香港長跑網  - 長跑長友

 找回密碼
 註冊
搜索
查看: 75|回復: 1

啤啤的跑步日誌

[複製鏈接]

升級   100%

  • TA的每日心情
    開心
    2014-9-17 14:47
  • 簽到天數: 112 天

    [LV.6]常住居民II

    發表於 2018-11-30 23:13:29 | 顯示全部樓層 |閱讀模式
    啤啤的跑步日誌:

    2018-11-25

    跑完星期三嘅Tempo,星期四遲到無跟到新丁班去食梅,就自己喺運動場以心率150自轉,4k順走,4k逆走,留力星期五嘅15k長課。

    之前聽師兄講過,長課想要做好質量,最好要跟住一眾高手跑,頂到真係跟唔到,跳出嚟飲啲水,下個圈繼續跟,咁先最有效益。

    當我準備要起步,就跟住師兄尾車開始跑。一兩個圈後,覺得自己跟得住,唔算辛苦,心諗:「咦?我上星期好似辛苦咁多嘅,會唔會慢咗?」但諗深一層佢哋已經跑咗咁耐,我啱啱入嚟梗係好氣好力,而我理想地當然希望一次過跑晒15k唔好停喇,所以只係乖乖哋跟住師兄後面。

    跟咗咁多個圈,已經記得呼吸步頻,加上有師兄喺旁邊拍住,除咗有1、2個圈甩咗慢咗2秒,基本全部都keep得住每圈1’40”左右。37圈半後,隻錶啱啱喺我㩒錶前響咗一聲,準確地1小時03分00秒完成,平均4’pacing,雖然未可以如師兄要求1小時01分內,但已經比上星期快咗2分06秒,好開心呀,同時覺得好不可思議。

    跑完呢隻15k,等Tracy跑完就即刻返屋企休息,因為報咗第二日嘅健康快車慈善跑步行。

    跑完咁多隻強度課,一心只想用呢隻12k比賽嚟鬆鬆腳做recovery (大會出發前宣布因爲部分路段有修路工程,只有11.5k)。一早已經聽講呢個賽好多上斜好難跑,咁我輕鬆跑無乜問題吖,順便練吓心肺,所以都走到差唔多最後位置上線,而Tracy話佢會盡力跑。

    哦,無問題啊,終點見喇。

    一起步個個都衝晒出去,我就悠悠閒慢跑,將心率由起步時嘅71提升到150左右,剛轉咗第一個彎,已經追返Tracy。

    「你唔係話盡力跑嘅咩?」
    「落斜唔敢跑快呀」

    過咗佢之後,慢慢上斜,追返唔少人,落完緩慢徑上返大坳門路,好多人已經開始放慢,嗰時只係過咗3.66k。

    之後係一大段嘅落斜路,我不自覺地加快咗少少速度,之後有一個400m左右嘅上斜,慢慢上又追返一啲人。

    之後又開始落斜,一來我只係鬆腳,二來唔想傷腳,只係慢慢落。之後見啲人開始喺對面線上斜回程,知道一陣仲要上斜更加唔敢快,少有地見人哋爆落去我仲忍得住腳 (不過一個個我都記低晒)

    回程上斜見到Tracy,叫佢唔好衝落去,留力上斜,一邊講一邊上斜,過咗幾位頭先爆落斜嘅師兄 (我好小氣㗎)。

    上到頂,入水站飲啲水,睇錶得返5k左右,5k呢排成日練都叫做有信心,腳感覺仍然有力,記得之前上暗斜,回程應該落暗斜,就趁佢哋未回到氣就快放一段,過咗遊艇會停車場,停一停再飲水,剩返2k左右。

    Keep住速度繼續去,又經過一個折返,記得落埋條大斜路就係終點,但條斜路太斜,怕傷腳反而放慢側身落,差唔多到斜路底有個師兄突然快放,我就同佢衝咗一段,終點前仍要上一個小斜坡,我諗住佢會同我一齊衝返去,點知上完斜坡佢就收慢,我就自己衝返去,時間57’26”。

    跑完後,又有豉油皇雞脾食,又有美食車半份熱狗,又有三文治,都唔錯吖。

    仲有兩個星期就到廣州馬拉松,要做嘅都已經做晒,狀態睇嚟仍算可以,希望到時可以盡情發揮。

    點評

    Like: 5.0
    Like: 5
    congratulation  發表於 4 天前
    您需要登錄後才可以回帖 登錄 | 註冊

    本版積分規則

    香港長跑網

    小黑屋|手機觸屏版|電腦版|Archiver|香港長跑網 |網站地圖

    GMT+8, 2018-12-15 02:02 , Processed in 0.101294 second(s), 26 queries .

    Powered by Discuz! X3.2

    © 2001-2013 Comsenz Inc.

    快速回復 返回頂部 返回列表