跑的 100個理由

bunbun

U magazine  2014-09-05

跑的/100個理由

我跑步是為了減肥。

一年後，我發現一滴肥都減唔到—不過，多了點恆心，多了點朋友。

訪問了 100+ 個跑手，無論是明星還是平民，很多人答的理由都是減肥，識朋友。

有趣的反而是，大家開始跑了以後，用跑步去做更多不同的事情，例如圖中的一班人，是為了保護寶雲道免遭斬樹興建私人路，而跑上山說不。

跑步不再單純衝成績，慢慢朝向做公益、再教育的方向走。來，我們邊跑邊說吧。

1.你夢想去哪個地方跑？


2.你跑步的理由？


寶雲道 17 號事件：║ 保衛寶雲道 instagram║ Love Bowen

1 Lee Ho \ 跑齡 2 年A1 東京馬拉松，因為聽朋友講氣氛好好！

A2 想識多啲人，健康啲。

2 Jeffrey \ 跑齡 2.5 年A1 會跑柏林馬拉松，但城市跑得太多了。無特別地方想跑，所以只要是自然環境、外國郊區就好。

A2 想嘗試用運動認識更多人。

3 Jarmean \ 跑齡 1 年 2 個月A1 沖繩！希望練多一年就可以去。

A2 減肥！已經有階段性成果！同時還有玩泰拳、瑜伽、龍舟，但只是減肥太孤單，一班人跑開心好多。

4 大基 \ 跑齡 5 年A1 京阪神三地馬拉松啦，已經跑了大阪，尚欠兩個。雅典都好想去，發源地嘛。

A2 減磅呀，同為開心。跑步呢幾年是認識香港最深最多的。

5 Charmaine \ 跑齡 2 年A1 倫敦啦，因為在英國讀了十幾年書，有點淵源吧。

A2 好多年前讀書時「枕住跑」，停了之後朋友召喚我出來，最初都是跑 5、6 km，現在跑過了全馬。

6 Haissi \ 跑齡半年A1 想去冰島跑。以前旅行去過，但當時未跑番步，再去一定跑！

A2 以前有跑的，跑了 6、7 年又停了。工作好苦悶，又想有衝擊，又想解吓壓，跑步，有條路就跑得。

Runfinity

跑從不設限

他們目標是「將世界各地變成我們的跑步路綫。」由跑步教練蘇凱男主理的 Runfinity，成立差不多近 1 年。So Sir 主持了一個約三個月的短期馬拉松訓練，完結後覺得「不如繼續」，於是每個星期日早上都去不同地方團跑。Runfinity 的跑友不定期出國參賽，同時與其他組織聯乘公益活動，例如跟 Bring In Change 組織了 Running Ever Laughter，募集跑鞋跑衫送到肯雅，贈予當地物資匱乏的跑手。So Sir 說希望跑會可以做到「帶好學生，又想幫到人，不斷分享對跑手有益的事，不想收收埋埋自己人知道就算。」

║ Runfinity

║ Bringinchange 7 Jenny \ 跑齡 2 年半A1 我想跑溫哥華半馬。無想過全馬呀，想玩多過想造時間（紀錄）。

A2 本來不太做運動，因為老公加入了 So Sir 的跑會就一齊跑囉，好過他去跑我又自己行街睇戲。

8 Ivy \ 跑齡 2 年A1 最想去布拉格跑，因為是個小城，好似步行都可以，跑住睇景都應該好靚。

A2 以前都有跑，但返工無時間。因為想 keep 住做運動，老公（So Sir）又跑步，見一班人跑又開心，就再跑了。

9

Mickey \ 跑齡 1 年A1 就快會去跑柏林全馬，最想跑就是東京，因為聽講氣氛好好！

A2 返工成日坐想做運動，都有做瑜伽，但跑完個人會開心啲。現在一星期三日跑步，兩日做瑜伽，比較平衡。

10

Clara \ 跑齡 3 - 4 年A1 巴黎 4 月有馬拉松，曾經在那邊讀過一年書，所以就好想跑。

A2 跑是因為同事報名參加毅行者，欠一個人，我就去了參加，就要練跑了。我媽咪是每天清晨 4 點半都起身跑步的人，以前我試過跟她跑，跟不上。現在跟到了（笑）。

11 Tim \ 跑齡 3 年A1 目標是跑富士山。上山也好，山腳繞圈跑都好，都想試。

A2 以前打籃球，想練氣，就開始跑。練馬拉松，的確是好大幫助，但變成現在跑山多。

12 蘇凱男 \ 跑齡 18 - 20 年A1 肯雅或者埃塞俄比亞，最 dream，跑步王國嘛。

A2 讀書時同學叫我跑越野長跑隊，就跑了。後來人人都說不能將興趣當成職業，我又硬頸，就繼續跑，我好多嘢都係跑返嚟。

13 Vivian \ 跑齡 4 年A1 倫敦吧，因為在那邊住了 8、9 年，另外想跑晒 6 大馬拉松！

A2 小時候在英國讀寄宿學校被迫跑，極不喜歡。近年再做運動，發現可以釋放壓力就愛上，甚至放工會跑步返屋企。

14 Athena \ OL \ 跑齡半年A1 韓國慶州櫻花馬拉松。之前在韓國住過一段日子，聽朋友講段路好跑又靚，希望有機會感受下。

A2 你知 OL 成日坐喺公司，希望跑步令自己健康啲，其實都有去開gym room 玩跑步機，但參加跑步group 有一大班人，氣氛熱鬧。

15 豐教練 \ 專業田徑教練、MAD ONE 跑會創辦人 \ 跑齡 14 年A1 每個地方都想以跑步方法探索，認識當地文化。今個暑期去過泰國、台灣、日本跑。最深刻印象是曾圍繞清邁古城跑一圈，縱使路面唔係咁好跑，但堅持跑完好開心。

A2 一個人跑步可靜靜地思考及計劃事情；一大班人跑步勝在氣氛好，兩者都可紓緩工作壓力。

16 陳國峰 \ 演員 \ 跑齡超過 20 年

A1 絲綢之路

A2 希望身體健康，亦希望在有生之年可以用腳踏遍世界每一個角落，感受世界！

17 Heidi \ 歌手 \ 跑齡 1 年A1 紐約 Central Park，成日睇電影見到，好想去跑下。

A2 健康。好多時做嘢好忙冇時間做運動，一有時間就跑，減肥之餘，帶氧運動對身體好。

18 Wing \ 跑齡 5 年A1 之前旅行去東歐都帶對鞋跑，跑維也納好舒服好乾淨。之後應該會去韓國跑，總之無論如何去邊都帶對跑鞋去。

A2 減肥，減咗 30 磅。那時候節食，6 點後就唔食嘢，在公園仔喪緩步跑，足足兩年。後來報比賽，識到朋友，先冇咁慘。

19 Desmond \ 跑齡 1 年A1 淨係想周圍跑咋，可以的話，跑南北極囉哈哈。

A2 以前有長跑。現在就為了好玩開心。以前一支公跑，後來入了跑會就好好多。

20 Carol Yeung \ OL \ 跑齡 2 年A1 10 月尾將參加的大阪馬拉松。

自己鍾意睇風景，可邊跑步，邊欣賞楓葉靚景。聽說每 10km 都有支援點，亦冇咩斜路，應可跑得輕鬆啲，好期待！

A2 家人要結婚，打算跑步減肥，但跑跑下變成 gathering 活動，跑完大班朋友去食飯，跑多啲又食多啲。一個人跑較悶，有朋友陪跑多 support，冇咁孤單。

21 Karina Cho \ 文職 \ 跑齡超過 10 年A1 東京馬拉松。其實東京馬拉松唔算最終目標，因為跑步係 daily activity，返工之後全身肌肉繃緊，跑步可放鬆身心。

A2 健康，自己亦有游泳習慣，但兩者比較，大班朋友跑步可發揮團體精神，又開心。之前參加MAD ONE 舉行的 charity run，健康之餘亦可幫其他人，有雙重意義，令跑步更生活化。

22 Calix \ 跑齡 1.5 年

A1 機場跑道……

A2 以前唔識跑，跑得差，減肥訓練就體能好了，愈跑愈多，就愛上了。

23 Miffy \ 跑齡 6 年A1 日出的大帽山路段。

A2 一年前先認真跑。想用真實汗水、經歷，證明只要真心付出堅持，光一定會在面前抱住你。我是 100% 素食跑手。

24 Alex Choi / 文職 / 跑齡 3 年A1 其實我未參加過全馬，之前參加半馬及 10K 比賽多，希望第一次跑全馬係東京馬拉松。

A2 工作壓力大，而跑步係隨時隨地的運動，加上自己鍾意周圍睇吓嘢，街跑好啱我。跑完後沖涼，成個人感覺 refresh。

25 Yanny / 歌手 / 跑齡 2 年半A1 城門水塘，見到別人行山時的相，嗰度風景好好亦好靜。

A2 練氣。

26 Walton Tam \ 紀律部隊 \ 跑齡約 2 年A1 美國波士頓馬拉松，因為參加比賽需要有認證資格，需於 3 小時多完成大會認可的比賽才可參加，想挑戰下自己。

A2 起初朋友參加 Nike 8 公里團隊比賽，找我湊腳，覺得好玩，keep 住參加比賽如渣打馬拉松。及後識到豐教練，一直參加跑會活動，跑下去。

27 Cheryl \ 跑齡 1 年A1 歐洲的馬拉松，風景夠靚。

A2 健康，以馬拉松為目標練習。

28 Andrew \ 跑齡半年A1 參加北韓的跑步馬拉松比賽，跑半馬。

A2 當初因為畀老闆呃，報名參加了渣馬而要練跑，後來發現跑步可以令曾受傷的身體重新 pick up 運動。

29 阿傑 \ 跑齡 2 年A1 日本代官山公園。

A2 最初是為減肥，習慣跑步後希望以後去旅行時都可以跑。

30 Quincy \ 跑齡半年A1 想到香港以外，無車的地方跑。

A2 當初是因為有機會跑馬拉松而開始練跑，然後便一直跑至現在。

31 Eron \ 跑齡 2 年A1 一直想去 Tasmania，也想到那邊跑步。

A2 可以提升耐力及體力，對踢足球及打籃球都有幫助。

32 Kinki \a 跑齡約 7 年A1 到雪地或高山跑，挑戰自己。

A2 可以 relax，抒壓。

33 鄭俊弘 \ 歌手、演員 \ 跑齡 1 年多A1 想出汗。跑跑下會上癮，每次都會跑到一個境界，覺得世界好美好。

A2 The Rock 'n' Roll Marathon，結合音樂與運動，一路聽住搖滾一路跑。

34 Rachel \ 廣告公司 \ 跑齡 1 年多A1 想 oversea 試半馬，有一日可以跑到全馬。

A2 向來不愛跑，後來跟埋老公開始跑。開頭好勝，追求數字上進步，但人跑極得幾快啫？其實跑步是哲學，讓我挑戰自己，訓練意志。

35 Cherise \ 護士 \ 跑齡 2 年A1 香港想試全馬三隧三橋，外國就紐西蘭皇后鎮、倫敦、澳洲黃金海岸馬拉松。

A2 去 working holiday 同外國朋友傾才真正接觸長跑，回港後試過10K、半馬，邊跑邊睇風景，好似去旅行，有滿足感仲可以 keep fit 。

36 孤泣 \ 作家 \ 跑齡 1 年A1 走遍香港。

A2 只因快樂。

37 Regine \ 跑齡 1 年A1 土耳其。

A2 享受夜跑時邊聽歌、邊想、邊跑的感覺。

Yes crew 跑步的附加意義今年 7 月才正式成立的 Yes Crew 由 4 個大專生組成，除了希望聚集一班人一起跑步外，還會結合不同活動，關心社會、回饋本土社區。早前他們便辦過「夜盲」跑，讓跑手戴着太陽眼鏡、3D 眼鏡，甚至眼罩在夜間跑步，體驗視障人士跑步會遇到的問題。最近，他們亦與惜食堂合作舉行 Bread Run，收集美心西餅賣剩的麵包，跑上山送到老人院。

instagram│yescrew_ 38 Nicky \ 跑齡 5 年A1 環港島一圈。

A2 強身健體。

39 皓 \ 跑齡 3 年A1 日本的馬拉松。

A2 可以用腳步認識世界，探索周邊的點滴。

40 Angel \ 跑齡 5 年A1 唔同國家的馬拉松。

A2 因為 endorphine！

41 Amy \ 跑齡 5 年A1 外國比賽，如美國波士頓、德國，因為比較有情意結。

A2 當初因為要考試而練習，之後同朋友一齊跑，覺得開心好多，就一直 keep 住跑街。

42 Pat \ 跑齡 10 年A1 Zombie Run。

A2 開心，因為做運動時大腦內會分泌 endorphine。

43 鍾舒漫 \ 歌手 \ 跑齡 4 年A1 維也納，地方好靚，在一個好有音樂感的地方跑，好型。

A2 本身唔鍾意長跑，但自從經理人喺我唔願意下幫我報咗 3K 同 10K 後，由唔鍾意變到覺得長跑對自己好好。

44 崔碧珈 \ 演員 \ 跑齡 14 年A1 愛琴海，一直沿路跑，欣賞建築物。

A2 鍛煉心肺功能和毅力，希望健康啲精神啲，成為人生一個習慣。

45 Louise \ 跑齡 2 年A1 想試試到沙漠跑一次。

A2 因為鍾意參加比賽，但唔識游水、單車等其他運動，跑步是最安全選擇。

46 Tomuel \ Information Technology \ 跑齡 1 年A1 蒙古。

A2 開頭想減肥，但跑運動場好悶，之後 join 咗 Runmore（跑會，）跑街，就有動力想跑多啲地方，最重要係跑完一齊開大餐。

47 黎可基 \ 中學體育教師、田總馬拉松集訓隊成員 \ 跑齡 15 年A1 柏林馬拉松，因為 Wilson Kipsang 在柏林刷新世界紀錄，我希望參加柏林馬拉松作目標及挑戰自己，但學校假期未必配合比賽日子，暫時未有機會參加。

A2 學生時代得老師鼓勵參加不少學界比賽，從比賽中培養興趣，一跑就跑咗 15 年，跑步可擴闊生活圈子，認識多些朋友。

48 Yim \ 設計師 \ 跑齡 1 年A1 喜歡跑步時海風迎面吹來的味道，所以希望去唔同國家的海旁跑。

A2 鍛煉自己意志力。

49 King \ 建築師助理 \ 跑齡 3 年A1 任何一個海外馬拉松。

A2 開頭在英國讀書因減肥跑，返港就 join 跑步 group，可識朋友，練體態兼同人鬥 gear，好過去蒲，唔使錢又健康，最正影響埋親戚一齊跑。

50 Janet \ 跑齡 2 年A1 New York Central Park。

A2 減壓，跑步的時候感覺好靜。

51 Jovy \ 跑齡 6 年A1 渣馬，因為可以跑青馬大橋。

A2 方便，可以一班人跑，無人陪的話，又可以一個人跑。

52 Ka \ 教師 跑齡 1 年A1 北韓平壤馬拉松，可以窺探下呢個神秘國度。

A2 可以毫無內疚灌一罐可樂！同埋初初 400 米都跑唔到，但因一班人一齊跑，逐漸進步。我唔特別喜歡跑，但享受所帶來嘅一切。

53 Hildy \ 跑齡約 3 年A1 希望到不同國家旅行時，可以抽一個早上去跑步。

A2 可以 keep firm，體態亦較好看。

54 Patrick \ Graphic Designer \ 跑齡 2 年A1 未去過的都想跑，even 香港都未去晒，平日愛亂跑搵新路，總之只愛跑街，不愛運動場。

A2 因為結婚要減肥，後來跑上癮，叫埋老婆朋友一齊試，變成每星期定期聚會。

55 蕭卉妤 \ 學生、田總馬拉松集訓隊成員 \ 跑齡 3 年A1 最想參加世界半程馬拉松錦標賽，每次於不同國家舉行，但需先達標才有參賽資格，現向着這目標努力。

A2 中學時原本玩排球，但因之後參加學界越野比賽有好成績，加入公民體育會開始練跑，一路跑到而家。

56 連詩雅 \ 歌手、演員 \ 跑齡 2 年A1 全世界都有馬拉松比賽，最想去美國、日本跑，要練好啲先。

A2 想唱歌夠氣啲。最初不是太鍾意跑，夾硬迫自己，跑跑下上癮。

57 溫耀昌 \ 安全主任、香港田徑代表隊成員 \ 跑齡 9 年A1 七大洲的馬拉松都去過幾個，現時最想參加 2016 年巴西奧運的馬拉松。希望日後有機會跑沙漠，參加撒哈拉馬拉松A2 中學參加陸運會有獎項，有成就感，所以參加常規訓練一直練跑，亦因為教練有屬會，畢業後仍繼續跑步參加比賽。

追逐的快感 運動的起點

在大人圈子，跑步可能是減壓，是友儕聯誼的消遣活動。

在小朋友世界，跑步是「放電」，是精力無窮小豆丁的生理需要，商場內公園中樓梯間，無時無刻都有跑跳慾望，是孩童本性。

「放晒啲電，今晚一定好好瞓。」當小豆丁升上小學，跑步又會否升 level？Mandy 在位於馬鞍山的九龍城浸信會禧年小學教體育。訪問當日，尚有十數天才開學，她已召集校內四位運動健將回校練習「接力」。

「來到小學，一有機會跑步同學都會好興奮，因為小朋友天生喜歡追逐，每次跑到終點，他們會感受到『超越』帶來的滿足感，認知這種快感。」求學求分數，跑步跑第一？「對小朋友，跑步未去到講究專業，很多時不是為了參加比賽，基本上有個空間讓他們任意跑，就會好開心。」但當列入體育科目常規課程，跑步變成各項運動的基礎，「技術上有要求，起跑姿勢會影響速度，跑步動作也會拆分——高抬腿和一般抬腿等等，這是作為體育老師要傳授的知識，同學慢慢成為習慣後，到高年級，他們會將跑步的技術轉移去其他運動，像籃球、足球，相得益彰。」運動智能有高低之分，李老師說：「我要告訴小朋友，哪怕是跑步不算快，在班入面沒參加任何球隊，亦不等於不能夠運動吖！」58 Mandy \ 體育老師 \ 跑齡超過 20 年A1 沒有夢想中的跑步地方。放假時一個人靜靜地在家中，一邊看韓劇一邊沿地跑步，出一身汗也很舒服。

A2 是任何運動的 warm up，讓身體由靜止狀態去到一個運動狀態，也可增加心肺功能，但小朋友有時未必知道，為何老師會常常叫他們在上堂前先跑圈。

跑步是......

吳婉瑩：「夥伴的運動，三四歲時媽咪已經帶我去公園跑步。」葉綺蕾：「與朋友一起追逐的理由，也要多得老師教我正確跑姿，幫到我在籃球場上的轉向、速度。」周智濤：「我的對手，我的日常生活，追巴士也是一個人的跑步比賽。我三年級時好瘦，爸爸要我跑步，而家大隻咗。」張嘉晉：「互相切磋，帶來滿足感的活動。細個鍾意跑步，而家大個就踢波，我踢前鋒，講求速度，但技術也重要。」59 Philip \ Sales Manger \ 跑齡 13 年A1 去年參加過大阪馬拉松，喜歡用腳去旅遊欣賞景色，希望日後參加歐洲舉辦的馬拉松。

A2 工作壓力大，睡眠質素差，聽說跑步可令人放鬆心情，果然朝早跑完步，晚上睡得好，因此繼續跑步習慣。跑步不用約人，跑快跑慢自己調節，是方便的運動。

60 珠姐 \ Office Assistant \ 跑齡超過 3 年A1 目標參加美國波士頓馬拉松，現時儲緊錢。外國舉辦的馬拉松氣氛好，有好多人沿途為你熱情打氣，令你有目標，跑都跑得快啲。

A2 因為健康問題，改善體重及身形，持續跑步後由 150 磅減到現時 120 磅左右。

61 陳偉聰 \ 中學生 \ 跑齡 2 年半A1 希望長大後可參加美國波士頓馬拉松，聽說氣氛好好，估計自己可達到大會要求的參加資格。

A2 熱愛跑步，之前參加學校陸運會長跑，之後識到師兄，再加入樂家跑會，每星期有訓練，每星期 4 次，每次跑 10K 左右。

62 鄭澤瑭 \ 中學生 \ 跑齡 2 年A1 冇特定想去邊度跑，其實有得出國已經好開心，希望將來旅行以跑步的方式接觸不同國家地方的文化。

A2 起初師兄介紹加入跑會，其實之前冇玩開，初時都唔係好鍾意，但跑完好舒服，喜歡出汗的感覺，跑步時感覺自由。

63 楊鎧駿 \ 中學生 \ 跑齡 2 年A1 想去歐洲跑馬拉松比賽，感受當地氣氛，而且沿途有多啲人支持賽事，風景亦不錯。嗯，德國柏林馬拉松也好，因為比賽會遇上不少高水平跑手。

A2 畀阿 sir 挑選入長跑校隊，另因為參加比賽獲得獎項增加自信心，覺得好玩，咁就繼續跑，現一星期跑 5 次訓練。

64 鄧麗欣 \ 演員 \ 跑齡超過 20 年A1 到非洲大草原赤腳奔跑。

A2 保持健康及身材，也為了挑戰自己。每當想要停低時，只要想着堅持，最後也會達標。一切沒想像中難。

65 Sonia \ 跑齡 2 年A1 想去歐洲跑，特別想去巴塞隆拿。

A2 開心，有滿足感。

66 Edward \ 跑齡 2 年A1 巴塞隆拿，因為我約咗人！

A2 對自己有承諾，想健康點。

67 Jessica \ 歌手 \ 跑齡 17 歲開始A1 紐約 Central Park，睇戲成日見人哋好浪漫咁跑。

A2 當年喺美國時好肥，唔想返到香港啲人唔認得我所以跑步，每日跑一個鐘。

68 袁嘉敏 \ 演員 \ 跑齡超過 20 年A1 夏威夷的海邊。

A2 跑步時不斷出汗，感到全身細胞都在更生，重新注入正能量。

69 白健恩 \ 藝人 \ 跑齡 33 年（一出世就跑?，?人生就是一場賽跑）A1 太空。

A2 健康，令自己開心。帶氧運動可幫助排走身體廢物。

70 Jeffery \ 模特兒、游泳教練 \ 跑齡 6 個月A1 英國，可以邊跑邊欣賞當地的傳統與浪漫，置身其中。

A2 原本為瘦身，而家為咗追！每跑一段路我就定下下個要跑的目標。跑到，都等於成功！今天的我贏到昨天的我。

71 Tim \ 跑齡 3 年A1 想跑人去唔到的地方，可能去沖繩，一班朋友去跑去玩咁。

A2 打拳識了朋友，一齊報了 Nike Lunar Run。跑完覺得可以繼續訓練，就搞了跑會 Weak Ends Here，我負責搞吓活動，改吓名咁。

72 Edward \ 跑齡 2 年A1 會跑吳哥窟，因為呢啲古迹唔知幾時被破壞。

A2 細個跟老竇跑，冇興趣，哈哈，反而打籃球後練跑，受傷機會少一點。舊年年尾開始跟跑會練習，一直到現在。

73 Gary Fu \ Designer \ 跑齡 10 年A1 挪威 midnight sun marathon。

A2 想改善健康，於是跟幾個朋友跑，至兩年前開始參加跑步 group，認識不同朋友，加上時有特別 event，如 halloween run，好好玩。

74 Jennifer Yu \ 模特兒、演員 \ 跑齡 1 年半A1 有藍天白雲的海邊，望住藍天跑步，當身體出汗時有微微海風降溫，爽呀！

A2 最初因為想減肥，後來變成一種喜好，可能因為腎上腺素上升關係，跑完個人開心啲！

75 鄭融 \ 歌手 \ 跑齡 6 年A1 南非。跑步其實是好原始的活動，一路跑會覺得同大自然好連接。

A2 好奇，當時未試過長跑想挑戰下，而且有目標 set 畀自己，令自己唔會躲懶。

76 Flora \ 跑齡 5 年A1 東京啦，好似中途有麵豉湯飲，另外年底會跑柬埔寨。

A2 5 年前跟同事報渣馬半馬，冇點練習過就跑，最後成績都比想像中好——但不要寫我的成績。現在有一齊跑一齊笑又有人支持，好好。

77 Nancy \ 跑齡 1 年半到 2 年A1 沖繩馬拉松，因為睇過 150cm（日本女作家高木直子）寫的書，好似好好玩好靚景！

A2 以前完全冇運動，係當年的男朋友迫自己跑，話做運動身體好，但到我話買鞋時又話我唔使咁認真，最後發現自己真係鍾意跑。

78 Cindy \ 跑齡 5 年A1 想去三藩市！因為 Tiffany ！（賽後紀念品）A2 想個人郁多啲，唔使幾多錢，落街就跑得，身形又好啲，一個人又得，團跑又得。

79 Maverick \ 跑齡 10 年A1 冇時間練全馬，所以比較局限，如果真係練到，就想去東京跑。

A2 因為我打拳，要練氣練爆炸力。現在跑半馬是慢慢享受過程，跑 10km 先為造成績。

80 Foon \ 跑齡大半年A1 會跑大阪半馬，或者其他半馬啦。

A2 想做吓運動，最初跑 3km，後來跟豐教練練習就跑 10km，最近跑過墾丁，去到山崖跑好感動。

81 Raymond \ 跑齡 15 年A1 好快會陪人跑柏林全馬，然後想跑東京、大阪、神戶，睇吓抽唔抽到啦。

A2 中學時跑學界，識得 So Sir，一齊跑到而家。

82 Ray \ 跑齡 1 年A1 噚晚睇到台灣可以係稻田上面跑，好想去！

A2 想去吓唔同地方。最近一年先認真訓練，因為唔想跑 10km，想跑半馬全馬。

一種社交 一種鍛煉

平日夾 band，分享音樂，發洩情緒。

樂隊 Dear Jane 成員 Tim 與 Jackal 說，跑步也是發洩，是男人的浪漫。

他們手機 WhatsApp 有個跑步群組，廿幾人，Jackal 視之輕鬆，說跑步是一種社交，「不如今晚收工跑步囉？唔得，聽晚唔好放飛機吖！已經變成一個群體活動的習慣。」約齊腳落場，又會齊齊開 apps 計公里，「邊個唔夠數，我哋就會話『要跑數吖！』，其實都係為咗——跑完一齊食宵夜啫。」相對隊友，Tim 比較執着，目標是進一步挑戰渣打馬拉松「半馬」。「我唔會聽住歌跑，怕分心，會留意住跑到某個 K 數的身體變化。」頭 3K，熱身，輕輕鬆鬆，之後入戲肉，「如果那日狀態唔 fit，或者之前十二小時食唔夠 carbohydrate，身體欠缺糖份，去到 5 公里打後就會唔掂。」他跑步追求速度，認為「均速跑」訓練對跑速幫助不大，喜愛挑戰「加速跑」，「用 3 分鐘 push 心跳去到一個幾高的水平，再 hold 在一個位置；第二個 3 分鐘回復慢跑，又高又低來回，訓練心臟可以承受更大的跑速。」唔怕辛苦咩？「跑到一個地步，好熱，但又好享受呢種熱及全身出晒汗的辛苦，就係跑步 major moment！」無論是 Jackal 的輕鬆跑，還是 Tim 崇尚的鐵人跑，跑步場景也相同，他們都愛跑電車路綫。「跑步最正是 free to run，凌晨 1 點由太古城跑到銅鑼灣返轉頭，全程平路，成個城市冇人。」夜景、海風與汗水，無料的。

83 Jackal \ Dear Jane 低音結他手 \ 跑齡 3 年A1 約了朋友，如果自己一個，動力冇咁大。在我來說，跑步是需要互相扶持的。

A2 台灣桃園，剛放假到了那兒跑，一片綠油油草地好靚，但已經見到有豪宅在施工，朋友話：「而家唔跑就冇得跑！」希望下次再返去時仲可以咁自由自在跑，而唔係只望到一幢幢新樓。

84 Tim \ Dear Jane 主音 \ 跑齡 22 年A1 幫助身體排毒，又會精神些。若然跑了一段時間停跑，你會覺得周身唔自在，因為跑步已變成你的肌肉習慣。

A2 渣打馬拉松的半馬跑道，渣馬 10K 我挑戰過兩次，一年跑得快過一年，好期待在香港跑半馬，甚至全馬。

85 Rita \ 跑齡 5 個月A1 想跑台灣同澳洲。

A2 最初為減肥，團跑之後跑過好多未去過的地方，新奇又好玩！

86 Josephine \ 跑齡 7 年A1 香港所有離島都想跑！空氣夠清新。

A2 當初因為膽粗粗參加渣馬先跑，同埋當然為減肥啦。

87 Anthea \ 跑齡 7 年A1 好想去關島同韓國跑馬拉松！

A2 第一次參加 10km 見好流行就跟朋友試吓，之後覺得健康又減肥又一班人玩就愛上啦。

88 謝文欣 \ 歌手 \ 跑齡 3 年A1 《Mario Kart》遊戲中的賽道。細個好鍾意打，入面的賽道都好夢幻。

A2 喜愛流汗的感覺伴我。練氣。身體好。

89 Judy \ 跑齡 1 年A1 目前想到澳洲，因為是自己家鄉，或者北韓，因為想看看封閉國家如何展現其繁榮一面。

A2 起初為減肥，後來為健康，跑步後明顯少病了。團跑後會相約跑友一起參加比賽挑戰自己，完成目標好滿足。簡單講就係減肥同玩哈哈。

90 Aka \ 歌手 \ 跑齡 6 個月A1 好想夜晚在五光十色的日本街道上跑。

A2 練氣，減肥。朋友教我第一日跑 5 分鐘、第二日 10 分鐘，慢慢加上去，真係得㗎。

91 GTing \ 跑齡 2 年A1 近一點目標想跑日月潭半馬，遠一點是跑遍世界馬拉松吧。

A2 以前讀書玩田徑壘球，畢業後想搵樣運動做，跑步唔使太多器材，最重要可以聽住歌跑。

92 Connie \ 跑齡 2 年啩A1 跑邊其實無咩所謂，最緊要開心，同有飯食！

A2 想 keep 住 fit 啲、健康啲，最近發現跑步令自己開心啲。

Harbour Runners 邊跑邊看約 4 年前成立，起初由 Wendy 與幾位朋友開始，逐漸愈來愈人加入，變成定期跑步 group。「香港人時常被工作佔據生活，我們想藉跑步讓大家減壓，擴闊圈子，所以一直 open to all，只要逢星期三晚來到就可以一齊跑。HR 最常跑的路綫是維港兩岸，近來也發掘 social run，試過從山頂跑到深水灣，又跑過深水埗，讓 runners 了解各區特色。」93 Ivan \ admin \ 跑齡 5 年A1 希望完成全球 6 大馬拉松，下年目標倫敦馬拉松。

A2 一向有跑步，但不算 regular runner，後來參加 HR，每星期三定期跑後上了癮，現在還會抽多一日再跑。

94 Sarah \ online media \ 跑齡 2 年多A1 東京馬拉松。

A2 起初與朋友一起跑，漸漸覺得個人健康咗，放工後去 happy hour，倒不如 happy run，發掘城市風景。

95 Wendy \ 餐廳東主 \ 跑齡 10 年A1 三藩巿 Embarcadero 沿岸。

A2 起初只是跟幾個愛跑步的朋友一起，逢星期三出嚟跑，得 5 個人，慢慢發展成 HR。

96 羅拔 \ 健身教練 \ 跑齡 1 年多A1 東京、巴黎馬拉松。

A2 本身運動量大，但年紀漸大想 keep fit，還是跑步最快見效。年幾前網上搵到 HR，跟住跑就慢慢上癮了。

97 劉子健 \ 南華甲一籃球隊成員 \ 跑齡 10 年A1 月球，人哋月球慢步，我就月球跑步。

A2 Keep fit，紓緩壓力，放鬆心情。

98 Eunice \ 模特兒 \ 跑齡 3 年A1 夢想去希臘愛琴海跑，一邊跑一邊欣賞藍白色的世界。

A2 最初為鍛煉身體，每星期要求自己跑兩次，慢慢成為習慣。跑步也是減壓的最好方法。

99 陳志健 \ 演員、歌手 \ 跑齡 15 年A1 想去馬爾代夫跑，常常在那邊玩水上活動，跑步卻未試過。

A2 保持身形，也想多看一點沿途風景，多看一點世界。

100 蔡潔 \ 演員 \ 跑齡 1 年A1 澳洲墨爾本的 Great Ocean Road。

A2 想挑戰自己，鍛煉意志力。

後記

終於睇完 100 個跑步理由。

其實，點止 100 個。

例如鄭伊健。跑齡 5 年的他，原來幾憎跑步：「但跑步可以最快令身體血液循環。

我每次只跑 15 分鐘，令身體好似汽車引擎咁着咗，就做其他嘢。」很目標為本。

跑步的理由，可以形而上到試圖用雙腳同天與地溝通，也可以形而下到純粹減肥；可以是交朋結友的社交行為，也可以是孤獨的個人鍛煉。

最重要是跑步中的那一個自己，是享受的。像以上咁多位，幾開心。

text│gie、Olivia、Eunice、Hung Cult、Bonnie photo│Sky、Ki、Jay、Kee、Ricky edit│Edmundo、chun art│Kawai

bunbun

1.你夢想去哪個地方跑？
2.你跑步的理由？

bunbun \ 社會大學 \ 跑齡 3 年

A1: 東馬, 氣氛好!

A2: 人跑我又跑, relax, 思考問題

awolswat

Thanks your sharing.

missredredhead

1.你夢想去哪個地方跑？
2.你跑步的理由？
=== === ===

REDHEAD / 大學/ 長跑跑齡: 4年

A1: BOSTON MARATHON.  以前在Boston唸書及居住，很想跑過賽道旁的母校

A2: 初時跑步, 為了抗抑鬱，現在是為了鍛鍊意志