邁向馬拉松之路 Enthusistence

Enthusistence

掛住打今日個長課，唔記得打埋琴晚個練習！

30/7/17
溫度: 30度
中速跑
34'02, 8.15km
average pacing: 4'10"/km
反思：晚上9點走左落街跑左個中速跑，我近排好鍾意用4分頭既速度練，呢個速度有啲速度感又唔會快到係咁喘氣。原本打算跑10k，不過明天朝早有長課，所以8k就收步，之後慢跑最外圈2個=900米，然後回家！

Enthusistence

14/9/16
Tempo run 27:13, 6.6km

香港真係細，上左4年長跑網先知原來自己舅父係長跑網創辦人之一 ......

Enthusistence

29/10/16
好耐無打日誌！今日係將軍澳副場跑左34個圈，共10200米，時間為38:06。到10000米時既時間為37:20。
感覺好好，最尾仍然有力加少少速！天氣開始涼，希望呢個賽季10km 可以衝到去36頭！
每300米分段速度：
1'05"5 1'07"6 1'05"6 1'07"2 1'06"7
1'07"1 1'06"7 1'07"1 1'06"1 1'06"2
1'06"5 1'06"2 1'07"7 1'07"0 1'07"7
1'07"6 1'07"6 1'07"6 1'08"0 1'08"6
1'09"0 1'09"0 1'07"3 1'09"3 1'08"6
1'08"2 1'07"8 1'07"6 1'07"8 1'06"8
1'07"1 1'05"6 1'05"1 1'06"2

Enthusistence

斷斷續續跑左3年，今次係第三次參加渣馬，終於sub3了！
2015 - 3:08
2016 - 3:14
2017 - 2:57

好耐無打日誌，跑完渣打，今日記錄下先！呢3年一直斷斷續續咁跑，2016年因為學業太忙，缺乏訓練，所以比2015時仲要慢6分鐘。不過今年跑得密返啲啲，長課又做得足咗，終於可以sub3，2:57
聽日或後日有時間打下感受！

Enthusistence

12/2/2017
渣打馬拉松日
當日起身就上天文台睇睇溫度同濕度，真係天公造美！溫度低，濕度唔高，真係好明顯係可以破到紀錄！準備左3包gels，第16-17km食左一包，之後26-28km左右又食左包，之後36k左右又食多包。大大話話呢2年都跑左5場馬拉松，但係無一場無抽筋，真係對全馬真係有啲陰影，哈哈！不過唔理咁多，當日跑之前係咁同自己講，天氣咁好，又練多左咁多，唔會抽既，比啲信心自己！

今次既strategy係想保守啲，唔開太快，所以頭10km只係岩岩好sub3既速度，用左42:39。好好彩身邊有班好有火既跑會人成班人一齊跑，佢地pacing都幾穩定。到左半馬，1:28:50左右！當時心諗：賺左1分鐘喎！（不過都未話有冇把握sub3住，因為我上年12月澳馬頭半程1:26，但30k打後完全撞哂牆，最後3:04完賽。）

可能進步左，又可能天氣真係好好，過左半程個pacing仍然都keep到，直達到30km 2:06。當時開始有啲不安，因為小弟過去有3場馬拉松都係30k-35k就開始抽筋。但當時開始感到少少累意，好擔心會唔會跌pacing跌得好勁。當時咁岩聽到其他跑者傾計（唔知點解佢地仲有氣講到野），其中一個話：「34km打後先係開始，頭30k應該要好似無跑過一樣！」佢講得又幾有道理，但大拿拿30k，好難當無跑過喎師兄！

西隧，真係一個挑戰，尾段不斷要上斜。果下真係開始有啲累意，雙腳都有啲累，好擔心會抽筋。所以刻意再將頻密加強，唔比自己太大步太大動作。出左西隧，仍然有條橋要繼續上斜！當時心諗：「仲有6km，求神拜佛，唔好抽，比我keep到個pacing！」到39km時，時間為2:45，心諗：「仲有15分跑3k，即係5分鐘1k，應該得掛！」不過feel到右腳開始有啲實，當時唔諗咁多，只係持住一個信念：唔理三七廿一，我要拎到1000蚊呀！最後1km到銅鑼灣，可能太多觀眾，腎上腺素上升，又覺得就快到終點，所以pacing不斷加快，得返幾百米咋！終點在望，頂住呀！！最後臨尾直路，見到大會個鐘：2:57，當時已經好興奮，終於得左！睇返隻錶，原來臨尾一k只係用左3:34左右，真係唔敢相信仲有力加咁多速。

跑左3年渣打馬拉松，終於可以sub3，拎到大會既$1000！不過唔可以自滿，下年個目標希望可以2:50！

Result:
前半程: 1:28:49
後半程: 1:28:51
全程: 2:57:40
P.S. 前半程同後半程只係相差2秒，真係唔敢相信。

Enthusistence

13/4/2017
400*16 (每個之間休1分鐘)
75,78,77,76,76,76,76,75,76,75,75,75,76,75,74,72
差唔多成年無做過400間歇！最近見天氣熱左，所以轉一轉衝下啲短速先！感覺幾好，目標希望keep住75s 左右。休一分鐘心理壓力大啲，一跑完隔無耐又要再上線

Enthusistence

23/5/17
1. 3k Tempo Run 10:18
2. 400*6 (3-3:20分跑連休),
71,71,70,70,70,65

天氣開始熱，開始攻下啲短速先！嚟緊都會做多啲短速訓練！

Enthusistence

原來我已經半年無係度打日誌！好好彩今年年初中大收左我讀sports，所以好幸運地成為左和爺既學生！呢半年真係少左跑，因為多野做咗好多，不過呢緊會跑返多啲！希望繼續有突破！

登錄/註冊後可看大圖

Enthusistence

多謝一網絡媒體對我既專訪，希望我既經歷可以比到啲鼓勵即將要考dse既學生！


星期五運動檔案
歷經三次公開試失敗 年青sub3 學生哥憑「馬拉松精神」跑上中大

渣打馬拉松曲終人散，焦點當然落於 sub3的千金先生/小姐，本年度有51位好漢達標，今次筆者邀請了位年輕跑手作訪問，當中產生很多共鳴，看到他的經歷回想當年自己的背影，決定讓大家認識學業路上的馬拉松。

由 會考7分 到 cgpa 4.0
由三次公開試失敗 到大學學位
由 飲酒廢青 到 運動健將
由 跑步新手 到 馬拉松sub3
由 不可能 到可能
旁人眼中所有的不可能都讓小伙子轉化成可能，這都是 長跑/馬拉松希給我們的。

目標和興趣

大部分年輕人小時候不愛讀書，只顧打機玩樂。筆者認為只因未有目標和找不到興趣。阿希第一次會考只有7分，無緣升讀中六，報讀了某院校的副學士先修課程，可惜開學一個月後便發現對課程興趣不大，最後選擇退學了。當時年紀還小，任性的阿希說退學就退學，白白花費了家人兩萬多的血汗錢，每次想起也很愧疚，不過家人卻毫無怨言。 原來每年也有超過一千位大學生退學，倒頭想想理應是大家也未找到人生目標吧？

阿希退學後的生活如同「廢青」，沒有人生目標的他每天百無聊賴，不是打機就是與朋友在公園裡喝酒，每天也很相似，日復一日，內心卻不斷想改變，但如何改變？根本完全沒有方向。

當你以為全世界也放棄了你，就因為馬拉松精神教曉他要走出來，決心要改變自己，選擇重返校園繼續升學。會考只有數分的他，才發現讀書並非易事，幸好有一間中學願意讓他重讀中五，讓他展開人生新一頁。

世事豈能盡如人意，由會考7分到第一次DSE成績只有16分，但他竟然重讀多一次DSE，可惜 只有20分，與當年大學平均收生分數 (22分)，差距甚遠。

三番四次的失敗使他徹底失望。前路像迷霧般模糊一片，伸手不見五指。雖然未能入到大學，不過這兩年在新學校retake並非毫無得著。在這兩年間，他認識了跑步。每次當讀到頭昏腦脹時，便會進行慢跑"充電"。漸漸地，愛上了這項運動。

經歷過三次公開試失敗後，選擇重回學業
阿希選擇全職工作一年後又再重返高級文憑，一年來自給自足，賺取人生經驗，人生又多了一場歷練。

筆者認為與一般的大學生，阿希多了一份堅持，多了人生目標，現在讓其回想這樣的兩年，一定是值回票價的。

在這一年工作期間，由於跑步的時間多了，所以阿希膽粗粗報了渣打馬拉松 (2015) 挑戰自己。最後，他以3小時08分跑畢全程，完成人生第一場全馬。其後，受朋友邀請，跟隨吳輝揚教練進行練習，到2017年再次PB了他全馬成績，跑出了2小時57分。

工作和跑步扯上了關係，而阿希對運動科學產生了濃厚興趣，於是報讀了HKUSPACE的 Sports and Recreation Management。選對了興趣，再加了遇上好同學一起為目標奮鬥，讀得頗愉快。最後幸運地以cgpa 4.0畢業，並入讀了香港中文大學的運動科學與健康教育系。他坦承自己並不比別人聰明，只是願意堅持多一會兒。

升讀中大後，阿希除了希望在學術上有成績外，亦會堅持跑下去。適逢他今年所就讀的班別由香港首席鐵人李致和講師當班主任，在李Sir 循循善誘下，使他更清楚自己的目標！對他而言，入大學只是一個開始，並非終結。未來還有很長的路要走。近年林林總總的經歷，令他明白為人不可自滿，必須時刻保持謙卑。

給予未來的畢業生或年輕一代，大家要努力堅持，尋找屬於你自己的一片天，包括追尋夢想，追尋自己想要做的事，當你踏出了第一步，你便能戰勝昨天的自己，這就是馬拉松的精神。
筆者也回想當年的廢青生活也不枉過！

好多人睇完會覺得同自己好有共鳴性，往往堅持與放棄，都是一線之差既懸念，多得我們一直跑著，不計得失努力向前，其實人生就係甘簡單。

**如果你喜歡篇文章，可以分享出去，鼓勵更多年輕人，不要輕易放棄！**

受訪者： 范文希 fb @Roy fan

體育教師
長跑教練
Jason

                               
登錄/註冊後可看大圖

來源: https://www.facebook.com/HKSportPro/photos/a.419934898391155.1073741828.416133178771327/527899824261328/?type=3&theater

Enthusistence

睇完一篇關於HK01關於自己既報導後，再睇返一直以黎打既跑步日誌，原來人生真係不斷咁挑戰。。


【渣馬Sub3】佢表面上係一個廢青　實際上係一位千金先生嚟嘅　

「山不辭土，故能成其高。」

范文希，曾經的廢青，在whatsapp給我發了這一句。

早陣子，此子的故事就在Facebook出現了。

細節是這樣的。

2010年，他第一次會考7分，沒有學校取錄，晚晚坐公園「隊酒」，「嗰陣堅係廢青」；直至有一晚，凌晨3點回家，發現媽媽還在等門，兒子覺悟了，發憤做人，花了足足3個月才找到學位。2013年他再考DSE，又「肥佬」，翌年考第二次，同樣未如理想，於是返回母校做教學助理；2015年，范文希終於憑第二次DSE成績，攻讀港大專業進修學院保良局何鴻燊社區書院體育及康樂管理高級文憑，CGPA「爆4」，升上中大運動科學與健康教育科。

所謂廢青，根本不廢，至少范文希跟朋友去跑步，會因為大落後而覺自尊受損，甚至有朋友問他有什麼夢想，他一想到的就是馬拉松。他在2015年渣馬跑了人生第一個全馬，3小時08分絕對是好成績；同年4月他跟隨吳輝揚吳師傅訓練，2017年首次Sub 3（2小時57分），今年也以2小時59分05秒衝線。

「我跑馬有一句格言：Enthusistence，即係熱情同堅持夾埋一齊！做人做事，最緊要熱情同堅持；有時我讀書讀到好辛苦，都會諗，練跑嗰種上氣唔接下氣仲辛苦啦，而家喺冷氣房讀書，又有嘢食﹐咁都仲辛苦？」

「我要多謝爸爸媽媽。我屋企唔係有錢，但佢地毫無怨言支持我追求目標，就算我不斷失敗，都冇批評我，永遠支持同鼓勵，覺得只要我知自己條路點行就得，我好慶幸父母畀咁大自由度我。」

從廢青到千金先生，Sub 3就是不斷「打大佬」煉成的……嗯，我們文雅點，應是「山不辭土，故能成其高」。祝福范文希明年能夠如願做個全馬跑250的體育老師，把馬拉松精神傳承下去，讓跑步看的意義超越跑步本身。

「01齊跑」在努力尋找這班不普通的普通跑手，向他們致敬（http://bit.ly/2H82uqP）。

#敬請期待 #千金先生 #我跑Sub3 #鬥心 #意志 #汗水 #摩打腳 #不停步 #馬拉松 #范文希 吳師傅長跑大本營
-----------------------------------------
Sub 3是一個用汗水擦亮的光環。「千金先生」不是天賦異稟，大都沒全職訓練，他們做着各樣的工作，有着不同的性格，但仗着對馬拉松充滿萬分熱誠和無比努力，在普通人的人生，書寫不普通一頁。

                               
登錄/註冊後可看大圖

來源:
https://www.facebook.com/hk01.sp ... 417/?type=3&theater

Enthusistence

14/3/2018
Interval 400*16
3分鐘跑連休,8隻一個break

頭12隻 1'13~1'15
13. 1'12
14. 1'11
15. 1'08
16. 1'01

今日天氣幾好，衝得好舒服！最尾仲有少少力，試下谷一谷，頭200米27s，諗住有機會唔使1分鐘，點知尾200拉車，用左34s，最後61s，不過都滿意！

Enthusistence

7/4/2018
Interval 300*16 (rest 1 min)
57,55,55,54,56,55,55,55,55,55,55,55,55,55,55,48

pacing今次控制得幾好，連續10隻平均都keep到55