渣馬太渣

bunbun

壹週刊        2014-02-13

坦白講
渣馬太渣        

羅禮文，四十五歲，任職航空公司，輪班工作常熬夜。五年前，眼見竟有七名同齡同事先後心臟病發，開始發力狂奔，逃避死神。

誰知一跑不可收拾，加上員工福利唔好嘥，他已去過廿多個地方、跑過七十多場馬拉松，發現那四十二公里路除了有好風光，亦反映了當地人的價值觀和做事方式。

至於渣馬，跟這城市一樣，只講效率，沒有情趣。

今年梁振英龜縮唔出席，連噓幾聲、消消氣的功能都冇埋。同日，他會飛日本，參加京都馬拉松，朝拜白雪中的金閣寺。

香港的生活係黐線嘅，尤其近幾年，社會上好多嘢你都無能為力，但總要搞掂自己的情緒。耐力運動堅持上一段時間後，會進入類似禪修的狀態，跑完至少peaceful一點。

跑步亦令我認識香港。由大坑道轉入跑馬地，原來有錢人係咁樣生活？上到寶雲道，先知香港係咁靚。肯雅的失明跑手、奧運冠軍尹約基每次來港，我都會陪佢去深水埗，電鑽、防盜、機械零件乜都買。佢話深水埗係天堂。唔係嘛？他跑遍各國，日本、歐洲怎會不是天堂？但我去到肯雅便明白，當地想搵一對跑鞋都難，深水埗卻乜都有。現時我仍會定期把募捐得來的舊跑鞋送去肯雅。

但渣馬我只跑過一屆。田徑總會冇視野、亦冇心去搞。點解天未光就要入隧道食塵？沿路唔會有機會同親友、途人互動。十點幾就頒獎，效率超著，只要瞓晏少少，呢件「全城盛事」對你來講，就像冇發生過一樣。但與其嘥氣去鬧，不如留力去享受好嘢，影響身邊的人。今年渣馬當日，京都和高雄都有賽事，風光更好，跑過你就唔再幫襯渣馬。

日本人細心，會為每位跑手計好速度，等你大概知道幾點會去到邊度，方便親友到時到候來打氣。法國人好玩，波爾多馬拉松開賽前一晚，先在古堡開party、放煙花。沿途穿過酒莊、葡萄園，靚酒任飲。跑到三十八公里、就嚟想死時，忽然有生蠔！到三十九公里，仲有燒牛肉！令你冇辦法唔跑落去。台灣有人情味。但我最深印象，係每次主持開幕禮的政治人物，都以民眾為大。有次台南市市長賴清德在台上致辭，台下有人用台語打斷。後來才知那人跟朋友失散，想市長嗌咪尋人，賴清德冇托手踭，只因民眾有選票在手。十幾年前，他們跟大陸人一樣，我在機場見得多，小小事就  地大鬧。但有民主後完全唔同，尤其是新一代。所以冇民主香港就可以拜拜。我知我嘅諗法好離地。移民、去外地跑馬拉松都係用腳投票，連件大會tee都由New Balance變特步，或者好快，連渣打馬拉松都變中銀馬拉松了。