中銀陳禹昌 跑全馬無甩拖 一年一度似探老友

bunbun

http://orientaldaily.on.cc/cnt/finance/20140220/00271_001.html
東方日報         2014-02-20

絲絲講場：中銀陳禹昌 跑全馬無甩拖        

渣打馬拉松熱熱鬧鬧咁完結咗，絲絲好多金融圈老友都如期落場冇縮沙，好似中銀保誠信託行政總裁陳禹昌就係其中一位，雖然陳禹昌年屆六十，時間的確係比舊年慢咗少少，但都再一次跑完全馬o架！

唔好睇陳禹昌年過六十，佢仍然夠體力跑晒全馬o架！

一年一度似探老友

陳禹昌話今次天氣得13至14度，唔算太凍，不過狀態唔好影響成績。佢仲大爆自己早就過咗六十歲，好難再跑出好成績。其實絲絲覺得陳禹昌好犀利，因為要堅持跑畢全程真係唔易，據聞嗰日「甩底率」幾高，即使成績差咗，佢嘅體育精神絕對可嘉！

陳禹昌即使今次時間慢咗，不過佢似乎都相當享受。佢話如果唔係跑馬拉松，人生應該無咩機會可以行吓青馬大橋喎！佢仲話明年都會再跑，每年一次，好似探個老朋友咁，幾個鐘就搞掂！咁就啱啦，一於明年同絲絲一齊跑出佳績啦！

王利民着住棵菜跑

有啲人就話年年個賽道都差唔多，無咩新意，不過，陳禹昌就話其實都好唔錯，年年都有少許改善，加上香港地方咁細，想搵條路闊啲，容納多啲參賽嘅人都唔係容易o架，大家將就下啦！

除咗陳禹昌外，絲絲仲見到康宏（01019）主席王利民，佢嘅造型相當「專一」，繼續幫Green Monday推廣素食主義，件運動衫上面有棵立體菜，佢仲呼籲大家咪食翅添。

余絲韻