一，二公里，便能完成之前訂下24內的目標，隊員們開始見平路就開始走，見斜路便怒衝而下，其實我自己力氣已消耗得七七八八，只好靠地心吸力帶著自己衝下，但依然和大隊差上三百多米，無意識地走著，突然在路的另一端瞥眼看見大師兄的身影，原來坦克專程走來和我們走一段，由於在CP9等了我們一段時間，於是反方向跑來找我們，又再相會，大家煞是高興，跟著走過CP9，稍稍補水便立即再出發。

為了加快速度，亦因為我體力已用得八八九九，大師兄再度幫我背起水背，我輕身上路，但其實走得還是頗為吃力，勉強跟著隊友，由於這段路之前沒走過，對於還有多少路程其實沒大心得，只道應該快到了吧，就拼盡力走吧！走到一段斜路，坦克因家事迫於要提早離開，未能和我們一起到終點了，雖然有點可惜，但實在也感謝他時間這麼緊迫下仍然走來，可見他對我們如何掛在心頭，我們再次上路，我們一心以為斜坡盡頭就是終點，豈知到了才知是另一個CP，由工作人員口中得知還有六公里的路程！真是晴天霹靂！氣力用盡，身心疲憊，不知是心理問題還是什麼，這六公里走得極慢，大家像提不起勁的，逆走十段至石屎路，又見到成成在等待我們，成成真辛苦，兩天間陪行AB隊，現在又特別走來和我們衝終點（後來得知成成當晚再度陪B隊走尾段，實在可敬），身邊不斷被其他毅行者越過，大家都無力再追了，直到看到大蝦隊長和Judy突然出現，大家又再興奮起來，果然有朋友鼓勵是有很大作用，大家腳步稍為加快了一點，在終點前大家似再不計較時間，竟停下來影影相，並相討一下一會衝線時如何找時機，不要被其他人擋到，一行人最後開開心心地奔跑剩下的二百多米，衝線了！

終於完成了，這半個月的擔心憂慮終於一掃而空，雖然未能於廿四小時內完成，但大家沒受傷，齊齊整整的完成，路途中偶有失誤，迷惘，失望，但人生就是這樣，總不能所有的事都能如意，若一切太順利，未遇任何阻礙，成功的果實又怎會香甜呢？

謝謝各support真誠的幫忙，也多謝一直關切我們進度的朋友，明年就是我support大家的機會了，大家不要放過!

Turtle

一場最惡"鯁" 既賽事The North Face 100k 山賽將於今個星期六開始. 癲友有小弟,Tank, PCK, Samson, 成成, Wilson 幾位死士參與.

願祝大家順利完成!!!

                               
登錄/註冊後可看大圖

tank1438

Turtle 發表於 2013-12-12 09:43
一場最惡"鯁" 既賽事The North Face 100k 山賽將於今個星期六開始. 癲友有小弟,Tank, PCK, Samson, 成成, W ...

仲有令人敬佩的又癲又傻的山寶....佢先係主將,今次擔當領軍角色..!!

laputa99

Turtle 發表於 2013-12-12 09:43
一場最惡"鯁" 既賽事The North Face 100k 山賽將於今個星期六開始. 癲友有小弟,Tank, PCK, Samson, 成成, W ...

大家加油, TNF 100 同佢C過

Turtle

被喻為全港難度最高嘅100km 山賽—TNF 100, 喺惡劣的天氣下完結。參加人數有483人,最後得261人完成或有很多已轉去50km 賽事，艱辛情況可想而知。小弟慶幸能以19 小時10 分完成，除了要靠自己打不死的意志、一股傻勁同一團火之外，仲有跑友們細心嘅支援同大會義工嘅幫助, 喺度我想講聲多謝。

比賽當日大家如常吹吹水影吓相就喺大美督起步。第一二段已經俾人帶快咗，坦克又一早走得老遠了。。呢個係一百公里賽事，點解我好似走緊30K樂善行咁？不斷提醒自己要控制好速度。經過CP2，見到攝記Daniel, Cecil , Jun, 食吓蕉，影吓chok 相，輕輕鬆鬆又再上路。

第三段就加快少少速度 jog 落荔枝窩之後再上鎖羅盆，因天氣比較清涼，所以也不覺太吃力。沿海濱繼續走向鹿頸途中，终於見到坦克身影，於是拍住一齊走，上演一幕兩條癲佬漫走海濱嘅 “美景”。隨後傻人Ivan 加入，又傻又癲嘅組合拍住上去到鹿頸CP3了！係CP3 補下水拎兩舊飯團又再急急向前路進發。唔知坦克同 Ivan 係cp3 攪乜鬼，我先行離開獨自向龜頭嶺進發。因為有一對行山杖嘅幫助，上山嘅路途也變得較為輕鬆同慳力。途中遇到一個走50 公里嘅老外，佢話一到CP 4 就已經知道 "I will be back home soon" 同嗅到屋企床單嘅氣味。。。。咁我呢？好似一半都未到！不斷提醒自己要打消消極嘅念頭，要 think positive !

經過幾個 ”山仔” 後到達CP4, 天色雖灰暗但感激尚未下雨，係CP停一陣執拾行裝，食件餅又繼續上路。突然身後有把熟悉嘅聲音令我回過頭來….. ”我爆晒，好想返屋企呀！”, ”我爆啦爆啦”。 Ivan 一路爆就一路係我右手邊超越了我。上到桔仔山拗後，已經再見唔到佢嘅可愛青綠色小腿護套了。 走完沉悶嘅流水響徑後，就上龍山。其實我一向認為龍山算是不太壞嘅路段，雖然條路(路？)難D上同落，草又長得高DD，但慢慢地當行山咁去應付，用作舒緩同透下氣也未嘗不可。落龍山時在草叢中發現一頂簇新嘅聖誕帽，未知係唔係Keith 送俾大家嘅聖誕禮物？

大約下3點到達了粉嶺CP5, 可能因時間比預期早, 以致幫我預備長袖Tee 嘅朋友未及到達。 見到神9 同其他跑友喺CP5 做大會支援, 當然要食番碗靚粥補下先，真係多謝哂大家嘅支援食物同鼓勵！此時已見Ivan 開始上大刀屻，再下一次見到佢已經係到終點嘅時侯！果然係神i 。 同Jun 寒暄幾句後我也不敢怠慢，放棄更換後備衫，繼續慢上大刀屻。 CP5 往後嘅路係一個心理關口, 因之前操練都係去到50Km, 50km以後嘅狀態就真係天曉得 ! 。。。。沿途見到癲友Denny 為大家喺蝴蝶山上拍照打氣 又有碗暖粥暖吓個胃, 感覺狀態尚算不錯。 隨著上升嘅高度, 山上氣溫開始下降, 視線也因濃霧遮擋開始變得模糊, 終於下雨了! 我只好小心翼翼走過山脊, 以安全為大前提, 用比較慢嘅速度隨滑石梯級下山到CP6。

林錦公路當時已下着毛毛细雨。係CP6 享用了薯蓉同麵包, 食飽飽加水後又再上路。穿上防風雨衣，頓時倍感温暖, 希望可以捱到上大帽山。沿梧桐寨上大帽又係一條上不完嘅地獄式石梯，策略依然係慢慢上，容許自己喺中段小休3分鐘後再上。大约5pm 已見到四方山亭，天色開始轉黑，又係頭燈出場嘅時候。突然一盞強燈從亭內照著我， 唔通以為我係ii ? 原來係黃浩輝同一位cameraman 想做訪問，又叮囑天氣將會變得更壞更凍，最好同其他人拍住一齊走云云….講真我甚至希望幾個跑友可以攬住一齊上大帽山頂添…….因為我裡面濕透嘅短袖Tee + 風樓根本喺頂唔住白波頂上嘅低溫同大風! 其後將頭巾變成頸巾, 包埋嘴,鼻,耳又好似好一點。 最後都係盡快上山，再快快落山到CP7 為上策! 好不容易到達山腰嘅CP7, 知道體內嘅能量已消耗得7788, 一定要盡快入油! 先來一個未熟透嘅杯裝米粉(水唔夠熱), 用不消一分鐘嘅時間殲滅 (PB 了 ! ) , 再來三塊bread with jam, 大量嘅nuts。。。我喺哩個CP停留得最耐食得最多 ! 多謝小二喺Cp7 嘅招呼! 最後再來兩塊shortbread 作飯後甜點。

往後嘅一段龍門郊遊徑喺好多人嘅惡夢, 完全喺一條消磨意志嘅"郊遊"路線。 參加者應該會明白及同意! 因為雨時大時細, 又要上落好多滑石,所以速度比預期慢。預期可jog 嘅路段變急行，急行路段變成龜速。落鉛礦凹嘅一段更加係情況差到不能再差。。。。落超跣腳亂石，四周大霧造成零視野，有無數次係落錯位去了山邊，情形十分狼狽。 越行越大雨, 當時忽發奇想：會否去到cp 8時大會即話cancel 個比賽，大家可以返屋企瞓覺，Keith 之後行出來同各位講 :聖誕快樂！。。。。我覺得我真喺行到癡左!

捱到去CP 8 已經喺晚上9:45pm, 上面嘅情況當然沒有發生, 唯有怒食杯面同飲杯熱啡暖暖個人。。。。想起喺龍門郊遊徑真的花了太多時間, 一定要趕快上坑山追回一點時間。 幹掉杯面後就立刻拎住杯啡一路行一路飲，大雨下手上杯啡喺越飲越多。。。。。。。。。食完杯面果然如有神助,一落馬窩斜路就好輕鬆好順咁jog 到去九坑上山口. 九坑山上既氣溫亦無想像中咁凍,雨也停了,真喺感謝上天..輕鬆落到沙羅洞過CP9, 甚至得意忘形到連CP9 既支援站都skip 埋 ! 時間喺11:47pm, 我同屋企既距離變得越來越近, 學之前老外話齋 "I will be back home soon !!!"

當然Keith 無咁容易比大家輕鬆完成同回家, 最後既一個section 上八仙喺要渣乾渣淨各位體內剩餘既能量, 要乳酸浸滿各下既四頭肌才很罷休! 既言喺最後一段打大佬,點爬點死都好都要死番終點...當時亦覺得有機喺19 小時內完成, 去吧! 由鶴竇上屏風山既辛苦程度同由昂平上鳳凰好相似,D 石級喺超大, 慢慢上停下來食笠糖之際,聽到有人從後跟上....原來喺傻人力士!!! 哩位168 狂人後勁十分淩厲,我當然也乖乖的讓他過,唔想俾佢上山推死...一路上一路力士既身影就越行越遠.......去到石橋附近又再次與寒風搏鬥, 感覺氣溫比白波頂更低,終於要拎出最後法寶 - 手袖出來. 所有禦寒工具已經晒冷了(風樓,濕透短tee, 頸巾/頭巾,手袖), 再凍就真喺要call 直昇機! 山上既寒氣與濃霧令到我寸步難行, 頭燈下既視線大約只有2-3 呎, 其後既兩小時, 甚麼屏風山,黃嶺,八仙也分不清楚,不知上上落落多少個山仔..八仙 ? 我覺得好似有廿幾仙咁...短短7-8k 路,好似行了半日一樣!!! 算吧, 有路就去,總會到終點...就喺因為哩個理念, 我喺黃嶺/八仙亦行錯了兩次路! ......行下, 停下,搵路, 再行, 都不知花了多少青春喺八仙嶺上! 最後看到指去大美督個牌真喺開心到彈起, 但同時胃部開始感到不適有嘔吐感覺.....越落得快越想嘔, 望望手錶, 放棄19小時內完成既念頭, 對自己好D, 慢慢走番去就成. 落到馬路又有義工指示我轉左去食"甜品". 一輪泥漿摔角後, 見到終點既燈火了. 時間喺十二月十五日零晨310am. 我終於完成一個solo 既超馬賽事.

終點沒有預期般熱鬧,場面十分冷清....完成後我亦沒有太大興奮, 開心既情緒甚至比不上完成一個10K 賽...可能真的太累. 冲好涼,gel 好頭化好粧既Ivan 已喺終點等候大家. 多謝Samson 既家人為我賽後打點一切. 帶著疲倦又臭既身軀,一大袋衫,一個作嘔既胃飛的回家......."I will be back home soon".........

Jacky

胡蘇好勁~~！！！

laputa99

Wu So sub 20