堪稱中環大地主的置地，每年都會搞「鼠戰中環」嘉年華，做慈善之餘，又可以畀一班「有壓力、未解決」的金融才俊，趁機玩吓鬆一鬆。
同樣喺銅鑼灣有「地主之利」的希慎（014），今年亦搞吓新意思，舉行首屆名為「Work X Life Jam」的競技比賽，不過和鼠戰唔同，佢哋唔係玩跑馬路，活動形式反而比較似近年韓國大熱綜藝節目《RUNNING MAN》。
240分鐘內完成4項任務參賽隊伍需要在240分鐘之內，走勻希慎喺銅鑼灣3大個場口（即利園、希慎廣場和利舞臺），完成4項任務。至於任務具體內容係乜？希慎市場推廣助理總經理盧潔儀（Kitty）就話要保持神秘，等參賽者玩嘅時候可以刺激啲。
而今次競技活動會定喺11月2日星期日早上8點鐘舉行。由於晨早流流嘅銅鑼灣，仲未被自由行佔領，所以希慎都唔打算申請封路，公司早前亦試run過一次，過程都算暢順。
Kitty話目前已有10幾間公司答應參加，遞咗表嘅有渣打、大和資本、畢馬威等。參加機構每隊要派出6個人，如果有「C級」高層（即CEO、董事局成員之類）參與，就會有額外bonus分數。
Kitty透露，希慎隊當日都會派出一名高層玩遊戲，但到底係邊位，就要賣吓關子。希慎主席利蘊蓮平日咁elegant，華華都幾難想像佢喺利園區跑山。華華估CEO劉少全粉墨登場嘅機會，可能會大啲。
From: 蘋果日報
