本帖最後由 dmy 於 2013-8-5 12:51 編輯
(Joe 又話有專人寫報告, 自己又寥寥幾句… 不過每次行完我都會吹一陣水嘅. 不過我講明呢個報告唔全面囉)
Scariest Environment Imaginable
引子 1998 年有套戲叫 Armageddon (呢, 又係啲美國人救全世界啲戲呢). 故事講要一啲礸油專家上太空做任務. 其中 Owen Wilson 演嘅Oscar 就同個政府官員有為於太空情形有以下對話: Oscar: Ok, Mr. Truman, let's say that we actually do land on this. What's it gonna be like up there? Truman: 200 degrees in the sunlight, minus 200 in the shade, canyons of razor-sharp rock, unpredictable gravitational conditions, unexpected eruptions, things like that. Oscar: Okay, so the scariest environment imaginable. Thanks. That's all you gotta say, scariest environment imaginable.
喺大東山同鳳凰山, 我不停記起以上劇情. Scariest environment imaginable.
報告 因為手多報咗比賽, 我就請我個人肉 GPS 師兄Joe百忙中同我試路. 跟住又約埋一大班跑友一齊玩. 出發前兩日飛燕嚟咗, 其實星期五不停留意天氣報告, 好在風球星期五除下. 決定大雨都照去, 只少少worry 行雷閃電, 就決定行雷閃電太勁就行第二到. 星期六一早上網, 唔見有太多跑友話唔去, 各師兄師姐真係掂! 出發前又超大雨, 好在出發前雨停咗. 一行人浩浩蕩蕩出發.
因人數多, 各跑友節奏不一樣, 到黃龍坑前要調整組形, 我就留後做鴨尾. 先上大東... 上呀, 上呀, 上好多石极. 因大雨, 好多水位, 有好多位變咗行澗, 大家小心快行, 對鞋都避唔到濕咗, 都唔理咁多. 唔太熱, 所以上得唔太辛苦. 上到唔知邊到開始四周只有霧, 好大風, 又開始有雨, 啲路變水溝 (就係呢個時間我諗起以上講嗰套戲). 視線只有幾十呎. 嗰時同大部分跑友已有一大段距離. 但係約咗一齊玩就要一個都不能少, 話咗同跑友一齊行就點都等埋佢哋... 冇耐, 發現自己落緊山, 我先問跑友, 吓… 去緊邊? 落山喇? 大東呢? 啲跑友話過左喇…. 吓??? 唔聲唔聲咁就過咗........ 落樓梯唔係我强項, 濕咗嘅石极仲恐怖! 我落山時都跣咗一嘢, 好在只跌喺啲草泥上面, 冇整親. 落山中途終於見到啲遠景, 大家都開心咗. 快到伯公坳之前見阿和師兄見我哋咁耐未見人上嚟揾我哋. 到伯公坳時因兩個跑友趕時間閃咗. 咁我哋就趕快上鳳凰山.
因為冇太陽曬住, 上山好輕鬆, 又有風, 唔似落石梯要就住就住, 跳吓跳吓上石极上山好好玩... 之後… 就係惡夢嘅開始, 唔知上到邊到, 又入霧中, 又超大風, 能見度好低, 好似啲恐怖片咁. 啲風又超强勁. 好在我唔係皮包骨, 啲風未吹走我. 之後見到Mavis 一人作戰. 我等到其他人嚟到同佢哋講我趕上前陪Mavis 行, 怕她落單. 陪佢一段冇耐, 就落雨. 之後和哥佢哋都嚟到. 超大風又落雨, 我又諗起譚詠麟 n 年前支歌 <暴風女神>* ... Scariest environment imaginable. Scariest environment imaginable. 不過好在多年吃喝, 有咁上下體重, 就唔怕風吹走, 大風中上山好難忘.
大家繼續上頂, 途中見有一師兄一人. 原來佢抽筋. 我哋其他人冇物資可幫忙, 大隊亦已經好遠喇. 只好陪住佢慢慢行. 行冇耐, 有幾個外籍山友行過, 但佢哋都冇嘢喺身. 之後又有日本山友三人行過, 立即向他們求助. 嘩, 佢哋啲物資好齊. 連運動帶都有. 日本山友好細心咁幫師兄貼運動帶, 又俾佢一包舒緩抽筋沖劑茶, 另一日本山友俾兩粒salt 糖佢食. 我哋問佢哋攞電話要作proper thanks 佢哋灑手擰頭. 好感激呀.
之後師兄可以慢慢行, 大家一齊慢慢上頂…. 不過咩都睇唔到. 咁大風, 冇景, 其實都唔知自己喺邊. 休息夠就落山, 抽筋師兄打算去到昂平坐車走人.... 落山過程非常痛苦. 落咗好耐, 好多好濕嘅石极, 又成日覺得自己對鞋跣… 落山技術又唔夠, Mavis 喺我後面話數到我跣咗八次, 其中兩次跌到在地, 但冇整親 (我最驚整親). 落山過程左轉右轉... 好攰呀對腳, 辛苦過上山. 終於離遠見到大佛時開心到跳起, 落山太攰喇, 大家決定喺昂平走, 因為聽聞棧道更跣, 呢組人最後只有和哥自己落棧道. 八點半正式出發, 我哋下午兩點左右到心經簡林.
除非上同落石极都可以跑, 呢個比賽其實可以跑嘅位唔多, 平路有, 唔多. 我只記起上山落山. 如果比賽當日落雨我唔去喇, 啲石极濕咗好驚呀.
Scariest environment imaginable. 再諗吓星期六咁嘅天氣係咪應該試路, 其實除咗怕行雷閃電, 其實都冇咩, 操山唔係淨係天氣好先操. 天氣惡劣, 大家決定操都要面對少少風險架喇. 多得各跑友互相體諒扶持. 可以開心完成 (at least 我完成兩個山), 開心最重要, 能一齊安全返去就好好. 之後星期日太陽暴曬, 嗰日行可能行得仲辛苦.
多謝Joe 應承陪我試路, 雖然我中途只見你一次... 叫你取消quota係我, 但係原來人多真係好難控制架. 多謝你無私付出幫忙.
多謝各位參加, 雖然起跑冇耐我同大家跑散咗, 冇咩機會吹水. 知道有啲跑友跣親, 希望冇大事. 下次有機會一齊玩. 呢次約跑係參與人數最多一次, 行政安排上有進步地方, 當上一課. 多謝各方善意提點.
我唔知棧道情形係點, 其他人講吓啦.
我懶, 冇影相. 你哋post 上嚟啦.
後記 跑完對鞋泥鴨咁, 如果媽媽在港可以lur 佢幫手 (係,我衰, 哈哈). 我見我哥成日話長兄為父, 當晚同兄嫂吃飯時就同我嫂講, 媽媽不在港, 你有冇打算幫媽媽負吓責任? 佢話我俾佢家用就諗吓, 之後叫我自己買過對. 唉. 世上真的只有媽媽好. 呵呵. (我講笑咋, 我媽喺香港我都係自己洗鞋架!) ___________________________________________________________________________ *<暴風女神> 部分歌詞 (for啲年紀輕嘅跑友) 作詞:林振強
狂風 猛風 怒似狂龍
巨浪亂撞亂動 雷電用疾勁暴力劃破這世界
震裂天空
狂奔雨中 視野矇矓
狂叫著 Lorelai Sweet Lorelai |