專訪跑壇神鵰俠侶 陳家豪×姚潔貞 快樂源於分享

bunbun

新Monday 2015-10-02

專訪跑壇神鵰俠侶 陳家豪×姚潔貞 快樂源於分享   

上星期同大家報道過，為咗迎接12月舉行嘅年度跑界盛事「可口可樂健跑樂2015」，我哋公司跑步隊「Let's Run」就同Swire Coca-Cola HK合作，率先跑入可樂廠，一齊尋找快「樂」嘅源頭以及分享快樂嘅方法。

不過講到分享嘅方法，我諗「可口可樂健跑樂」多年嚟嘅代言人陳家豪及姚潔貞就非常有說服力，呢對有「跑壇神鵰俠侶」之稱嘅夫婦，共同喺跑步路上打拼多年，當中經歷過大大小小嘅高低潮，由情侶到夫婦，如今潔貞更加跑到新高峰。兩人相處到底有咩秘訣？「可口可樂健跑樂」又應該點準備？

lt's all about sharing

家豪、潔貞嘅威水史，相信唔使點介紹，近排嘅各種新聞報道，大家都一定會睇到，難得佢兩個喺備戰奧運期間都抽空出嚟同我哋跑步，當然要捉佢哋訪問！今次訪問間，筆者覺得兩人嘅心態都同以前唔同咗。

N：《新Monday》 C：陳家豪 Y：姚潔貞N：潔貞為咗備戰下年巴西奧運換咗新教練（原教練為家豪），家嘉身心上有咩轉變？

C：「以前我主力幫潔貞設計訓練課程，而家就交番俾新教練，而且體院有營養師、按摩師、物理治療師、運動專家幫佢check住身體，所以唔使我擔心。反而我自己就改為心靈上嘅幫助，經常輔導佢，可能有時佢訓練過多，都會同佢分析下、調節下，似係個鼓勵者嘅角色，喺佢身邊支持佢。」

N：可口可樂嘅「Share a Coke」主旨係「分享」，你哋點分享對方嘅喜與悲？C：「現階段我想潔貞可以專心一意備戰巴西奧運，所以我會幫佢分擔壓力。其實佢會喺我身上得到好多經驗，因為我早過佢開始練馬拉松，我有咩失敗例子都可以分享俾佢參考，避免重蹈覆轍。」

Y：「其實我轉型跑馬拉松，全個過程家豪都睇住，睇住我被新教練操得愈嚟愈密，佢都覺得辛苦。而家我清晨6點起身操練，佢都未瞓醒，惟有完咗1日先坐低傾下，分享番當日嘅種種，佢都非常體諒我。」

N：家豪近年喺跑賽上開始減產，睇住潔貞向住更遠大嘅目標進發，心態上有咩改變？

C：「其實我係羨慕潔貞嘅，不過經歷過傷患，好多嘢冇得勉強。但自己心態上都唔同咗，對名利睇淡咗，尤其潔貞而家要專心備戰，我就要好好照顧住我哋嘅跑隊，身分由跑手變教練，好好將自己嘅經驗分享出去。」

N：將來各自有咩目標？

Y：「我短期目標一定係喺巴西奧運攞到好成績啦，但其實我未參加過亞運，所以都想搏一搏，之後有時間亦會計劃下組織家庭。」

C：「我哋跑會嘅宗旨同『可口可樂健跑樂』一樣，最緊要開心，訓練係辛苦，但都想大家唔好忘記跑步嘅快樂，我嘅目標就係用經歷同行動提醒大家跑步嘅歡樂。」

N：你哋兩位都參加過「可口可樂健跑樂」，有咩意見俾嚟緊12月比賽嘅跑手？

C+Y：「主要係起步位，因為起步位比較窄，人多就更加要小心意外，跑到出海濱會好好多，同埋閘口中間有啲門柱，跑手亦都要留意，之後1條大直路冇咩問題。提一提有啲快嘅跑手喺其他人重跑緊出去嘅時候已經喺同一條路上回程，咁跑手們就記住讓一讓，唔好阻到對方。」

N：最後，喺跑步路上有咩可以分享？

Y：「跑步路上，當你覺得辛苦時，你身旁嘅人都同樣辛苦，你見到人哋有成績，其實人哋背後可能付出咗好多好多，但你要相信自己都有機會做得到，最緊要唔好放棄。」

C：「1個人跑步，好多時辛苦都冇人分擔、冇人鼓勵，但有人一齊陪跑，開心唔開心都有人分享，咁就唔會咁易放棄，所以不妨叫多啲身邊嘅人一齊跑，開心之餘又有對手，有競爭性先有進步。」

craig

感覺好溫馨

qaz.201309

Thanks for sharing!!!

porpor

羡慕 +讚賞 (y)