2015.11.01 New Zealand Auckland Marathon

brompton

已報，有無師兄/師姐，有興趣？https://www.aucklandmarathon.co.nz

機票已買，NZ Airline $6800，Auckland來回。Auckland住宿雙人房，約四百多港元一間，可行去去起步點的渡海輪碼頭。我會去一個月，開跑前一星期到達(去到當地練跑，適應下)，跑完就玩南北全島。係Auckland International Airport鑼租車，租車貴過歐洲，約$12000，三個星期，是開心七人車。如果租Camry約$7000。不過，我地有幾部單車，Camry上唔晒。無法，要租，大大部的開心七人車。帶埋架車上南島渡輪。當然，又會唔少得帶部單車去，係紐西蘭踩車，風景絕靚。

11月係旅遊紐西蘭的最好季節。好多年，已想去紐西蘭玩，可惜近幾年，紐紙偏高，現在已由$5.9跌到$5.15，當然希望還可以再跌d。近年，美元強勢，最適合去非美元區玩，其中慳唔少。

arhung

$6800 for a return fligh to auckland is really cheap, enjoy!!

brompton

$6800 (air ticket from HKG to AKL) + $3000 (car rental 21 day) + $750 (fuel) + $250 x 21 day (accommodation in South Island) + $300 x30 (meal per day) + $400 (car/person ferry to south Island) + $600 (air ticket (bag + seat) from ChristChurch to Auckland) + $800 (Marathon registration fee)

=$26,600 (free accommodation in North Island

                               
登錄/註冊後可看大圖

，係Auckland主要用單車代步,唔租車)
如以21日計，(因我係Auckland可免費住宿)，$26,600這個價錢比起去歐洲跑貴。去過歐洲跑幾次，都係21-23日咁上下的自由租車單車遊，$20,000就得(當然唔包什麼特別收費活動、購物)，最平就去西班牙跑 $18,000(已包收費項目) 就得。所以，紐紙如果無下跌得咁利害，我就唔會唸紐西蘭，會繼續跑歐洲。

brompton

今日跑完悉尼馬，過兩日返香港，又要預備一個月後跑紐西蘭馬。跑步季節開始，一場趕完又一場。係紐亞蘭的基本行程安排，已經定左。由ChristChurch回Auckland的機票亦已經訂埋。係南島，有些比較偏僻的旅遊區的往宿，亦已book了民宿。

返香港，上網，book埋架車，就乜都搞好。

brompton

已經訂晒紐西蘭，南北島的住宿，由Wellington to Picton的船票，和租左架開心八人車。住宿，每人每晚$200港紙或以內，有民宿和旅社兩種，大部份係住民宿。祇有找唔到合適的民宿才訂旅社，因旅社無民宿咁方便和好住。民宿，全間屋租，自已友玩晒。旅社，要同人分設施，無咁好。

租車唔貴，18日，開心八人車，都係九千幾。同歐洲差唔多，接受得到。其實唔洗租咁大架車，不還，坐得舒服D，無壞。
旅程安排本來係日間遊玩，到左四、五點才渣車返民宿。但我睇過紐西蘭的路，好似瑞士咁，山路多，路窄，灣多，晚間照明無。考慮到，玩完成日，各人都應該已經好累，還要係黃昏/晚間趕路，實在唔係好安全。加上一連玩成個月，體能、專注力和視力，晚上渣車可能非常危險。所以，已改晒行程，入黑前，就要趕到民宿。

我渣過咁多個國家，已知安全渣車的經驗，就係唔好趕路、唔好晚間渣車。預多點時間，唔好玩到咁盡。

兩個星期前，才跑完悉尼，返左黎無幾耐。練跑，唔可能咁密。因為，跑完全馬，個人好傷，要給個身體去恢復，休息緊要過練跑。好多時跑友跑完個全馬，覺得行得走得，無乜需要休息。這個是錯覺，我每次跑完全馬，都會休息兩、三個星期。係悉尼返左黎，唔係好習慣香港的天氣，濕濕的。練跑，都係keep番住條氣。紐西蘭的賽路，上上落落，落落上上，嫋似悉尼咁。這些港口賽事，d路唔會平得好邊，唔係上就落。因為，港口，通常都係由無數咁多個headland形成。上完一個又一個。紐西蘭馬，早上六點起步，真係有無搞錯？？我未跑過一個海外馬，係早上六點起步。真係，洗唔洗咁早呀？想必，沖左線，市民都未起身。咁安排，紐西蘭政府，都係唔支持這種全民運動，想必祇是人有我有。求鬼其，比個晨早出黎，搞完就算。紐西蘭，Auckland，想必都唔係一個跑步的城市。六點起跑，我要四點就起身，坐車去起步點。陰公，個晚唔係訓。

紐西蘭馬，已經係我今年第五馬。紐西蘭馬之後，再跑多一隻馬，2015年就完結。跑左十一年全馬，年年係咁跑，都覺得好好玩。可能，是我以跑馬+旅遊+踩單車，咁樣玩，所以跑左咁多隻馬，都樂此不疲。加上，這些年黎，時間越跑越快，亦是背後的推動力，掛？

YY524

Ching,你的澳洲分享很精彩，真羨慕你每次可用兩三星期跑步+踩車+旅遊！你去的目的地和我的頗多類同，上次巴塞我只去一星期，而我是超慢腳，無緣相遇。而澳洲Sydney 我兩年前有去跑，因腳傷未癒臨時改跑半馬，我覺得氣氛也不太差，記憶中起跑當日有blackmores 帽及跑丅（early bird)派，我的跑友拿了給我。跑完有好多booths 派禮物/宣傳品，又有小食,又有按摩，人太多我拿了飛仔等按摩，在大草地看大電視睇全馬跑者返黎。的確，最開心是免費搭車，但最神奇是當地跑手唔知。因我走的時候同當地跑手行去撘地鉄係我話佢知。
另外，auckland marathon 風景好靚！最辛苦是頭段上上落落，過了bridge 就沿海跑，跟住你一定覺得完全冇氣氛！路人完全冇興趣理你，但就有不少人踏單車，這個你應該會喜歡。我反而覺得呢度d人鍾情踩車多d!
最後，終點區好像是不准外人進入的，這個真不明白！

brompton

YY524 發表於 2015-10-11 23:03
Ching,你的澳洲分享很精彩，真羨慕你每次可用兩三星期跑步+踩車+旅遊！你去的目的地和我的頗多類同，上次巴 ...

謝YY524兄，提供紐馬的情況。

我覺得市面上，缺乏介紹馬拉松旅遊/自由行的書籍和資料。例如，各國馬拉松的介紹，實際參賽情況，行程介紹，等等。我係longrun.hk介紹馬拉松自由行，係想提供比較詳盡的資料，給有意去跑外國馬拉松，有所依據。我玩左十一年，國外馬拉松，從前無唸過把資料上網。但發現，香港這類資料係缺乏。便想，盡自已所知，把資料供給網友參考。

我玩左這些年，去外國踩單車/跑馬，覺得單純旅遊好單調。國外，尤其歐洲，單車資源好豐富，如果單去跑馬，可能錯過左沿途美境、美食。如果，跟跑馬旅行團，就更加無野睇，而且又貴。不過，以香港人忙於家庭、工作、練跑、假期唔多，參加跑馬團都係一個唔錯的選擇。
以現在互聯網的資訊，去國外跑馬/踩車/自由行，係好簡單而不複雜。言語不通，有左Google Translate，即時Translate，已經唔係問題。往宿，喜歡可以係香港book晒，如果唔想咁有限度，流浪式的玩法，可以去到，一晚一晚咁book。就算唔book，都有好多賓館選擇，一定唔會訓街。有架單車，就如虎添翼。例如去到Berlin，我踩單車繞境點黎影相，如果靠腳行，唔係得幾耐，幾遠。去到瑞士InterLaken，又可踩單車遊湖，風景靚絕。跟團，無可能咁玩。

我去國外踩單車/跑馬，如我帶隊，call幾個朋友一齊去，就開團。其實我所謂計劃，都係得啖笑。去到當地，我有時連明天去邊，都唔知。唔係講笑。好似我去到法國，朋友問"現在由瑞士渣到黎法國，今晚係邊樹落腳？"，我答，"哦，咁上網睇睇法國/瑞士邊境，有乜野玩？有，就係個度停停訓覺。"又好似，去到西班牙，睇到有個濕地大公園係Seville海邊，就決定渣去玩。這種，無乜安排，無乜預定行程，的單車/跑馬遊，我鐘意咁玩。有架單車，有架租車，去到邊都無問題。住宿，係文明的地方，唔會無。又好似，我渣到Munich已五、六點天黑，乜住宿都無事前book，就係路邊找左間Bar黎住(上面有客房)。去到法國Nice，又係咁。

我的朋友(佢地唔係跑步人)，初時唔係好慣我咁玩的風格。係出發前，會問，行程點，book晒野未，等等？我就會答，"無禍，祇book左飛機票和架租車，和第一晚和最後一晚的住宿，其它去到執生。去邊道玩？我打算，行順時針行程，落腳邊度，到左先決定。"。但玩玩下，他們的擔心，全沒有了，還會覺得好有歷奇feel。去到踩單車又係，我跟住部Garmin踩，唔洗計劃踩去邊。

brompton

琴日，黎到紐西蘭，氣溫和天氣都好好正午約18度，藍天白雲。落左機，去左Auckland東南邊的Turanga，沿海灣的一個市鎮。今朝沿海邊的跑步/單車徑，跑步。風景靚絕。又係個句，如果香港有咁靚的空氣和環境練跑，就好鑼。係這條單車/跑步徑，又係得三數隻小貓貓在跑步，踩車。紐西蘭，想必又係不是運動城市。Turanga係一個退休，渡假的地方，老人家多坐係海邊，曬太陽，吹水。同悉尼Coogee海邊有d吳同。我跑過的Coogee海邊，多太太推住小朋友，係度邊推邊吹水。當然，亦吳少得老少人家係度曬太陽。
係Turanga海邊跑，有吳同的路面。有我喜愛的沙石地，草地和馬路面。可以給對腳去適應不同的環境。這幾天都會留係Turanga, 到星期六，才回Auckland鑼選手包。

brompton

今早係海邊練跑完，又係冷冷清清的。我獨係度練跑，無乜氣氛。下午就去左Mt Maunganui行山，睇睇風景。見到很多越野跑手，係度練跑。全身裝備，有些數人一隊，嘩! 原來班越野跑友，係Mt Maunganui練跑。我睇他/她們的跑姿，好靚。似飛多過跑。係我身邊，不時有越野跑友，跑過。非常熱鬧。係越野的環境，他/她好似跑馬路咁穩定。高手。可能，紐西蘭的越野跑，好得。比馬拉松跑，popular。
我無玩越野跑，係我第一次見越野跑，可以跑到咁快。係我身邊像風一樣飛過。可能，紐西蘭，郊野環境好，跑越野賽有利條件。反而馬路跑，就真係冷清。單車/跑步徑，得減肥健康跑。係Mt Maunganui所見，應該係練比賽的一班人。不是一般體能健康跑。

可能香港玩開國際越野賽的跑友，會知紐西蘭是否有競爭力？我真係烏Sir Sir。不過，我就咁睇，紐西蘭越野跑的成績，應該好得。

brompton

昨天晨咁早就渣車去大會安排跑手專車去Devonport起步點。我要3:45淩晨起床，去坐4:40am開的巴士。巴士上得小貓貓三四隻。到左起步點約5:10am。

係起步點的草坪，跑友都坐係度觀Rugby World Final，紐西蘭對澳洲。(陰公，最終澳洲輸左)。我行去起步點睇睇情況，竟然是空無一人(跑手), 祇有工作人員係度整緊個起步點。有無搞錯？還有四十五分鐘就開跑，還在setting up? 我頓時感覺似紐西蘭本地的club race多過係國際馬拉松大會有提寄存行李的服務，依號碼寄存。到左5:45am, 大班跑友才換衫，開始行去起步點。氣溫good fit, 13度，陰晴天。短衫短褲出戰。
得1500人跑全馬，少得可憐。我行兩步己經可以行去起點線。起跑6:00am開始。零到十六公里，吳係上就落。最甘上奧克蘭大橋，同昂船大橋，有得比。加上連接不斷開始上坡的連接路，真係上到喊。過左條橋，還有一個坡係十六公里處，就終於上完。(呼一口氣)。過左這裡，就大平路向南跑，沿海。跑到約三十四公里就U Turn回程, 去finish line。

因吳熟個賽道，前十六公里，過於保守，速度慢了點。由十六公里開始慢慢加速，去追番d時。最後幾公里，見無PB, 就順溜回終點。跑得比悉尼慢了三分鐘。這條賽道我覺得比悉尼好。風景靚，地面正，又吳多灣和U Turn。而且上坡路段放係半程前。千五人跑，一起步，就海闊天空。慢快，自己可決定，吳會有人阻。途中，無見過一群群日本，中國人跑。吳似悉尼，有來自日本的跑團黎。

沿海邊跑，有時都幾大風，跑上奧克蘭大橋時，落左點雨。係咁少人跑的賽事，難找到人頂風。沿途好靜，祇得丁友係度打氣，"渣油，渣油"。大會安排有鼓手助陣，係奧克蘭橋左近。一個字形容，冷清。又係出現係悉尼同一現象，前面盡望吳見人。有一處，我前面無人，係個T junction, 有工作人員示意左轉。同香港，如人流長河的比賽，相差好遠。

紐西蘭人的跑步水準，我覺得一般。不過吳差。比例上，我覺得比較多的年輕女仕參加，二十來歲也不少。她們跑得吳錯。反而男人，可能身重，就睇吳到跑姿好靚。我指係一般民眾，吳係Sub 3個班。

跑完上網查一查個成績，係我的年齡組別，我排得比較前，一個驚喜。但我覺得吳係跑得咁好。我跑完悉尼這一個月以黎，練左三星期，每星期練三十公里的總哩數。係全馬訓練黎講，係一個非常少的訓練哩數。

brompton

比賽沖線後，有獎牌，蕉和Powerade飲品。去到Victoria Park的匯合點，鑼番個行李包(重有大把包包放係度，未被領)。場中，有野食，有按摩，全要錢。

跑完，就行左去就近的Fish Market食野。這個Fish Marker認真雞，同悉尼個Fish Market無得比。悉尼個，又平又正又多野食。這個剩係得Fish And Chip, 魚生又少又貴。相對之下悉尼個一個，係天堂。

下午，就渣車去左Muriwai Beach睇雀鳥。非常正，係海邊近距離睇到成千上萬隻雀仔，聚係石頭上。好壯觀。好似National Geographic的生態記錄片咁。

brompton

這兩天，係奧克蘭就近的地方食下野，行下。去過Devonport, Mission Bay, One Tree Hill, 等。昨天係Half Moon Bay坐船去奧克蘭對面的Waiheki Island。個島好大，有出名的Vineyard和Winery。風景靚，藍天白雲。我選擇左一段約四小時的海邊上上落落的行山徑。沿住兩個海灣行。
自由行就可以咁，他他條條，吳趕時間，行下山，鬆下腳。係紐西蘭行山，汗都吳出，不過有時大風，吹到頭到痛。必要戴帽或頭巾。去Waiheki Island, 都好多船(以紐西蘭的標準)，落左船可以買張全島巴士套票，NZD12，任坐巴士係島上自由上落，遊覽。係Winery要俾錢才可以試酒，我去左一間要乖乖交上NZD 10, 才有酒試。這個就吳似澳洲Hunter Valley的Winery，係澳洲係試酒全免費，想飲幾多就幾多。Waiheki Island上有不少的Art/craft shops，神奇。都吳知點解這個好似長洲的地方，會吸引到藝術家黎。這個可能有大嶼山咁大。要玩曬，可能要兩日。係島上有民宿，吳平。我見過一間，起錶NZD 145 雙人單床房。但佈置有taste。
有很多人黎Waiheki Island行山，沿途都見吳少人。情況有點像香港的行山徑的人流。琴日係weekdays都有咁多人，想必到weekends必然更多。個島有三個主題，Winery, Arts/Craft, 行山和美軍係二戰的設施。我去左差吳多一天，都祇可以行下山，係市中心睇下shops。

過多兩天，真正係紐西蘭的旅遊才開始。會去奧克蘭機場鑼架車，首站Rotorua。係紐西蘭渣車，危險。路窄，灣多，照明吳夠，車速高。渣去睇雀鳥海岸的一段郊野段，首次見識到渣紐西蘭郊野段的危險。路面設計有問題，如過灣段，馬路無加闊，而且無造斜邊，路邊有植物阻擋視線。對面有車黎，要好近才見到。朋友告知，北島己經算吳錯，南島重加危險。

紐西蘭的治安係一個問題。渣車去到紅綠燈位。光天化日下，見約五，六個男人，係紅綠燈前強迫車主洗前後玻璃，屈錢。我見前車不就範，就被兩個男人不繼拍打架車，情況相當嚇人。我地見咁情況，祇好乖乖付上些少金錢，打發他們。係咁雜的澳洲悉尼，都無出現咁情況，紐西蘭竟然有咁亂的治安。還有爛鬼係公眾路面免費的停車位，收錢。同西班牙一樣，陰公。不過我祇見過一次咁情況。泊左咁多日車，祇有一次係咁。

這裡的超市食物，貴過澳洲多多聲，選擇又少過悉尼。一D都吳平，大部分的食物俾香港還貴。初黎時，以為紐西蘭都會好似澳洲的物價咁上下，但睇過幾間超市，心淡。但質素又差過澳洲。牛，豬，雞羊，蔬菜，悉尼平靚正。紐西蘭的牛豬肉，又貴又吳好食。(我好懷念悉尼的超市)。海鮮比悉尼的，更比不上。朋友話南島，更差。要有心理預備。

brompton

今日黃昏，去左Mt Eden去行火山口。渣車上山時，係大閘寫住大閘會每天黃昏七時關閘。所以，我玩到咁上下就急急渣車落山，因為大閘一鎖，就成晚都出吳到黎。

渣車落山，好彩未夠七點，六點四十五分約莫。但前面己有約十部車停左係閘前，因為大閘己於六點就己被鎖。死，走吳到，吳搞。有些司機落車，打電話俾council, 但己收曬工，無人接電話。細心睇下，為何未夠七時己上鎖。原來，由今日開始到九號，大閘改左六點便鎖閘。有幾個比較年輕的，就用工想整爛把鎖。見整吳爛，就call左幾個朋友黎，帶埋爆格工具，爆開把鎖。當然，爆格工具一出，好容易整爛個鎖。終於搞左成粒鐘，二，三十部車，才可離開Mt Eden。
這個經歷好發人深醒。因為弄壞把鎖，係屬於"刑事破壞"。我好奇怪，點解紐西蘭人，吳試下打電話去消防，警察或政府部門，叫佢地去開番把鎖，而自己犯著"刑事罪"的危險，去爆爛公眾財物？我百思不得其解。我祇覺得紐西蘭人的守法意識薄弱。

brompton

係機場鑼左架開心八人車，嘩，大架到無野講。好似渣mini van咁。由奧克蘭渣左落去Rotorua, 睇地熱公園和浸溫泉。浸溫泉，NZD27, 任浸。浸左一粒鐘，夠曬皮。Rotorua地熱公園，面積不大，好似迷你版九寨溝咁靚。加埋地熱出煙，好像九寨溝出煙咁，境象神奇。
由奧克蘭渣車，用左四個鐘就到左Rotorua。我渣下，休下息，又停下。條路都無乜危險，吳太用神。

brompton

渣車去到Lake Taupo北面的Wai O Tapu地熱公園，去睇地熱噴泉。未黎過之前，以為係天然野。原來噴到幾層樓高的地熱噴泉係人工野黎。比佢呃左。係人為砌出個噴口，然後放肥皂的化學品落去。引發壓力不同，而爆發。
這個地熱公園，要收費。除左睇地熱噴泉之外，公園內還有不少的地湖。七彩咁，幾得意。睇完地熱公園，就繼續南下，去到Lake Taupo,。見到有不少遊人係度浸湖水。就打赤腳行落去。發現，湖邊的沙係熱，但水是凍的。浸隻腳落去，感覺腳底熱熱，但水是冰冷。好過引。係Lake Taupi湖邊，踩左個多鐘單車，沿住湖邊的單車徑，風景一流。如果跟鴨仔團黎，就吳可能又浸水，又踩單車。慢活咁，過左個黃昏。今晚，係Lake Taupo的民宿過夜，平靚正。屋主包早餐。都係每人HKD 170。抵玩。

brompton

紐西蘭跑馬+南北島精華遊，28天行程，終於結束，琴早就已飛回香港。紐西蘭，風景靚絕，值得一遊。全程，28日，未計清條數，全包，大致上$21,000有找(當然唔計手信)。$6800飛機票+$2400租車連過南島渡輪+$7500食/玩/電油錢和部份現金付的住宿+$3000信用咭付的住宿+Christchurch回Auckland飛機票$600=$20,300.
係紐西蘭，重點玩過計有，Auckland, Tauranga, Matakana Island, Rotorua, Turangi, Wanganui, Wellington, Nelson, Greymouth, Franz Josef, Haast, Queenstown, Milford Sound, Te Anau, Mt Cook, Tekapo, ChristChurch.

紐西蘭馬拉松，無乜睇頭，但如果未黎過紐西蘭，主要玩旅遊，可以跑下，當是其中的一個旅遊節目。但，如果黎係主要跑馬，就可能有點失望。

係紐西蘭，大把行山徑，資料好充足。由半小時至行六、七日的，都有。係沿途玩，我見唔少帶重裝備的行山友。紐西蘭行山，如果行幾日，係山上都有預訂的hut可以預先book定。紐西蘭行山，風景超靚，值得一去。

suniebo

曾去過NZ, 真是風光如畫, 2萬度去咁都多地方咁多天,C兄超值

brompton

如果跟香港出發的旅行團，8天至10天，報團費都要約$20,000，還未計導遊、機場稅和加遊加餐。而且，行程無我去的一半，約祇有四份一或者祇是五份一的行程。

係紐西蘭，最好味，係羊排(紐西蘭的，唔"show"，澳洲的就比較"show")、青口(又肥又大，入口咬幾咬就得)、三文魚魚生、三文魚腩(煮熟黎食，入口爆油)、奇異果(比起運黎香港的更甜)、生蠔(係蠔場買黎食，比澳洲的更肥更多肉)、雪糕(係澳洲，最好味係Gelato。但雪糕就紐西蘭的好味)，Blue Cod(唔知中文係叫乜名)。
全程多住民宿，間中住係朋友度(免費，但要還人情債，可能重貴！)，民宿唔貴。拉平均，約$180港紙一個人。大大間，有個大廚房。去到人煙唔多的地方，就要住motel。Motel都係約$200一個人，都係有大大間廚房。再去到Mt Cook, Te Anau，就要住YHA(陰公，要住大房)，住YHA唔抵，都要$160一個人。盡量唔想住，但無法，去到Mt Cook，往宿的供應唔多。就算YHA，都要一早訂才有位。係Mt Cook，好多人黎行山，係YHA，我認識到一些重裝備的行山友，佢地行就係Mt Cook行幾日。我就祇行Hooker Valley Walk，來回約三小時，沿途風景無得彈。

係紐西蘭南島渣車，十分危險。灣多，由Picton去Nelson的一段，百多公里，全是灣路，直路唔多。d灣路好似上落大帽山咁，但香港大帽山，上落加埋祇是約十公里。但這條路係百多公里，多是25-35km的灣。全程平均時速，祇是四十多五十公里。因而，百多公里，要行三粒幾鐘。坐係後座，分分會感覺胸口悶，雲車浪。

紐西蘭的路，多是100公里限速。但最危險的，是100KM路段會突然間轉入多灣的25-65KM的大細灣。如果，警覺性唔高，就會出意外。而且，25-35KM的灣，多會比較上窄，如果有對頭車剛到灣，走過些少中間線，就會出現擦撞的情況。係春夏去紐西蘭比較上安全，但如果是秋冬，路面會有雪和結霜，車胎就會容易打滑，不自控制的係灣中過線。所以，我觀察，紐西蘭南島，多人渣4WD的房車，4WD係灣中的表現好過一般房車，比較上安全。

我渣架Hyundai的8人開心Van，好大壓力。因為，Van仔重心高，而且唔係4WD，又大架。當要過25KM的灣時，要收到好好好慢。如果我再擇多一次租車，寧願分租兩架車，租4WD房車。

如果鐘意行山，跑山，越野求生，紐西蘭係首選。我每到一個地方，必去iSite(旅遊詢問處，每個落腳的地方，就有一個)。係iSite內，就會鑼到行山的路線圖(免費)。如果想資料清楚一點，可以問iSite的職員。會評細介紹每一條行山徑。黎到紐西蘭，我行過都唔知幾多條行山徑。行行下，發現唔對路，因為用對腳行，可以行到跛。因此，係後黎，我就鑼架單車去踩行山徑。當架單車係MTB(Mountain Trail Bike)，登上登落咁踩。但行山徑，係出入口，都標示單車不可進入。但本著無人理，照踩可也。其後發現，原來紐西蘭的MTB友，都係照踩入行山徑。紐西蘭，行山徑多過天上的星星。去到每一處地方的iSite，都有十隻手指都數唔晒的行山徑。真係，睇下你有幾多腳力和時間。

係民宿，同屋主閒聊，話每年有不少行山友遇難。因為，紐西蘭，山區多。山區天氣變化好大，幾分鐘前可能藍天白雲，下一刻已經係狂風大雨又或者霧大到睇唔路。有屋主建議我地遊客，選擇家樂徑，來回唔好超過二、三小時的，而且要keep住係條track行。係iSite，有求救的beacon租。可以見得，係紐西蘭行山的危險性。當然，對於資深的行山重裝備客，咁見夠好玩，夠刺激。

紐西蘭，山澗唔少。行山如行過山澗，好多時有警告牌，叫行山客小心山澗會突然山洪暴發。係紐西蘭行山，遊人唔多。好似，我踩過的Keplar Track，係十多公里的行山徑，我祇遇過一隊幾人的行山客。沿途乜人都撞唔到過，如果發生意外或身體不適，就會失救。我係Auckland買左張2degree的電話sim card，但去到南島，原來有大部份的郊野，郊野公路或甚至鎮仔，係完全收唔到signal。即係話，有乜事，都找唔到求救。

可幸，係紐西蘭，係郊野無乜危險的動物和昆蟲。唔似澳洲，危險的動物和昆蟲，頗多。係紐西蘭行山，多見野兔、羊，好cute。