夢璃 “夢想成真” 好事成雙 第二次全馬sub250

LL3578

寫於2014年2月17日 (渣打香港馬拉松賽後既一日)

尋日係一年一度渣打香港國際馬拉松舉行既日子，亦係本地長跑界中一場最重要既賽事，賽前付出過既 (衝圈、長課、carbon loading etc.)，黎到呢一日大家都好渴望修成正果。

當日朝早6點10分，我早係起跑區既前面等候起跑，但開跑前發生左 “小插曲” ，因為個吹氣拱門冇氣倒下，結果要延遲5分鐘開跑。

跟住呢42.195km既途程，我會分成9 part去講



Part 1: 頭5km  18’51”

一開跑冇耐我就已經跟住某2名本地既跑手，但去到3km左右就要開始要靠自己控制個pacing。



Part 2: 5-10km  18’40”  (10km 37’32”)

過左5km牌果陣，其實就開始上昂船洲大橋，當時係我前前後後既，主要都係D海外特邀跑手，我仲見到有兩、三個女海外精英跑手，因為跟唔上個 “大隊” ，結果個處境同我一樣、要跑自己pacing，我仲唔覺意係昂船洲大橋上過左某名中國女跑手。



Part3: 10-15km  18’54”  (15km 56’27”)

去到呢段，就係跑過南灣隧道同埋上青馬大橋，準備上青馬大橋果陣，開始聽到一D熟悉既聲音為我打氣，可能我聽到呢D打氣聲，令到我係頭果15km既路程比我預計中仲要快成2分鐘到第一個折返點。



Part4: 15-20km  19’16”  (20km 1:15’43”)

第一次折返後，我開始見到有其他跑手陸續跑入青馬大橋，佢地見到我係早段跑到好前都 “O 嘴” ，佢地“O 嘴” 唔係冇原因既，係因為我第一次折返果陣，我原來已經係第5個香港跑手跑經過折返點，係我前面既香港跑手就有鄧敏華、溫耀昌、劉廣文同埋黎可基，但好景不再，我後果半程我已經有心理準備會 “拉車” ，只係差到跌幾多。去到汀九橋之前、上年全馬跑2:41既年青全馬好手Billy Lau 開始發力，係我側邊擦身而過。



Part5: 21-25km 19’22”  (25km 1:35’05”)

呢段就對於我黎講就相對比較平淡，因為係位置上冇咩大改變。至於頭半程時間大約係1小時20分左右。



Part 6: 25-30km 20’39” (30km 1:55’44”)

過左長青隧道之後，開始落斜，過左貨櫃碼頭之後，澳門特邀跑手開始發力，但佢過我之後都望一望後面先，唔通佢想搵人擋一擋風？



Part 7: 30-35km 20’47” (35km 2:16’31”)

過埋南昌站落西隧，當時開始拉車既小弟，開始俾幾名本地跑手過。



Part 8: 35-40km 22’57” ( 40km 2:16’31”)

過左西隧去到香港島果邊之後，D風好大，直頭係打埋我塊面，我已經再冇力加速，只係死捱憑意志，唔理三七廿一，只要2小時50分返到終點就得，係呢段途程，如果我見到相機而自己擺得設pose，我就當然擺下pose，埋水站就唔係拎水，而係飲果D sports drinks.



Part 9: 40km – Finish 9’15

去到最後關頭，我就跟住前面個跑手捱返去，入到維園果陣，見到大鐘已經2小時48分，我肯定超額完成，所以我只係以比較輕鬆既步伐跑返終點，過左終點，又好似之前皇者之戰半馬咁成個人跌落地，但今次我真係腳軟，唔識自己起身，要在場工作人員幫幫手先得





總括而言，呢次俾我想像中跌得少，同埋我今年係最後一次以學生身份出戰渣馬，出年恐怕未必會有機會再跑，所以名符其實係博到盡，我要多謝各位係現場/精神上支持小弟既IEd人、跑友、攝影師、工作人員..... 好多數至不盡既人。



小弟過左渣馬之後，會稍為休息幾日，到禮拜三就會恢複操練，準備下個月9號舉行既大專陸運會


大會成績

Official 2:48’45”

Net 2:48’42”

Overall: 58/5609

Gender: 45/4886

Category: 24/1011

bunbun

弓起! 弓起!

coolmanlai

well done good job!

CEC

恭喜！！

allanakb48

well done too

alanleung4444

勁, well done

JoJoYip

真係要一讚再讚
太強了！仲有大把世界！

映兒

恭喜夢璃師兄夢想成真

yannn3860

勁，我都希望兩年內都可以挑戰全馬

ansonkit

恭喜!!!!
小弟都開始諗緊下年是否全馬

chtang

恭喜!