買咗第一支運動手錶Nike+ SportWatch GPS，第一次下定決心走去慈雲山運動場跑圈。

179cm高嘅我，大學畢業時仍只61kg。畢業後一直都無做過運動，最多只係問中跟朋友去踩吓單車，或者有一段時期會跟一班熱愛狗狗嘅朋友每個星期日去行山（之後唔知點解就被朋友標籤我係行山發燒友）。18年後，體重竟然上升到85kg，足足多咗24kg。

好似係因為遇然喺運動用品公司見到啲3鐵衫好靚，決心要著得到而想減肥。去過CF之類嘅健身中心，一個為期一年嘅健身課程竟然要幾萬至十幾萬。左諗右諗，要俾幾萬蚊去跟PT，倒不如我花錢去學習成為一個PT去訓練自己，至少最清楚我嘅人都係我自己。

上網搵過資料，減肥最直接嘅方法就係做帶氧運動（其實嗰陣我都唔知咩叫帶氧運動），而跑步就係最直接嘅方法。

因為未跑過，但又聽講過心率呢樣嘢，知啲唔知啲嘅情況下，就上網不斷爬文（標準嘅理論派代表）。睇過好多網上講解跑步嘅文章後，甚麼運動心率、最高心率之類一大堆名稱朗朗上口，左揀右揀，就買咗隻靚靚仔仔嘅Nike+ SportWatch GPS，加埋成套跑步衫，戰戰兢兢走落慈雲山運動場（當時我覺得我咁肥去跑，又未做過運動，會好樣衰）。

當我去到見到已經有人跑緊，就無咁緊張，set好錶就開始跑（當時都唔知要做暖身、要拉筋），踏出我運動嘅第一步。跑咗幾步，正當高興之際，手錶就響起警號，顯示心跳過高，我心諗：「吓？！我啱啱開始咋喎！」，再跑幾步，心率更加跳到90%以上，我就馬上停落嚟。行咗一陣，見心率回復正常水平，我又開始跑，一起跑手錶又響，我又停落嚟。如是者幾次之後，我就帶住失望離開運動場。

之後嘅幾個月，都係間中得閒就落去跑吓，每次都係失望而回，直到八月份.......