|
20 Jul 2009 7.88km 43m40s
24 Jul 2009 21.87km 2h22m47s
上星期因為一早預備左星期五要獨賞青公, 所以只係响星期一响公司附近跑左7k幾, 跟住就休腳迎接幾個月黎既第一次長課.
星期五晚本來一心諗住五點鐘收工就緊急徹退既, 可惜都係臨收工有野做, 攪到六點幾先出到屯門市中心. 响西鐵站旁泊好車就開始做熱身, 大約六點半就開始向荃灣出發.
由於太耐無跑過咁長既距離, 開始既時候都唔敢跑太快, 估計都係用緊超過六至七分鐘 1k 既速度, 去到過左咖啡灣既時間, 馬路上突然傳來急速既響號聲, 心諗我又無跑出馬路, 個司機重乜係咁响度響按既呢, 細心一看, 原來係我既街坊花子師兄, 同佢打左聲招呼之後, 我就繼續向前方進發, 又越過高山又越過谷之後, 去到沙倉路段, 迎面又再見到一個熟口熟面既面口, 而呢位師兄亦都見到我, 並大聲叫出我個名, 由於當時我真係(事實係到而家我都唔知佢叫乜名)諗唔起呢位師兄個名, 所以只係講左聲"hi 師兄", 咁就大家向著相反既方向繼續前進. 其實當晚既天氣真係非常適合跑步, 有風又唔太焗, 而我對腳亦都好聽話無乜投訴, 好平常咁已經去到青龍頭, 响呢度又再見到一位不知名既師兄向屯門方向跑, 由於我當時真係又係諗唔起呢個師兄既大名, 唯有都只係同佢互相講聲 hi 就各自投入各自既跑世界, 當去到深井既時候, 右腳腳碗都開始有反應, 由於心裡面想繼老渣之後再一次一口氣跑20k以上, 所以只係減慢少少速度, 繼續不停咁向前跑, 去到過左汀蘭居身上所帶既清水已經完全飲清, 口渴既訊號不斷由腦中發出, 此時唯有响腦裡面盤算住, 一去到荃灣西就衝入7仔買兩支水特, 以解口渴同埋體渴, 如是者意志終於由水特既帶引之下戰勝左身體, 好不容易咁去到麗城花園, 然後收腳慢走去到荃灣西西鐵站, 並且對自己既諾言一一對現, 一口氣飲左兩支水特, 以解口渴之苦!!
|
|