仲有唔夠四個月,就係2012年渣打馬拉松既日子,去年跑到半馬21公里,今年大膽嘗試報名跑42公里全馬,
平時一星期都有跑2至3次每次有一小時左右,偶然都有一次2小時20k既青公長課,但如果要完成到今次比賽就一定要再加程,所以今次想嘗試跑3個小時.
由青衣出發,去到深井用左1小時10分鐘,係七仔買左支水及食左一排朱古力補充一下,休息左五分鐘再繼續上路.
本來想一口氣跑到黃金海岸,但係覺得未必夠體力支持到回程,所以跑到大欖迴旋處就折返,當時時間為1小時35分,再次跑到七仔已經係2小時7分鐘,同樣飲水食朱古力及休息五分鐘再繼續
不過越再前進越覺得體力開始下降,飲水亦比之前頻密,去到麗城花園支水已經飲哂,於是係海濱花園買左支葡萄適再補充一下.
時間已經接近3小時,大脾都有少許酸痛,但係步速未有減慢,而且上斜有力,其實跑馬拉松對我黎講有一樣好特別既現象,意志力同體力每一段時間都有唔同,我自己都唔知點形容.
終於過左青衣北橋,但係我知道沿長亨跑返長康終點一定唔夠30k,於是特意經美景再返長康,到終點一刻,時間為3小時30分,一停下來,雙腳即時感到酸痛同軟,好像已經唔屬於自己,
但係好滿足,而且,經過今次,我有信心可以完成到全馬. |