|
挑戰雙凹失敗二
19/8(星期五), 7:30AM準時起步, 太陽好猛烈, 一路上牛耳石山一路大量出汗, 上到山頂和16兩人苦笑對望, 雖然沒有對話但已明白對方心中所想 - 點捱到荃錦凹!!! 為左保留實力, 大家都互相提醒唔好跑得太快, 連落斜既速度都收慢. 壞人果然幫我地計得好準, 麥三用左1:55, 冇多冇少, 但大休左13分鐘.
麥四上完石屎馬路轉入上山前之黃泥平路段亦好克制, 慢跑完成, 上馬鞍早段望望手錶, 剛剛用左2:30, 立刻進行第一次補給, 一路上一路食, D包好難吞, 唯有用水灌下去. 快上到頂時突然覺得對腳有D唔對路, 左右大腿內側及左小腿輪流作抽, D位置會不斷變動, 好奇怪, 上到頂立刻補返粒鹽丸, 照住壞人教路方法, 唔拉筋, 慢跑鬆返佢, 初時都OK, 真係鬆返D, 但後黎就左右大腿內側抽到亂晒龍, 有時左面, 有時右面, 有時兩面一齊, 抽到冇晒辦法, 唔停唔得, 唯有拉下跑下停下. 去到茅坪附近迎面遇上一大隊消防員, 人數有幾十人, 個個都好後生, 應該係初哥特訓, 問下佢地原來係烈日行山訓練, 目的地係馬鞍山, 其中有位長官見我抽筋抽到面容扭曲, 問我使唔使幫手, 心諗佢地個個咁大隻, 真係可以抬我落山都得, 可以唔使打999都有消防救人, 爽!!! 但16代我答佢:得喇, 唔使幫手, 佢好捱得架, 抽慣架喇! 當時痛到出唔到聲既我唯有目送大隊離去, 心想16果然係好兄弟!!!!!! 於是把心中既不滿發洩起對腳度, 抽住痛住都加速向前跑, 放到16起後面連影都唔見埋, 啊Q精神, 抽筋都快過佢, 爽!!! 但去到長城之前果幾段斜路就大件事喇, 對腳越抽越勁, 終於要停低等16, 16到左之後話未見過我抽得咁頻密咁犀利, 懷疑我水袋D水特粉開得太濃(一包開1.5L水), 於是佢...........佢............居然比左佢剩返果枝水比我飲, 自己捱渴唔飲, 好感動呀好兄弟!!!!!! 最後去到基維爾用左3:05, 比壞人既餐單多咗35分鐘, 經過基維爾條河時, 16渴到竟然飲河水, 真係好唔好意思!
進入麥五時, 根本已完全跑唔到, 二人漫步落沙田坳, 走捷徑去到平時有好多狗果度時, 攞左新買果部驅狗器出黎試試, 點知原來熱到D狗都返晒屋企, 冇得玩! 到達沙田坳睇下個錶, 全程連休用左5:58, 又一雙凹變單凹失敗之作, 下次再同佢C過!!! |
|