|
終極 麥徑1-5段 報告
大隊係一點左右,係北潭涌出發.我要返公司作D野,遲了半個鐘,要從後趕上,大約係東霸追上大隊.
今日天氣清涼,又係重陽節假期,係北潭涌郊野公園的遊人/露營人士特別多,去浪茄的一段山路竟然大塞車.十分沒癮.
大家輕鬆到了西灣山士多,我行到興合合,諗住叫一碗冰凍的豆腐花,大快耳朵,點知一吃落去,竟然係一啖熱騰騰的豆腐花,差D想噴出黎... ."頂!...XYZ!!"...事頭婆笑騎騎地解釋"熱...先新鮮啦!....我真係無言以對,眼淚往心中流....十分無奈地一啖,一啖地E個所謂的食新鮮的豆腐花,
大隊5點幾去到鹹田灣食餐蛋面,補充D水再上路.夜晚10點幾去到三段尾有大圍同泰基西門SUPPORT燒味飯,梨,同水,十分感激,真係想以身相許.
P仔全程每到一個CHECK POINT都細心地記下時間,讚!
食飽,飲夠,洗一洗身,再換上干淨的衫褲,成個人煥然一新,有D行完的感覺想打道回府....
告別大圍同西門後,大隊又踏上第4段,一開始就係一大段上斜,本黎已經難頂,仲有成盒美味的燒味飯係大家胃中,.... .
今晚天空滿佈烏雲,沒有星星睇.有D失望.想試下MIKE_LI兄的夜行唔開燈理論:"白石,黑泥,光水堂"......
大家關了燈,我一馬當先,落斜時行唔夠幾步差D碌落山....唉,自問功力淺薄,命仔緊要,啦啦淋開返燈.
今晚夜山十分熱鬧,可能係各隊伍毅行前夕,加緊操練,時不時見到其他隊伍走過.大家互相鼓勵!
半夜1點幾,大隊去到昂平休息亭,阿竇為每人準備一支 葡萄適ALERT,味道一十分難飲,當大家懷疑成效時,即刻有D興奮的感覺,睡意全失.果然有料到,仲勁過偉哥,唔使等半個鐘.
去到基維爾營前的小溪時大約3點半,大家行了成日,腳仔有D脤,一起除鞋,成只臭腳放入冰冷的溪水中,嘩..舒服晒.... .
仲有D魚仔咬我只腳,可能同我去死皮.唔知有沒人捉D魚仔煲湯,一定好鮮甜!
去到基維爾營的一個空地,阿寶等待其他隊友時,突然以行山棍代劍,舞起日本劍:左一棍,左一棍...橫削,直插....,造形十足,老虎生威,棍棍有力,勁度十足!...ONON睇到眼鯨鯨。
原來方才阿寶難扺睡魔,再飲了一支禁藥,藥力發作,好彩隊中沒女隊員,否則一定死喪基維爾!
大家捱下捱下去到獅子亭,偉雄難頂腳痛,要放慢腳步。上次係阿寶受傷,到此地要死捱,睇黎獅子亭係大家的關口位.最後一段路係半睡半醒下終於完成第5段.
從烈日當空,行到日落西山,再到旭日初昇....大家行了成18小時,總算完成一到5段.最後去深水涉衝涼,華哥一早開定位等大家飲茶....爽!
Photo Ready in : http://www.fotop.net/sw/2010_10_16
熱騰騰的豆腐花,..."頂!...XYZ!!"
棍棍有力,勁度十足.....靠支野!
最後竟然見到C隊.....開始上路!
[ 本帖最後由 TerrySze 於 2010-10-18 11:43 編輯 ] |
|