一年一度樂施毅行者噚日閉幕,兩支解放軍駐港部隊隊伍日前已經攞咗冠、亞軍,點知佢哋首度參賽,就惹來是非。有參賽隊伍向《南華早報》投訴,話解放軍出動前所未見嘅最龐大支援隊伍 support team,其間又阻礙其他參賽者,批評我哋嘅威武文明之師勝之不武咁話。
毅行者搞咗咁多年,已經係香港一項體育兼籌款盛事,往年通常係前殖民地啹喀出身嘅參加者成為大贏家,估唔到一向喺香港奉行低調行事嘅駐港部隊今年處男下海參加賽事,就爆出是非。噚日《星期日南早》頭條報道,話駐港部隊今次出動咗至少 50人嘅龐大支援團隊,沿途源源不絕為參賽成員供應食物、清水同衣物。