繩的另一端 領跑員

bunbun

http://www.nmplus.hk/w3/news.php?action=detail&id=711

i am a runner 繩的另一端 領跑員

1條普通嘅繩，令兩個完全未見過面嘅運動員建立互助，努力訓練爭取好成績。但繩嘅兩端，只有1端能得到成績肯定，另一端只係默默地跑。
一端係最需要呢條繩嘅視障跑手，而另一端就係負責帶領、照顧佢哋嘅領跑員，相同付出，但毫無收穫，值得嗎？
「可以延續自己跑步生命嘅同時，可以燃亮別人，幫佢哋達成心願，我已經覺得好足夠。其實視障跑手好簡單，只係需要有個人，帶佢哋由港鐵站去運動場跑步。」楊肇麟講出做領跑員最大嘅原因。

視障跑手
梁小偉（Gary Leung)
年齡：49
跑齡：2年
09年因視網膜色素病，由7、8成視力變成只睇到光，幸好接觸跑步後，令生活重上軌道，2013年更以3小時13分取得渣打香港馬拉松視障組全馬最佳成績。

領跑員
楊肇麟（Yeung Shiu Lun）
年齡：25
跑齡：12年
12年前開始接觸跑步，2011年奪得渣打馬拉松10公里亞軍，而家以做領跑員為主，亦係adidas urban run教練之一。

主動幫助別人
訪問約喺跑馬地進行，到達地點後，見到Gary手握阿楊（楊肇麟）手臂由遠處到場，當見到我哋後，阿楊喺Gary耳邊講邊個方向有人，令Gary可以正面同我哋打招呼。影相前，阿楊更幫Gary整理衣服，比阿媽更細心，阿楊話：「自從接觸Gary後，我多咗主動去幫助盲人，其實佢哋需要嘅幫助只係好小，可能係帶佢哋上落樓梯、搭港鐵或者係扶一扶佢哋過馬路，已經好足夠。」
近年多得跑步熱潮，先令領跑員被大家認知，而阿楊早喺2年前，已經定下做領跑員嘅目標，阿楊話：「我唔係突然想做領跑員，大約2011年有次喺公園練習，見到有領跑員帶住視障跑手訓練，嗰陣就諗，如果有日我唔再比賽，一定要做領跑員，希望利用自己嘅能力幫助別人追夢。」阿楊話知道外國一直都有領跑員，只係唔知香港原來都有，而且重發展得好有系統。

得到比付出多
別人眼中，領跑員係無名英雄，只有付出而不問收穫，其實喺付出嘅同時，可能得到重多，阿楊話：「同Gary一齊跑，令我見到真正嘅意志力，因為有時真係練得好辛苦，連我都想嗌停，但佢唔會，因為Gary好珍惜每次有領跑員帶住佢跑嘅時間，無論比賽同練習都會拼到盡。
「舊年同佢跑渣馬全馬，跑到30幾K，佢話抽筋，但死都唔肯停，話會頂住唔俾隻腳抽筋，如果得我自己跑一定會減速，但佢連速都唔減，頂住跑返終點，呢次經歷真係令我好佩服。」
生命影響生命，雖然領跑員同視障跑手，只靠手中1條繩聯繫，但領跑住佢哋嘅同時，可能亦係領跑住自己，阿楊話：「Gary嘅存在係我繼續跑步嘅原因，年少嗰陣叫做跑到攞過下獎，隨住年紀大，需要出嚟社會工作，成績已經冇咩突破，但做領跑員可以延續自己跑步生命嘅同時，重可以燃亮別人嘅生命，幫佢哋（視障跑手）達成心願，點解唔做呢？其實，喺當中我嘅得着重多。」

睇唔到更清楚
當初Gary失去視力後，曾經頹廢咗大半年，自接觸跑步後，人生開始改變，對於手中繩嘅另一端，從未「見過面」嘅領跑員阿楊，Gary話：「我覺得同阿楊有種緣分，佢帶住我跑自然就會好放心，因為視障人士唔好話被人帶住跑，連被人帶住行路都會驚跌親，所以識到佢係好有緣分，其實好命嘅話，我生得佢出啦！所以我成日笑佢拖住老竇跑。」
可能喺我哋眼中，視障人士好慘，但Gary有另一種睇法。「老實講句，如果你而家問我睇到嘢好，定睇唔到嘢好？我真係唔識答你，雖然我冇咗視力，但我發現身邊有好多人幫助，睇到自己嘅努力、鬥志原來可以咁大，參加比賽亦得到好多鼓勵同好多獎，得到嘅比睇到嘢嘅時候重多。」
最後Gary話，希望可以同阿楊去美國參加波士頓馬拉松，坐喺身旁嘅阿楊拍一拍Gary話：「得喇！」原來佢哋手中嘅繩，除咗比賽，更令佢哋建立友誼，得到更多。（譚大偉）

睇更多跑手請去︰http://adidas.digitalcampaignasia.com/running/

maylam_running

Thanks for sharing^^...若要申請做領跑員需要什么條件怎樣申請?