【網投】港馬2015的Tee, 你like嗎?

bunbun

【網投】港馬2015的Tee, 你like嗎?

bunbun

http://hk.apple.nextmedia.com/financeestate/art/20150119/19007415
蘋果日報        2015-01-19

中環在線：白色做底色　圖案簡約 渣馬Tee唔再青BB        

一年一度嘅渣打馬拉松係嚟緊嘅星期日舉行，啱啱嘅周末跑手拎到選手包，見到內地品牌特步（1368）贊助嘅跑衫，今年終於冇用渣打主色──肉酸嘅藍綠色做配色，順眼咗好多喎。

衫背後印路線圖

今年件衫以白色做底色，前面印咗中環主要大廈嘅外形線條，一睇就話認得出有中銀同IFC，但係主人家渣打個棟呢？就唔多認得到喇。至於衫後面就印咗成個馬拉松嘅路線圖，連配給地點、唔同賽事嘅路程都可以一睇眼晒，睇嚟設計係刻意方便跑手喎。

唔講唔覺，特步已經係第四年贊助大會跑衫。仲記得特步二零一二年第一年贊助嗰件跑衫，又藍又綠，俾人勁彈話似足「史力加」上身，上年就以漸變藍做主題，已經好過第一年好多。

形象設計師張學潤（Nel Nel）就覺得件衫冇乜特別：「都係一般大會T-shirt啦，圖案簡潔乾淨得嚟，又貼題囉！」咁唔知跑手會唔會跑完渣馬之後都着足成年呢？

特步首席財務官何睿博就話，同渣馬係舊年簽咗為期三年嘅約，即係話下年特步依然會係大會跑衫贊助商。佢仲話，合作得好又冇理由畀佢停。原來公司覺得贊助渣馬，可以幫到手提升品牌形象喎。

今年特步仲係中環港鐵站落咗個有代言人謝霆鋒嘅廣告，宣傳贊助渣馬呢件事，何睿博仲話遲啲會幫霆鋒整返個「鋒」系列嘅產品。不過，點落廣告都好，佢話公司使落市場推廣條數只會佔營業額約12%，唔會太多喎。

李華華