無心插柳 柳成蔭

rl0497

哩件嘢搵咗好幾個月，問親都話冇貨，仲要唔幫我訂，因為返親貨都係得十件八件要打崩頭。結果今日無意走上去睇吓，突然返貨，雖然唔平，不過心頭好嘅嘢總有要付出嘅覺悟，終於入手，不過天氣唔好，希望下個禮拜可以試用一下！

rl0497

roma8888 發表於 2013-9-1 01:35
師兄可以裝到幾多ML?

跟手套有一個250ml軟樽，我再買多個250，加埋500ml，老實講唔算多，不過跑開有補水位都好夠，我之前用個Nike手榴彈仔得170ml，仲衰。

rl0497

Cyrus1102 發表於 2013-9-1 01:40
C hing 請問有咩用ga

係跑步用嘅軟水樽連手套套裝，佢好處係唔駛搵手揸住都可以，飲完後卷埋喺褲袋又唔會大大舊，手套背可以抹汗。

rl0497

Rick724 發表於 2013-9-1 01:46
237mL?
手樽網上見到有隻牌子叫Amphipod都好想買但唔知邊到有

跟手套有個250ML，我另外買多個可以左右都有，個水樽包裝係寫237ML，手套個盒面佢係寫250ML，我拎出嚟見一樣大細嘅，都唔深究喇。
我哩個係周圍都冇嘅，有次去旺角女人街某隱蔽樓上舖問，佢話遲啲會返，不過老細叫我唔好買，話咁手揸軟樽大力啲會咇晒啲水出嚟喎！我覺得咁大個牌子，應該唔會設計啲咁戇居嘅嘢嘅，後來睇咗好多外國跑步網都話佢個樽咀你要咬住先可以出水嘅，我未試，不過都有信心嘅，如果咁差都唔會嚟幾多貨去幾多貨喇。

rl0497

上星期五試用，出街跑咗個10k+3K，感覺係要習慣一下，初頭戴咗手套再裝軟樽係有啲論盡，可能我笨手笨腳，的確係會有少少「咇水」嘅情況出現。不過試咗幾次之後又冇咗哩個問題。

佢好處係飲完，將個軟樽拎出嚟攝喺褲頭，好輕鬆自在，哩個係硬樽點都俾唔到你嘅好處。

至於上面有網友話插喺手會影響提速問題，我又冇乜感覺，可能我哩啲超慢腳又唔專門嘅都冇話提速唔提速啦。

有一點要留意，需要輪流交替去飲兩邊係事實，因為當你一邊手重一邊手輕嘅時候，個感覺會唔太好。不過哩個情況其實用腰帶孭兩邊細樽都會有哩個問題，我之前都係用腰帶孭樽嘅人，之所以我想轉哩種手樽，係因為我條Nike水帶唔知係因為我跑姿係側埋一邊定係乜，佢永遠跑跑吓都會走晒位，跑一陣又要調整吓，好煩！另外條腰帶上面個拉鍊袋仔唔知係唔係我衰汗大，條拉鍊應該生咗銹好難打開喇！所以把心一橫試吓哩種手套軟樽。

用佢飲水係幾方便嘅，可以話係手到拿來，不過都有啲缺點：
1. 你套喺手行出去的確冇乜點，不過如果你係揸住兩邊水樽嚟跑，就好似揸住兩樽唧蛋糕嗰啲忌廉咁，都幾異相！不過我哩啲中年亞叔都豁咗出去唔理咁多，克服到個心理障礙就可以。
2. 我可能飲水飲得多，兩邊加埋500ml，我跑完10k都飲晒，到去公園補水嘅時候有少少論盡，拎個樽出嚟入水再裝返上去係有啲要慣吓，我諗如果用單邊嘅話會好啲，兩隻手都用樽會有啲難搞，哩個係用腰帶孭水樽唔會有嘅麻煩。
3. 價格貴，其實加埋成五舊水，值唔值好睇個人，純以質量計，佢質料係好好，我個人覺得都值返個價嘅。

我會繼續用佢，當然會係跑10k以上先會用，如果10k樓下，用返我平時個手榴彈樽仔都好夠。

再有乜嘢使用上嘅古怪嘢或好處，我會再走上嚟留兩句嘅。

rl0497

柔詠 發表於 2013-9-10 20:11
小弟都買咗

你嘅感想如何？

rl0497

slauhk 發表於 2013-10-9 17:13
多謝分享,個手套我無買,要輕巧短程10K都唔錯,不過我真正要想方法拿著跑(太SOFT了,尤其是飲了一半後拿在手 ...

軟樽就咁拎住老實講我就唔太建議喇，當你入滿水，如果佢表面濕嘅話就根本變咗一條跣手嘅肥腸，飲到一半佢又唔知點咁，學你話齋要拎住都幾難。如果一心諗住一路拎住跑嘅話，我諗你真係買個硬身膠樽有個個手箍嗰啲套可能會適合你。

Update一下先，都用咗佢成個月，長長短短都用咗佢跑咗大概4、50K，我諗如果好似我咁一般都係跑7～13K距離嘅，用佢都係唔錯嘅選擇，我亦都適應咗佢，而家冇再出現之前咇水嘅蝦碌嘢喇。以我嘅飲水量大約5K濕吓口用250ml，而家咁嘅配套係好足夠嘅。不過如果日後要跑過我而家嘅距離嘅話，真係要搵位入水，不過冇嘅，你真係跑好遠又冇理由孭成5L水出去啩？！所以以輕便計佢係好可取嘅。