藍芽耳筒

rl0497

我用緊JayBird Freedom，電力可以有六至七個鐘嘅聽歌時間，都戴得幾舒服，我打籃球嘅，誇張到有次練射波走籃戴住佢都唔會飛出嚟，不過佢有兩個缺點：一，佢條線有少少黐頸，條頸一有汗嘅時候就會有啲黐住黐住。二，佢講電話嘅時候聽係冇問題，好清嘅，不過對方聽你嘅話就會有啲辛苦，至少我啲朋友都係咁講嘅，所以我唔太建議成日拎佢嚟講電話，不過佢聽歌啲聲唔差嘅。佢有永久保用，當然佢所謂嘅永久保用係呃人，只係包你如果俾汗整壞嘅話佢會一換一俾返個新你嘅，不過我未試過，我只係大約用咗三個月，暫時都幾滿意，不過佢只係防汗，唔會好似你提及嘅另一個Philips SHB6017嘅可以防水，所以你要好好睇睇，不過我買之前都睇咗千幾個review，諗咗好耐先至扑鎚買Jaybird。

rl0497

不過Jaybird冇代理，香港基本上只得一間網店有得賣，雖然嗰間網店話係大集團，我打email去問嘢亦好快覆，不厭其煩咁答得好詳細，不過講到尾都係水貨，我唔清楚究竟保養方面佢有做得幾好，不過有樣嘢我要提提嘅，就係我想買定一啲配件（例如耳塞之類）佢係冇嘅！我問佢可唔可以幫我訂，佢地話冇，所以你亦要考慮一下如果唔見咗啲配件要配返會有幾麻煩！尤其係佢條叉電用嘅USB線，係一個專用頭，出面基本上唔會搵到，跌咗嘅話你屋企又多舊垃圾喇！不過佢勝在送貨快，同某程度上叫做平過喺美國買。

Jaybird 啱啱出咗個新model，可惜係哩間網店冇引入，新嘅可以用正常Micro-USB叉電嘅，你等得又或者想知，都可以問吓哩間網店會唔會引入嘅！

Plantronic 903+我本都都考慮，不過我因為係四眼嘅，完全唔駛諗喇，因為佢係掛耳式好大舊！我戴眼鏡根本用唔到。

rl0497

jbrun，請收PM，因為唔知哩度可唔可以公開人家商用網頁，所以PM咗你。
哩個月由於我去咗個大旅行，所以停咗一個月冇跑到，亦冇用過個Jaybird，不過之前用咗三個月，每個禮拜都大概用三次，每次三個鐘，狀態仍然幾好，所以我都推介你試吓。

另外，該個網頁亦都有Jaybird新型號賣，不過之前睇Amazon啲Reviews對佢評價一般，尤其係電量方面比較短，除咗佢輕咗同講電話收音比我用緊嗰隻好咗之外，有人話連啲制嘅位置都有問題，我諗你最好睇多啲review消化一下先喇。

提示，其實我用緊嗰隻個開關制都比較實同要咁耐啲先會反應，佢本身係設計成咁嘅，並非壞咗，基本上我都好滿意。

不過Plantronic出咗隻BackBeat GO，好似話防汗幾好嘅，你可以睇吓，至少佢一定有行貨唔話保養問題先。

我下個禮拜會再開始用返隻JayBird Freedom，所以有乜特別狀態出咗問題嘅話會再向你報告。