鰂魚涌區中年超新手報到！

rl0497

各位好！家住鰂魚涌，打開籃球嘅，由於一路覺得自己氣同耐力都唔好，所以毅然喺人到中年先開始練跑，由八月十八號開始跑我嘅第一次，從太古坊沿內街渣華道跑到北角邨回頭返到陳維周小學舊址就冇氣要停，到上星期六朝早完成咗人生第一次嘅8KM英皇道來回完走，雖然跑得超慢，用咗我剛好一個鐘，不過嗰種越跑越有嘅感覺好難言喻！希望日後大家多多指教！

rl0497

blurmax你好！我亦都有跑哩段，開始嘅時候我係喺鰂魚涌公園太古段個緩跑徑兜圈跑，後來覺得有啲悶，過多幾次後於是開始過天橋跑落西灣河段，之後就伸延到嘉亨灣，跑多幾次後就再伸延到筲箕灣海旁喇，我大部分時間都係喺星期六同日朝早十一點前跑嘅，但係都試過黃昏時候跑，只要你見到一個中年四眼嘅，好奇怪係著住對黑白高筒籃球鞋跑嗰個就係我，見到我就打個招呼喇！哈哈！

rl0497

多謝提點！我其實目的只係練氣，並非要追時間又或者參加比賽攞杯之類嘅，不過我定咗個目標，就係會貪得意參加一四年（好遙遠呀！）嘅渣打馬拉松10K去玩吓，我知道其實一三年嘅就嚟可以報名，但係因為我係初跑，唔想谷得自己太盡，又覺得自己練唔切，所以先會諗住玩成年後嘅渣打啫。
至於鞋方面，我係會買嘅，亦都睇中咗，不過我因為一啲古怪原因要等到十二月至可以買，唔知你著開乜嘢鞋呢？有冇好推介呢？我睇中咗Mizuno嘅 Wave Rider 15，我睇過佢普遍評價都好好，本來我想買Wave Rider 16，不過當我見到佢個鞋面啲料之後，我就決定買15喇！現階段我會暫時著住對籃球鞋跑短啲嘅路（大概2~3K）keep住自己先，因為我都知道籃球鞋唔太適合去作咁長途嘅跑步嘅，到買咗鞋之後就會開始我心目中定嘅所謂大計喇。

rl0497

嘩！咁多對？！
想請教一下，你著咁多隻牌子，有冇偏好或者有冇覺得邊隻特別好呢？其實我主要跑街多，因為硬係覺得跑公園緩跑徑太悶，我需要嘅係一對襟磨嘅，輕重反而比較次要（因為而家著籃鞋球都唔覺特別好重），除咗Rave Rider 15，有冇另外一啲選擇呢？尤其係我哩類入門級嘅人。知唔知Asics有冇一啲model會啱我呢？我大概61KG，高係大約168CM，算係細粒形嘅，正常足弓，跑姿我冇深究，不過一定係腳踭落地先嘅。

唔好意思，咁多口水！

rl0497

多謝指教，我會出去試吓鞋先，有啲嘢始終要着落腳先會知啱唔啱自己嘅。
唔知你有冇去過跑馬地馬場中間個場跑過呢？我有晚特登放工落去睇，我感覺上覺得幾好，不過硬係查唔清楚佢每日幾點開幾點閂，同埋唔知會唔會有乜特別日子會唔開呢？嗰個場環境幾好，因為我日後想加操，但係平日要返工好難跑街，反而放工後（我喺炮台山返工嘅）坐車去跑一個鐘又確係好方便。

其實我間中都會喺禮拜五六深夜出街跑嘅，無車，好靜，好自由。

唔知你又有冇用啲乜嘢儀器或者電話app去keep track住自己嘅進度呢？我自己就用電話加個Nike + running app，因為我貪佢可以播歌唔駛另開app，而且有個powersong功能，冇力時幫你谷一谷都幾好，而且我幾欣賞佢連結埋個NikePlus網頁，睇得好一目瞭然；我有朋友推介我用RunKeeper，不過詳細我又冇睇過，哩方面你有冇乜意見呢？

rl0497

非常唔該！
之前睇過一啲網友提過跑馬地嗰度，佢朝早天未光就走去嗰度跑，佢仲話想跑出面石地但係因為嗰日啲馬要晨操所以先落返去跑中間緩跑徑，所以先有個咁嘅疑問，好嘅，非常感激！