喺新丁班練咗一個星期,第二個星期仁教頭突然話今堂出街跑,跑上梅子林之後回程大約10K左右。
我從未去過,亦唔知乜嘢係梅子林(未嚟新丁班之前,馬鞍山對於我呢個九龍人嚟講同屯門一樣都係一個好遠嘅地方)。當大家一窩蜂衝出運動場,我只好跟住大隊跑出去,嗰陣我肯定唔係快腳嗰批,但又唔算係慢,夾住中間,直到去到梅子林山腳,快腳嗰班師兄已經等緊我哋,等咗一陣,好記得係雄哥首先提議:「嘩,好多蚊咬呀,不如跑完返去等喇」,之後成班就一齊跑上梅子林,到嗰日我先第一次接觸到呢個咁出名嘅訓練勝地。
好辛苦捱到第三更亭,按仁教頭指示,快腳嗰班要上到頂,而我哋呢班跑咗無耐嘅新丁已經可以回程。就喺呢個時候,我喺更亭見到醫師企咗喺度休息緊(第一次見佢其實係上星期新丁班之後食飯先認識,「醫師」我仲以為係一個花名),咁啱佢又望到我,就問我繼唔繼續上?有人一齊跑就梗係去埋啦,結果我哋兩個上到頂先落返去。
之後一齊跑返運動場,我就同佢講我唔係好識路,原來佢都唔識,結果去到一個分叉位大家分道揚鑣,一直差唔多去到圖書館,我鐵定知道我自己蕩失路,周圍問人,最終好彩都返到運動場,趕得切一齊去食飯。