佐賀櫻花馬拉松2014

ah_teng

前言
2014年4月6日，終於跑咗期待已久的佐賀櫻花馬拉松。報名嘅時候，只是覺得在櫻花下作賽應該幾浪漫，然而報咗之後更期待嘅係……川內優輝！大會竟然請到日本市民跑手之星做呢個馬拉松嘅招待選手之一耶！ 4月4日，星期五，我由香港飛到日本福岡，為翌日進入佐賀作準備。由於事先查過交通資料，坐 JR 貴過長途巴士一截，而且拉住行李上落月台或者都麻煩，於是決定住在離福岡機場遠少少，但離巴士總站最近的天神。天神入佐賀來回票係1850 yen 回程票可以在十日內使用，算唔錯。
由天神出發到佐賀, 賽前的一天
4月5日，星期六，賽前一日，下午坐巴士入佐賀。呢日係旅程中天氣最壞嘅一日，由天神出發時係小雨，一路入佐賀就越來越大，如果呢個情況下作賽，我深信未起步已經輸了。 不過長途巴士上沿途有許多貌似跑手嘅日本人上車, 大家拿著大大的運動袋, 都半身濕了，頓時令我覺得，自己並不孤獨，比賽淋雨就大家一起啦！

巴士下午1時58分出發，到佐賀火車站差不多3點半，比原定遲咗少少。甫下車，我就到車站前的 hotel route inn 辦入住手續 (題外話, 間房煙味好勁呀, 直頭好似去左 K 房)。呢間酒店由西鐵旅行社代訂，（報名參加馬拉松亦經佢地），一晚連早餐 6500 yen ，房租連賽事費用等一併在 check in 時收取（亦即係話，由報名至入住，基本上對方分文不取，講個信字）。其實整間酒店當晚都俾跑手佔據，而西鐵旅遊亦都特別喺酒店大堂設一個櫃檯，招待遠道而來（香港，台灣同大陸好似都有人跑，所以除了一個日本女仔，仲有個大陸男人幫手）。喺櫃檯交完錢，拎咗房咭同選手包，即刻上房休息啦。選手包除咗有號碼布，仲有跑手衫（講時講，呢個賽事算多人著住大會跑衫跑），但就無行李袋，原因所有（唔貴重嘅）行李係放在起跑點附近的更衣場地，女仔放喺佐賀文化會館（大家幻想下，好似香港文化中心的劇院咁，封咗入面俾啲女仔換衫仲有擺袋，你自己記住放 , 無人 serve），至於貴重嘢如銀包電話，可以用大會在文化會館入口 counter 附近所派的大信封 （A4左右）放好，再用跟選手包派的 label （上面寫自己號碼，姓名，出生日期）封好，交俾 counter 工作人員，完賽時 claim 番便 ok. ) 選手包仲有一本場刊，其實同別的大賽差唔多，有曬全部選手名單。今次可以同川內優輝出現喺同一本場刊，真係好榮幸呀！
賽前一日要行街，比起東京或京阪神得大城市，佐賀可以俾海外跑手浪擲光陰嘅地方唔多，車站附近，有啲食店但無嘢行，於是我稍作休息便去車站附近食拉麵填肚，之後就實地由酒店行一行去馬拉松起點，好在雨勢唔算極大，否則有遮都死。原來車站單程徒步行都要20分鐘有多，好似香港行兩個地鐵站咁。不過好在一條直路，唔難搵。視察完場地，我又行番車站，喺超市買啲生果，先回酒店落貨，正發愁晚餐如何打發，突然記起之前搵過佐賀啲資料，有個商場叫 youme town ，於是上網查咗巴士資料，哦，原來車站有巴士去，150 yen 一程應該好近（15分鐘唔駛）。一到我就俾 xebio sports （大型體育用品店）吸咗埋去，由 6 點鬆行到8點！直頭違反曬賽前應該好好休息嘅原則（題外話，佐賀櫻花馬拉松不設實前 expo，想掃貨嘅人要調節自己期望了）。最後買咗兩對arm warmer 同一件衫（無得退稅，否則再買。後來返咗福岡阪急再掃，發現原來 xebio 所賣的 arm warmer 喺阪急都有，仲有折同可退稅，真失敗呀），買到8點，終於忍唔住要食嘢，可幸 food court 有我至愛的丸龜製麵，要食番碗吉利嘅咖哩烏冬！食飽飽就返酒店執嘢，預備聽日大賽啦！
大賽當日
4月6日, 天公造美, 好好天呀! 酒店當日6點就開始供應早餐, 不過6點落到樓下, 已經有一大條龍排到出LOBBY了, 真係後悔無早D落樓. 不過等左唔係好耐都入到場, 有我喜歡的日式早餐如玉子燒, 燒魚之類, 不過飯飯就好快俾人清曬, 連阿姐REPLENISH 都來唔切. 好在我都食到, 否則就唯有去LAWSON 買飯團了.
食飽飽, 穿起戰衣就出門了. 由酒店穿過JR佐賀站, 發覺好多人都係當日朝早坐JR 到佐賀來跑的. 所以車站入面好多人, 跟住人流行過去起點, 冷風有點刺骨, 可幸有暖暖的太陽. 到達會場即刻整理衣衫 (雖然在酒店已經換好, 不過都要FINAL CHECK), 寄放貴重物, 就立刻埋去所屬的BLOCK排隊啦. 好在等候的位置有太陽照住, 否則等足一粒先至起步真係好惡頂.
8:45 分, 離開起跑時間仲有15分鐘, 就有OPENING CEREMONY, 有好多大會的重要人士發表講話, 內容大致都係叫人努力呀之類. 我本來以為會叫川內優輝講兩句, 點知只係介紹佢個名, 無叫佢講野, WOOWO~~ 不過唔打緊, 因為在賽道上我兩次在對頭線目睹川內的英姿, 都好開心!
9 點正, 大會鳴槍起步, 選手魚貫而出, 我身在BLOCK E 差不多7分鐘先至過到起跑線. 當日天氣好, 而且賽道十分平坩, 全程只有幾段仔暗斜, 所以都算舒服. 自己跑過東京同神戶, 佐賀相對是一個十分鄉下的地方, 大約在十幾公里後, 賽事就轉了入田野了 (即係田同田之間的路), 風景一流, 配上藍天白雲, 正到爆! 不過最令人難受就係風好大, 真係食風食到想死, 令人消耗不少體力 (跑手們都DISPERSE 曬, 連想搵其他人擋風都難), 呢下係最辛苦的. 而比起東京同神戶, 佐賀的中途補給比較多本地名產, 我食左麵線, 士多啤梨, 羊羹 (好甜呀), 仲有好似光酥餅咁既東東 (我唔知佢正名係咩), 無食既仲有好似麵豉湯咁既湯汁 (不過佢入面有好多料, 因為我已食唔落, 所以無入去望了), 覺得都幾有心思 (多野食的程度, 可能同大阪馬拉松比都仲有一段距離卦). 至於其他安排, 例如水站呀, 清垃圾, 打氣等等, 都係一向日本人的良好安排啦. 至於完賽後都即時在終點可以PRINT 到證書俾選手, 不過就無獎牌, 但都有大毛巾. 最正就係呢, 完賽區仲有不少免費野食提供俾選手, 包括車厘茄, 士多啤梨, 日式燒年糕, 薑湯之類... 呢下比起東京神戶更令我感動.
總結
如果東京係大賽, 神戶係中賽, 佐賀相對係小賽啦. 雖然無EXPO, 佐賀又無咩行, 加上今年櫻花也跟去年一樣 --大部份落曬... ... 不過我覺得呢個馬拉松都幾好, 因為田原風光都好吸引, 無櫻花都好正.

er2000

多謝分享，ching 一個人去佐賀？

ah_teng

係呀，一個人。

mander.lala

自己一個去跑, 真係男人的浪漫.

師兄, 多謝你的分享. 如情況許可, 可否SHARE 下相片比大家睇睇?

再一次多謝師兄詳細的解答與分享. 出年, 一定會到我...

purejoey

我都就快一個人去關島跑~

ah_teng

http://www.saga-s.co.jp/photostudio/photocategory/sakura2014.html
可以睇相呀，仲分曬區，heehee

一個人去外地跑，也是女人的浪漫呀，哈哈

ah_teng

mander.lala 發表於 2014-4-9 20:53
自己一個去跑, 真係男人的浪漫.

師兄, 多謝你的分享. 如情況許可, 可否SHARE 下相片比大家睇睇? ...

相已 share.
加油啦，出年等你報告！

ah_teng

purejoey 發表於 2014-4-9 21:03
我都就快一個人去關島跑~

關島好似好得，回來請匯報。

stenic

好期待去日本跑呀!!

HLC

從日本回到香港，已看到師姐(沒錯吧?) 的詳盡報導，好勁！
工作忙了整整一星期，放假才有時間回應/補充一下。
看場刊，這個馬拉松只得八個外國人參加，香港已佔了七個(四男三女)，剩下的一個相信是一個德國人，因我在途中見過一個背後插著德國旗的年青人。可能比較偏僻，附近旅遊點和購物點不多，沒大城市(如東京、大阪、神戶等)吸引吧。
若不是那麼大風，若是早一星期舉行，沿途櫻花遍開時舉行，這個馬拉松絕對值得推薦，可惜。
真不明白為什麼當地人明知三月底是櫻花盛開的時候，也不把冠上"櫻花馬拉松"這個名號的比賽日期提前一星期呢？

ah_teng

HLC 發表於 2014-4-18 10:07
從日本回到香港，已看到師姐(沒錯吧?) 的詳盡報導，好勁！
工作忙了整整一星期，放假才有時間回應/補充一下 ...

係師姑嚟呀，其實……哈哈。
係，真係大風到我想嘔。希望下次真係可以在櫻花盛開時比賽。

mander.lala

C姐，尋日跑完佐賀馬拉松。真的非常感動。日本既馬拉松，真的同香港完全不同。佢地投入好多。我與女友都非常享受（佢用gps follow 我），再一次感謝妳的介紹。非常感謝妳

mander.lala

另外，賽前一日，天氣預測會落大雨又有雷，到跑果日就好好天，我曬到紅晒呢。天公造美啊

ah_teng

恭喜曬! 聽到你同女友有個好旅程真高興!
我有 like 到大會 fb ，都見到啲人有話雷暴之類，不過後來好熱下。我記得舊年我又係賽前一日超大雨，好在當天出大太陽。好天啲相影出嚟又令啲啦。正!
大家繼續努力。