之前全無運動知識嘅我，為咗跑好比賽不斷上網爬文搵資料，喺fb又得到朋友嘅提點，再憑住一股儍勁不停練習，渣打馬拉松來臨之前都叫做跑得似模似樣，而且身體狀況進一步改善：體重跌至73.3kg，體脂率降至16.7%，成個人變得好似煥然一新，朋友見到我都覺得我瘦咗好多，衫褲亦由以前嘅加大碼、36吋腰變成中碼、32吋腰。

嗰陣為咗跑好啲，仲參加咗渣打馬拉松舉辦3日嘅訓練班。

比賽5:30am起步，明知一定可以跑得完，但前一晚都好緊張，驚唔知醒，驚趕唔切去會場，驚無車坐......結果校定幾個鬧鐘，3點幾起咗身，換好晒衫就坐的士去銅鑼灣。

去到會場4點幾，街道上只有零零星星嘅途人，沿住維園走咗個大圈，搵到報到地點，就坐喺公園長櫈食住早一晚買定嘅麵包。又過咗一陣，開始有著住運動衫嘅人走過，睇到有人開始暖身，雖然唔識，我都跟住人哋做幾吓。

一早聽朋友講10K好多人參加，如果唔想俾人阻住，就早啲去排頭位。所以當等到有義工走入寄存行李嘅櫃台，我就換好衫，將行李寄存好，馬上就去上線。10K起跑位置原來喺上天橋後仲要行一段路，天橋上見到有人急跑，有人影相，我就慢慢jog過去（其實我當時唔知道要暖身，只係覺得凍，跑吓郁吓會暖啲），行到起跑線，前面一早已聚集咗好多人，我就跟住走入去密密麻麻嘅人群。過咗一陣，又跟住人群向前移動一段距離，離起跑時間仲有十零分鐘。

隨住時間一秒一秒倒數，心情就愈來愈緊張......

終於，起步開始倒數，十，九，八......三，二，一

槍聲響過，人群爭先衝出，我無佢哋跑得快，就按住平時跑步慢慢加速，一路跑，睇到嘅情境其實都好得意：好多一開始向前急衝嘅人，跑咗200-300m已經開始行；有啲就企喺路中間影相；有啲見到流動廁所就已經衝咗入去......

我一邊跑，愈跑愈順，只因當時知識所限，以為任何時間運動時心率都唔好過高，如果唔係容易有生命危險，所以每當跑到心率錶一響，我就減慢速度，幾次都想過人，但幾次都因為心率錶響而收油......

記得7K路標過後，已經開始攰，但見到好多人過我頭，我唔甘心又發力追上去。

唔知自己再跑咗幾耐（其實當時我對3K大約有幾長根本無概念），終於見返維園，知道終點在望，就加速跑返去。

終於衝過終點，睇到時間52分幾，雖然唔知跑得好唔好，但第一個比賽可以跑得完唔駛上車，對我嚟講已經好滿足。