恒生慈善跑 為公益項目「給孩子送雙運動鞋」籌募善款

bunbun

頭條日報 2014-11-25

鼓勵同事跑馬拉松行善 鼓勵同事跑馬拉松行善        

Kelly身邊好多CEO朋友都熱愛長跑，仲去世界各地跑馬拉松，恒生銀行傳訊及可持續發展總監張樹槐（水哥）係其中嘅佼佼者。水哥前日北上，同恒生中國嘅同事參加廣州馬拉松，成為佢喺內地嘅第十個全程馬拉松，亦係佢喺全球五大洲參加嘅第四十六項全馬賽事。Kelly真係好佩服佢嘅堅持！

水哥同Kelly講，「恒生慈善跑」係佢建議恒生中國舉辦嘅，活動由二○一○年舉辦至今，慈善跑嘅地點已由最初嘅上海站擴展至北京、廣州及深圳，至今就有五百幾人次嘅員工參加，籌得人民幣近五十萬元，即約港幣六十三萬元善款。

籌款送兒童運動鞋

今次「恒生慈善跑」廣州站賽事，除咗有水哥同佢嘅馬拉松啟蒙導師兼恒生中國行政人員楊子江外，仲有恒生中國副行長兼南區主管劉鑑坤、廣州分行行長梁嘉賢，以及內地二十幾位恒生員工參加。而深圳站賽事就將於十二月七日舉行，為公益項目「給孩子送雙運動鞋」籌募善款。