猛龍教官馮華添

bunbun

壹週刊 2014-04-24

猛龍教官馮華添        

七點半，自由行還未佔據纜車站，馮華添率眾弟子拉筋熱身，準備奔山。

弟子身披黃色戰衣，熨上「MET RUNNER」字樣，MET可拆解為馬拉松精英隊，也有達標之意。三個小時內完成42.195公里的馬拉松，是為達標，在香港，大約有兩百人達標，其中四十四個，出自馮華添教鞭下。「我送他們每人一件，只一件，呢個係身份，冇得買，好多人攞咗，唔捨得著。」

馮華添當差三十幾年，是機動部隊的體能教官，看重跑手胸前的MET RUNNER，與差人膊頭上的花飾。「一個特警同守環頭的人跑，特警一定唔輸得，因為身份問題。」

他教出男女子香港冠軍，金牌教練是他膊頭粒花。曾經有冠軍徒弟離隊，他個多月睡不着，鬱出血癌。「Cancer易請難送，我用個幾月時間請佢出來，要用半年化療將佢送走。其實好多傷心，是自招的。」

一心求勝的馮華添，沒想過，後來被一隊六小時捱完馬拉松的盲人與聾人學生，扭轉了他的想法。

馮華添記得那些讓他引以為傲的成績。像徒弟賴學恩，連續十年的香港男子排名第一，馮華添不但能準確說出他的最佳成績是兩小時二十八分三十八秒，還背得出進化過程。「兩小時四十六分、兩小時三十八分、到兩小時三十五分，然後得到香港第一。」

要徒弟心悅誠服，他信學堂那套，不是電視神劇關禮傑式跳九里的意氣用事，而是身先士卒。「第一日入學堂，幫辦搵隻手撩尿兜入面的尿漬，話第日唔可以見到黃色，叫我們洗乾淨。幫辦都落手，我們還不瞓身？」○八年他患血癌，化療時頭重腳輕，仍帶賴學恩過澳洲比賽。「我同醫生度過化療的時間，令出國期間最唔易感染。教練唔在場，跑手做唔出成績。」

學生稱馮華添為「添哥」，他是大哥格、老派人，一日為師，當終生為父，曾經有幾位學員夜收工，有礙練習，他當仲介，幫他們找工作。「有學生在企業當高層，請他找些朝九晚五的工作。」

多年來開班收徒可以，接客免問。「有些人好神秘，搵秘書打來問我，請我私人教，我話唔好意思，我沒時間教一個人。我有開班，有些是免費的，你可以自己去運動場找我。不過好奇怪，唔使錢嘅班，啲人唔喜歡。」講到底，馬拉松是耐力訓練，多幾個人沿途跌跌碰碰，比較襟跑。「你有一把火，佢有一把火，分開燒好快熄，如果幾個人一組一齊燒，把火就好紅。」

一哥

八二年，馮華添第一次跑馬拉松。與很多人一樣，跑步是出於無奈。他十七歲當差，幾年後胃出血，醫生着他多做運動，減壓強身，他踢對白飯魚，坐言起行。他說胃出血是因為工作太認真，聽過他的身世後，似乎不假。他在內地出世，自小離開雙親。「好細個俾親戚運過來香港，點樣來，過程點已唔記得。」他在香港跟過姑姐、姑媽、兩位叔伯。「由細到大，在四個家庭走來走去。」溫飽不成問題，唸書機會卻不多，小學後便出外打工。可能是從小機會不多，每遇機會，馮華添都搏盡。「當差時讀夜校，我都要爭第一，考試前請假一星期，唔瞓覺咁溫。」本來跑步是為了強身減壓，馮華添卻愈練愈入迷。「返工由沙田跑去粉嶺，放工又跑返沙田，禮拜六日換了衫就在山裡面過。」那時沒有科學方法，只有斯巴達。「專挑山路泥路，由粉嶺和合石山頂衝落去，每次計時，有時失足，成個元寶咁滾落去。」後來他知道落斜傷膝，可惜已經太遲，左膝勞損，大腿骨擠壓着脛骨，九一年，當他跑完第十年馬拉松，便告收山。馮華添八五年起在機動部隊總部當體能教官，當時有一位幫辦，一位警署警長，與十二位警長，他是警長之一。九五年那警署警長移民，警隊本準備提升他接替，誰知四個月後，那位移民上司因找不到工作而回流復職，馮華添南柯一夢不特止，還被投閒置散。「做回原來的位置，本來也沒問題，但自從他回來，很多事情不再讓我做。」他閒着沒事，便去考了田徑教練牌。那個教練牌，到○二年終派上用場。「當年我看到香港派一個兩小時四十一分的代表出外參賽，在我那個年代，跑兩小時二十幾的少說也有十個八個。四十一分那個成績，跑完可以回家，不會有獎。我諗，就算我用以前的方法教，該可以教出一個香港代表。」他隨即自薦在警隊出任馬拉松教練。因為自己跑錯方法收過山，便參考外國經驗，整理出訓練門路。第一次在警隊招生，便收到賴學恩。「我叫學員做十次四百米跑，跑完十個，我見佢自己跑第十一個，佢一衝我就計時，一分十三秒，我叫佢跑多個，一分十五秒，佢根本唔使用力。」年幾之後，賴學恩贏得渣打馬拉松。

手空空

手底下出了一哥，馮華添便想教個一姐。「那我就是香港男女馬拉松冠軍教練，現在看當然覺得虛榮。」他也的確如願，徒弟黃小萍三奪渣馬冠軍。可惜○七年尾，黃小萍退隊。當時徒弟如日方中，馮華添一時難接受。「我主觀覺得，我把最好的教了你，你應該要珍惜，我的心態係咁，但原來學的人未必係咁。學生學會了，一樣會選另一條路。」他的教學方法，一直分兩套，對平常學生教一套，只對他看得起的精英，才把珍藏的一套傾囊相授。他失眠抑鬱，數月後，身體出現毛病。「左眼球凸出來，眼睫毛掂到眼鏡，去醫院化驗，結果是血癌。」馮兩努是他學生，一日馮察覺他臉色有異，問起來由，馮華添直說。「馮兩努話：『添哥，一個人得兩隻手，一手捉一個，仲邊有第三隻手捉更好的？』」馮兩努的話，馮華添聽懂一半，放低黃小萍，轉而在學生中發掘另一位有潛質的女跑手，就是後來的香港第一周子雁。雖然心結解開了，還是要化療一輪處理癌症手尾。馮華添捱過這關，馮兩努卻在同年因心臟病猝死。至於那半句未懂的話，馮華添到一○年才解開。當時他安排徒弟周子雁到青海集訓，其間周獲國家隊教練賞識，邀她留隊訓練，爭取奧運參賽資格。周子雁答應留下，發馮華添一封電郵。馮華添讀過電郵，又回到兩年前的交叉點。「當時有個感覺，我養大個女，點解要叫隔籬那個人做阿爸。不過換轉頭，可能我也會這樣選擇，人之常情。」馮華添也看好周子雁，本打算減少手上其他訓練工作，助她爭奪奧運資格。「不過我未教過奧運選手，點夠一個操過奧運選手的教練咁好？只係自己唔心息。」想了幾個月，不想了。「難道我又要找第三個人，之後再放開？我唔需要再捉住任何人，精英跑手喜歡幾時來就幾時來，幾時走就幾時走。」幾個月後，他把那套本來用在幾個入室徒弟的方法，授予其他學生。他頭九年教出二十三個三小時內完成馬拉松的學生，自一一年打開門路，至今已多添二十一位。

路遙遙

幾個月後，機緣巧合，馮華添收了兩位盲人徒弟。話說一一年頭馮華添帶隊到廈門比賽，有五個他不認識的盲人，其中一位盲人阿Kim，當時半行半跑完成十公里，賽後問馮華添，自己有沒有潛質跑馬拉松。「我見他有手有腳，就同佢講：『呢個世界無話得唔得，只有做唔做。』」阿Kim與另一盲人隨馮華添練習，起初也心大心細，馮華添見狀，故意一問。「我問他們，如果你跑馬拉松，全港可以排第幾？」健全人沒法說準，兩位盲人聽了心中更涼了一截，都估計自己排在正常人後面。「我對他們說，全香港可以跑完馬拉松的人唔夠兩萬，你跑得完，就爬了七百萬人頭，而呢七百萬人，係企响度俾你爬頭的。」盲人聽了，心雄起來。阿Kim後來找到贊助，打算跑巴堤雅馬拉松，鼓舞其他失明人士，馮華添聽後，請他三思。「巴堤雅三十幾度，你唔跑都死，你去跑，跑完呢世都唔會想跑。去黃金海岸跑吧，那邊七個鐘頭限時，阿Kim，你唔停就返到嚟。」贊助還包領跑員旅費，馮華添為免健全跑者爭崩頭，建議找聾人跑手擔當，後來兩隊一盲一聾的組合，取其諧音，稱為「猛龍」。兩隊人在黃金海岸完成賽事，阿Kim捱了六個多小時，衝過終點，馮華添與他相擁流淚。教出了猛龍，馮華添始料不及。「我以前只會想，點樣最快跑完四十二公里，其實馬拉松除了有個長度，還有闊度，乜人都可以跑。」後來馮華添問阿Kim，為何喜歡馬拉松，阿Kim說：「馬拉松不會因為我盲，而縮短距離，也不會因為我盲，將終點拉遠。我唔使人同情，亦唔使多做。」馮華添活學活用，又鼓勵了一些人。

Martin1033

兩年前參加他舉行長班訓練，他說我可以sub4完成全馬，但我剛跑完第一次渣馬，用咗5:20完成，眼光好準，抵讚。