|
因下周要遠行, 近排好忙, 所以無打算逍遙...
但難得今早一號風球高懸, 清風送爽... 既然幾日無跑,
所以一早去跑咗10K, 覺得仲有點力, 時間8點到,
諗起仲可以join 到逍遙跑, 即管試下去運動場望下...
真係見到大家正在熱身、拉筋... 好似仲等緊人,
所以都跟 finewong ching 走番熱身圈, 居然見到 jc 仔仔响度跑緊,
我地兩個嗱嗱聲追上去, 佢見我地兩走唔快, 又跟住我地跑,
重話跑得快過我地... 跟住就加速啦! 我地又話要追, 其實無快度...
佢都好醒目, 不時回頭望住我地, 睇下係咪快過佢,
當我地追貼佢, 佢又會加快小小, 同我地保持小小距離,
就係咁, 好快佢就跑完一個圈喇! 睇佢意猶未盡, 仲想跑多一圈,
睇佢年紀小小, 好有毅力, 同jc 一樣, 真係虎父無犬子!
正如 Terence 所講, 今日跑得相當舒服, 只係回程時,
由於finewong 啱啱好番, 好想跑多啲, 所以咪同佢跑多兩轉運動場,
但中途王ching 迎面而來, 心諗佢又會跑十幾個圈,
咪同 finewong 講, 不如跟佢跑, 跑得幾多得幾多...
所以番轉頭同王ching一齊跑, 初初佢話天氣熱, 啱啱操番, 唔會跑好快喎!
其實已經係 4:30 1K, 高手ge 唔快 pacing 係4:30!!! 死未,
本來都跟到ge, 但佢一見finewong ge 身型同跑姿, 就知道係非一般跑手,
跟住就越跑越快... 第一個圈, 唔駛 8:2x, 睇住佢地兩個跑到談笑風生,
但我就跑到上氣唔接下氣, 知道咁樣跑落下實爆, 所以跑多半個圈就放棄喇...
再睇番時間, 只係 4:0x !!!, 後尾聽 finewong 講,
跟住個兩個圈係用緊4分鐘pacing跑 !!! 王ching 仲係就住嚟跑,
高手即係高手, 我諗下次有機會叫 807同 256 試下跟跑,
睇下可以跟到幾多個圈 !
番到運動場, 大家都响度拉筋, 我只係邪神個6式同一啲拉筋動作重複啫!
唔係分析!! 再強調一下啲要點...
唔講唔知, 原來 paulsiu關節好鬆, 雖然身型龐大,
但神腿6式及高難度拉筋動作難唔到佢, 真係人不可以貌相!!
咁啱有ctse 提到膝頭哥痛, 呢樣嘢係所有跑手ge 惡夢,
好多跑手因為咁而放棄跑步, 其實响好多論壇都已經討論過點避免...
主要都係跑姿、跑鞋、場地與及大腿力量不足, 又或者哩數太長、
操練強度太大, 都容易造成膝蓋勞損, 若軟骨磨損, 就不能修補,
到時不但不能跑步, 連上落樓梯都有問題, 所以不少上年紀人士都要食藥止痛...
我們的箴言就是要長跑長有, 若有任何唔妥, 就要停止練習, 休息/睇醫生直至康復為止! |
|