|
|
之前應承左話會SHARE 番神戶馬拉松的事. 由於今年跑過東京同神戶, 因此想稍稍做個對比.
前言
2013年11月17日神戶馬拉松，是我的第二馬（初馬是2013年東京馬）。
11月15日坐中午機PEACH到大阪，再轉巴士去神戶，到步已經累死。匆匆吃晚飯到旅館CHECK IN 休息。
11月16日，終於到咗神戶馬拉松領號碼布嘅日子啦。EXPO 早上10點鐘開始，坐無人駕駛列車 PORTLINER 到市民廣場站，9點34分到唔好以為自己好早，原來已經個蛇餅咁多人等緊。而條龍仲不斷加厚。見大家都係拎住細細喼過來，應該係日本本土人士今早先到，直接嚟expo。工作人員十分落力，指導大家排隊，提大家填表。嘩，我偷睇到左邊一個B 人（B區起跑人），右邊一個 C 人，而我只係一個渺小的 F 人(自卑… … )不過10點開門其實好快領到, 因為外國人是一個專用COUNTER, 人數不多. 主要都係香港，台灣的跑友 。
2013東馬 VS 神馬
舉行日期：東馬2013年2月24日／神馬2013年11月17日
論氣候，神馬於11月氣候沒有那麼乾和冷，不過2月參加馬拉松的話，之前在香港秋冬約有四個月至半年怡人的天氣去好好練習。所以各有各好啦！
規模：東馬約36000人／神馬約18000人
論參賽人數、打氣人數、EXPO東馬都更大更豐富。神戶個 expo 較細，如果東京馬拉松EXPO係嘩嘩聲，神戶只係 dum 一聲，兩下轉出嚟，連想買 power gel 都無（由於坐HAPPY PEACH無寄艙行李，帶不到GEL所以一定要在日本先買，後來好在出番三之宮的ASCIS買到了）。一如東馬，神戶EXPO最澎湃的店仍然係ASCIS 。不過睇真，啲 t shirt 其實同東馬八成似，買嘅動力唔係咁大，加上啲料又的確係炸炸地。不過神馬 expo 細都有一個好處，就係快啲行完，快啲騰空時間下午去行街！
賽前等起步及去廁所安排
東馬由於人多，等去廁所及等起步都極多人（7點行出酒店，行到行李區7:30，之後等左大半粒先去到廁所，再迫入到起跑區都過8:30）。神馬時由於吸取東馬教訓，6:45已經出門，不過由於分流了（A至D區一邊寄行李及等起跑，E至H另一邊），加上人數比東馬少，因此極順利地完成，入到起跑區只係7:50分，足足要再等（捱凍）一個半小時先可以跑。
跑手扮野化妝
東馬的跑者眾多，扮野人士亦更多更癲（較特別的例如扮蛋糕、SKYTREE、耶穌之類）。神戶跑手比較克制，頂多扮動物、小丑、LOLITA之類。
賽道及途中補給
東馬當天等起步很冷，不過跑起來都可以（夠凍，不會出汗）。而且賽道平坦，好跑，就算所謂難度高一點、位於約34公里的佃大橋，其實比起西隧都算碎料。在我而言神馬辛苦少少，一來等咗差唔多個半鐘先起步，二來溫差幾大，等起步時陰凍凍，跑起來出大太陽，汗流浹背，因此我個個水站都入去飲水補充。而且神馬條路無東馬咁闊咁直，時不時有急彎，樽頸，上落斜。先唔好提到三十幾k上大斜條神戶橋，十k 後至折返點來回都有上落暗斜，真係幾磨人。加上東馬路上好快有令人醒神的名勝風景，仲有接二連三令你嘩聲嘅打氣表演（最令我深印象是約十公里後有人播YMCA這隻歌，全部跑手一齊舉起雙臂做手勢。另外淺草的大型歌舞亦令人十分難忘）。神戶呢點就失色少少，我只記得鐵人廿八同埋折返點的舞子公園大橋。
補給方面，東京的民間補給較多，我吃過蛋糕卷及古古力餅，見到而沒吃過的有飯團、紅豆湯等等。神戶就少好多，唯有食大會提供嘅蕉蕉，豆沙餅、古古力包同獅子狗卷（有啲怪，凍嘅）。
神馬路上個人感受
東京馬拉松是自己初馬，練習也較多，最長一次跑過四小時（約28公里）。所以東京跑起來比較舒服，到30公里之後仍然覺得有力可以去。雖然最後NET TIME是5小時15分，不過扣回在中途廁所浪費的14分鐘，約為5小時而已。神戶馬拉松之前練習極度不足，原因一為九月中整到條腰，暫停練習三星期，十月初開番波只得1.5個月，要由10k 賽的體力谷上全馬，周數已經少。加上每星期練兩次，一次短嘢一個鐘，8至9k ，一次所謂長嘢，最長係比賽前九日，都係3小時約25 k，即係我最多只係一星期練咗33、34k 就學人上馬。所以今次我到27-28 k 已經開次謝皮，心諗會唔會唔到呢？仲有三分之一喎。覺得自己係跑得慢咗（比自己平時長嘢仲要慢，後來睇番RECORD自己30至40K足足用了1小時18分，哈哈）。30k 後直頭要用 “捱” 字去形容，一見水站就如獲至寶，因為有藉口俾自己停，入水站行住飲水。捱到後來34 k 左右，上到高速公路，咦我有些少迴光返照，可以跑快少少（即係平時速度），望下左手腕上隻 polar 仲諗：咦，呢個速度到尾，係咪可以 sub 5 呀。點知，馬拉松真係無運氣可言，你練習如何，你的結果也必如何。到咗神戶大橋再入人工島區域，我真係無咩力水，好多下都停，不過又覺得好衰，於是慢慢un un 下都叫維持跑嘅樣式。最後倒數5 k 真係 kk 皆辛苦，每到一個 あと 幾多 k 嘅牌，個心都會諗，好啦好啦，又少一 k 囉。到最後嗰 195 m 真係有啲感動，因為一路上諗，就算跑得完都比預期慢好多，但都唔係太差 （最後net time係五小時十分左右），真係有些少喜出望外。
賽後檢討，唔好歸咎天氣熱、路斜多彎又或者応援不足，自己問題就係練得太少，無論係一周里數或周數都少得可憐，下次唔可以咁打天才波。不過都考慮到，香港夏天咁熱，如果九月中甚至尾先轉涼，到十一月底其實都只有兩個月，如果一個唔好彩有咩傷患，就神仙都難救。所以如果係年頭例如一至四月喺北半球嘅賽事，時間係好好多。
賽後安排
賽後 support 都應該比一比。其實衝線後嘅安排，神馬同東馬都好似：派毛巾、領獎牌（不過神馬計時器嘅係一舊嘢黏喺號碼布背面，拎牌前要扯落嚟，交俾工作人員毛，佢先會將牌掛你頸上，但賽完已經無咩力，二來又擔心扯爛號碼布，我搞咗幾嘢終於有工作人員幫我……唉可否人性化啲呢個設計）、派水派蕉……仲有拎行李都順利。不過拎完行去更是衣室條路真係幾長，仲要行幾級樓梯，出咗行李區再轉去唔知邊度，上電梯。哦到咗，都ok 佢封曬成個大房俾啲女人，咁係非常好，不過女廁好多格都係和式，即係跑完一個全馬要去一個 mau 嘅廁所，嘩！痛苦!! 我有諗過忍住唔去，哈哈……
仲有一點就係散水安排。東馬嘅散水點其實交通唔錯，人多但大家可以選擇嘅交通工具都多幾款。神馬雖有安排 shuttle ，可惜到下午四點半就停咗，因此全世界都只有坐無人駕駛列車 portliner ，迫到暈幾次呀。
數完神馬好似好多不足，不如都講下啲好嘢，第一比賽日寄完行李去廁所完全唔駛等，仲有一列女性專用廁所，感覺乾淨啲。第二，十一月嘅神戶氣溫無二月嘅東京咁極端，無咁辛苦，三來神馬完賽後，可以排隊拎麵豉湯飲，味道都唔錯㗎。總結嚟講，如果東馬係世界級，值 A ，神戶係地區級都有 B （見到地區參與，封路，交通特別安排，阿婆阿公、中學生等等幫手。而且神馬又真係達到紀念大地震加振興地區經濟嘅目的，覺得政府、主辦單位同民眾真係尊重同認真對待呢件事）。 而最最最重要，就係我覺得神戶馬拉松的獎牌靚過東馬呀！
|
|
發表於 2013-4-9 17:49:26
收藏
分享
Like
Unlike
分享
發表於 2013-11-22 21:28:38
樓主
