發哥親述10個月行走30磅 慷慨分享「發哥自訂餐單」

bunbun

http://the-sun.on.cc/cnt/entertainment/20140124/00470_001.html

太陽報 2014-01-24

發哥親述10個月行走30磅  

神級影帝周潤發喜歡挑戰自己，因參演新片《賭城風雲》的同片演員個個弗到漏，58歲的他得到郭富城啟發，決意揮走肥膏！《東網》專程飛抵北京邀發哥接受專訪，暢談10個月內減30磅的血淚史，除堅持每日行山粒半鐘外，更只食半碗飯！

151磅Fit爆

151磅的發哥受訪時暢談減肥心得。

發哥雖然體能不及30年前，但精神及身體卻更健康。

發哥得到城城啟發才決心減磅。

周潤發

睇面形便知石一堅狀態更勝當年的高進。



發哥多年來已不時行山拍照，所以每日行個半小時毫無難度。

周潤發（左）

城城激起決心

發哥昂藏七尺，向來瀟灑，可是這位神級影帝貪靚到暈，為了在新片《賭城風雲》飾演的賭神石一堅更型英帥，他決心進行地獄式減磅，挑戰25年前的高進！

「《賭城風雲》入面成班友（謝霆鋒、杜汶澤及內地演員高虎）都瘦到不得了，整個大肥佬喺度唔係幾夾喎！唔係喇！屋企Hea係唔會刺激到你，但有呢啲演員喺度，係無形壓力，令你的起心肝。其實我喺舊年3月開始減磅，事緣之前拍戲得到城城（郭富城）啟發，某程度要多謝佢，佢真係唔理幾時拍完，都會去跑步機跑番一個鐘！嘩！我話你真係犀利到不得了，佢就話本身由有肝炎到好番，都靠做運動。我覺得可以借鏡，的起我決心，我見佢靚仔到不得了、又Fit，你諗吓佢有Concert就不停跳跳跳，身體Fit到不得了，又賽車，你睇佢幾型，我咪羨慕佢囉！跟佢學嘢、做運動囉！所以有一句話健康嚟自運動係啱嘅，加上城城鍾意打邊爐食好多嘢，但佢一啲都唔肥喎！佢話做運動囉！」

拆散副偈

歲月催人，但對發哥來說，從來不是大問題，儘管快將60歲，發哥依然靚仔，到底有甚麼神妙秘方令發哥回春？

「其實我都唔係用乜推拿方法減磅，只因要醫治舊患先推拿。哈！唔係回春嘅，只係近排拆散過再鑲番佢，成副偈拆開晒佢，再一Part Part執番咁。感覺上精神咗，自己覺得舒服，就觀眾睇都舒服！」

克服心魔

要弗，一切從控制食量開始，民以食為天，發哥一向為食，怎樣頂得住心魔？他又為何限制自己每日只食半碗飯？這種日子慘過做苦行僧，發哥娓娓道來。

「餐單係重要嘅一環，呢十個月來飲食清淡，每日只食一餐正餐，只食半碗飯，可以係朝早食，晏晝同夜晚唔食，唔食嘅意思係澱粉質，我比較食得清淡。某個程度上我哋係唔需要咁多卡路里，只不過係香港人為食，隔一陣又想食，係唔需要，有人話唔食就暈，暈有時係心魔啫，為咗健康盡力忍口，戒油、戒辣、少糖，可以一個月或者一個禮拜放肆一次半次，但到咁上下，你個胃細咗，就唔使食咁多。仲有呀，千祈唔好食補品，最好鹹魚青菜，因為本身身體有一個維修工程隊，佢會同你搞掂晒，愈多呢啲嘢（補品）就愈麻煩，用晒靚嘅燃料，佢班友咪唔使做？你睇戰前戰後啲人，咁瘦，奀挑鬼命，但成個香港都係佢哋打造出嚟！你話當時有咩好嘢食吖？反而依家點解有三高呢？就係啲人營養豐富，唔做運動，舊時勞動社會啲人冇啖好食，但係健康囉！依家社會富裕咗，但係病痛多！」

日行個半鐘

節食加上做運動，十個月揮走30磅，相比1989年《賭神》的高進，發哥如今擁有151磅弗佬金身，加埋狂做運動這一加一，是必須的！原來發哥平日至少行個半小時，由寓所行至尖沙咀再折返動輒十公里。

「呢10個月我都養成每日步行嘅習慣，平日至少行個半小時，但我行慣山，呢個係較舒服的減磅方法。平時我會行鳳凰山、蚺蛇尖、八仙嶺就會用多啲體力！喺市區行唔覺得辛苦嘅，人哋講話我每日行六個鐘，都唔係嘅，只係周日約到朋友先會花咁多時間。我平時亦冇做Gym，最多都係拉吓筋，因為舊時拍戲傷患多，『筋長一寸，命長十年』呀！依家搣甩30磅重量，精神比以往好，心臟唔使孭住咁多磅，個心都健康啲啦！但相比30年前呢……體能上始終年紀大，又唔敢做太劇烈運動，但休休閒閒，身體係比30年前好咗，舒服咗輕鬆咗。我18歲開始入TVB，到80、90年代拍好多戲，90年代中期去美國休息咗兩年，之後又不斷拍！依家諗番轉頭，當時冇好好認識同照顧自己身體。」

食得清淡

58歲發哥十個月內激減30磅，他慷慨分享「發哥自訂餐單」，食量出奇地少，真係能人所不能。

早餐：水果一個、雞蛋一隻

午餐：番薯一個

晚餐：半碗飯、一碟菜、魚肉。

後記：出場架勢待人親切

身高6呎的發哥當日準時到場受訪，不怒而威的氣勢，令小記耳邊猶如響起「賭神」出場的配樂，發哥翹腳坐低徐徐說道：「隨便問，知無不言！」配上親切笑臉，令戰戰兢兢的小記大為安心。而拍照期間，近月積極減肥的發哥要求看相片，相當關心效果：「夠唔夠瘦？（你目標想再減幾多呀？）瘦啲好睇啲！但去到咁上下，除非你做劇烈運動先會再瘦，始終有骨架喺度。」

nicolechung

發哥好野!
我認識一位70歲老人家, 都係堅持行每日1萬步,  飲食方面無變, 一年後瘦左30磅, 成個人精神晒! 講到尾都係恆心同決心!

qaz.201309

佢份餐單……俾着我真係好難跟……  

佢做到，好犀利！  

stenic

Fat gor, my only idol!!

vcbid

其實咁既餐單, 對一個成年人黎計, 份量真係太少, 我覺得好唔健康

bunbun

http://hk.apple.nextmedia.com/news/art/20140205/18615239
蘋果日報        2014-02-05

日行90分鐘　發哥勁減30磅         

【本報訊】影帝周潤發（發哥）為了以Fit爆身形演出賀歲片《賭城風雲》，每日最少步行一個半小時，再配合清淡餐單，10個月內激減30磅。運動專家表示，行路是很好的減肥方法，估計發哥每天能消耗500至700卡路里（千卡），且行路不傷膝關節，容易持之以恒。若工作繁忙建議可早午晚分段行，配合均衡飲食，也能有發哥的減肥功效。

記者：陳沛冰

中文大學體育運動科學系教授許世全表示，以發哥原本的體重及正常步速，用運動學方程式計算，每日可消耗500卡路里，一周便可減3,500卡路里。若步速較快，每日更可減730卡路里，一周足足消耗5,100卡路里。若以每消耗3,500卡路里可減1磅脂肪計算，10個月最少可減40磅。惟運動會增加肌肉，變相增磅，故發哥10個月減約30磅實屬合理。

他指，發哥身高約六呎，原本體重180磅，如以跑步等高強度運動減肥，很容易令膝關節勞損。因為跑步時腳掌離地，容易傷及腳踭及腰骨，相信發哥較難持續進行。但行路對身體沒有衝擊，「相信發哥有專人教過，咁樣適合佢嘅生活模式，佢又可以做到」。

可分階段步行

行路是都市人理想的減肥方法，因能量消耗可以累積，許世全表示，若未能像發哥每天連續行90分鐘，可分開三段時間，「朝早返工早兩個站落車，行半個鐘；收工又行半個鐘，夜晚食完飯又行半個鐘」，再配以均衡飲食，一個月可減4磅。

他表示，每次運動需持續5分鐘或以上才有用，「運動頭兩三分鐘只係消耗糖份，之後先開始燃燒脂肪。但無理由行5分鐘就停，每次起碼行10分鐘，最好半個鐘」。

行路前也應做足熱身運動，特別是腳掌、小腿、大腿、膝關節及腰部。他指因步行會增加膝關節壓力，故必須將膝關節及周圍的肌肉拉開，令膝關節分泌多些潤滑液，以起保護作用。惟不少人會做錯熱身，例如雙腳微曲屈膝，轉動膝頭，此動作將重量壓在膝關節，轉動時更造成磨損，不宜進行。

行路減肥Q&A

1.問：行路減肥與跑步有甚麼分別？

答：以相同時間計算，跑步較行路消耗多25%至30%卡路里，適合鍛煉體能，但較易對身體造成勞損。減肥毋須做高強度運動，若有時間可持續步行減肥。

2.問：是否行得快才有效減肥？

答：毋須行得太快，以中等步速，即一邊行路能一邊交談，輕微出汗便可，毋須急步行至氣喘。

3.問：行斜路會否加強減肥效果？

答：行斜路可增加運動強度，但上斜時小腿會拉扯，容易疲累，未必可持續。減肥行平路便可，如想增加強度，只須加快步伐。

資料來源：中大體育運動科學系教授許世全


蘋果日報        2014-02-05

發哥餐單唔夠飽　可添下午茶         

【專家建議】

周潤發減肥成功，除了每日步行，飲食配合亦為關鍵。他曾透露，每日只吃半碗飯，食材大多為魚及菜，盡量保持清淡。有營養師評估發哥減肥餐單，計算早、午、晚三餐熱量只有約1000卡，僅為他每日所需熱量的40%，跟隨進食容易肚餓，建議每餐份量稍增，並加吃下午茶，飽肚之餘仍能有效減肥。

資深營養師黃榮俊評估發哥在訪問中透露的減肥餐單，認為其早餐選擇食水果、雞蛋各一；午餐食番薯；晚餐食魚、菜及飯，三餐營養均衡，食材選擇亦很聰明，例如中午的番薯為飽肚的高纖食物，可減低便秘機會；晚餐的魚肉則容易消化，亦有豐富營養。整體脂肪攝取控制良好，估計整日攝取少於2茶匙油。

熱量僅1000卡

不過，他認為整個餐單熱量只有約1,000卡，對於身高6呎，原本體重180磅的發哥來說，份量略為偏低。他指，每日攝取熱量少500卡，已有減肥效果；以發哥身高體重來說，一天所需熱量約為2,300至2,500卡，現時餐單只有1,000卡，份量亦較正常少，很快會感到肚餓，很難長時間維持下去。

黃榮俊就餐單進行微調，例如早上起床後血糖較低，故早餐食水果及雞蛋之餘，可添加方包一片，增加攝取澱粉質；午餐及晚餐中間，可加入小食「頂肚」，低脂乳酪或酸奶均為合適選擇，更可讓腸道帶出毒素。改良版餐單熱量約為1,500至1,600卡，較為飽肚之餘，亦不失減肥效果。

發哥餐單改良版

早餐

水果：一個

雞蛋：一隻

方包（或多士）＊：一片

午餐

番薯：一個

無糖豆漿＊：一杯

小食

低脂乳酪或酸奶＊：一杯

晚餐

飯：半碗

蔬菜：一碟

魚肉：二兩（約80克）

水果＊：一個

＊黃榮俊新增食物

資料來源：資深營養師黃榮俊

Glad222

改良後的餐單都不夠飽，hehe