|
|
要由2008 年渣打講起, 當年我冇參賽, 公司就有幾個同事跑10K只係從電視上睇到大班人跑東區走廊, 跑過銅鑼灣…我心想如果我自己跑會點? 跑過SOGO 門口, 一大班人同你打氣, 再跑去維園終點, 個感覺一定好滿足! 
於是二月尾三月, 自己買了對美記WAVE RIDER 11(上網睇過話幾好), 自己開始O係城門河跑下…但跑左幾次, 都怪自己恆心唔夠, 沒去跑…..
如是過了成個夏天, 期間都有去做下GYM KEEP 住運動, 但自己體能一向都麻麻….特別係下身力量唔夠, 對腳唔夠粗
到了十月幾, 都見仲有唔係好多時間, 係時間要試下跑, 因為想試下跑渣打的10K…於是再去城河跑下…但…對WAVE RIDER 我成日著去行街..已經冇晒保護…跑到痛….
於是就冇去跑…上網搵下點解會痛, 期間搵到一D 跑會的網站, 自己想..點解唔去學下跑? 學得正確, 受傷機會都少D….於是搵到跑步舍的網站(請原諒賣了廣告)….去上堂先同李嘉綸教練EMAIL 傾下先…..EMAIL 中我都同李SIR 傾過..自己體能一般..唔知跑得幾多, 但李SIR 話唔駛擔心, 佢會因材施教.
星期五晚去了沙田運動場, 換好衫, 見到李SIR, 佢先叫我跟住位師兄跑五個圈熱身, 即係400X5=2000M=2KM…自己打個突….下?跑咁多..我跑唔跑到?.. 如是者我就慢慢跟住跑…跑下跑下…五個圈就跑晒…我自己都唔信跑得晒…
跟住李SIR 就捉住我, 教我點拉筋, 隻手點擺….點跑法….一時間我真係吸受唔晒..搞到個人好緊張…李SIR 叫我放鬆D…..
跟住再跑五個圈, 期間李SIR 提點我好多野……唔知跑左幾耐,,五個圈又完….跟住再慢跑五個COOL DOWN….我都唔相信一晚可以跑到15 個圈! 
如是者, 跟了幾堂, 自己的體能有大進步, 一口氣跑十個圈都冇問題…之後可以跟住D 師兄師姐跑 100 慢100 快….最初跟得好辛苦….但之後都叫跟到下..
到了12月, 當然第一時間報了渣打10K, 我仲記得我O係第一日報名…仲有2個月….但自己始終唔夠恆心…到了1月先”的起心肝”去跑下街.
頭一兩次跑, 感覺良好, 跑成30 分鐘都得…但一月中自己多飯局, 休息又唔夠..終於出事了,2月頭跑到膝頭痛….跑左15 分鐘都會痛…痛到要慢慢一步步返屋企….O個時離渣打仲有一個星期.
點算好? 難度我要等下年…O個時真係好不安…好在搵到長跑長有的網站, 多謝DESMOND 師兄POST 了一些ITB SYNDROME 的成因和治療的方法, 發覺自己可能有了呢個問題.
之後跟足師兄的方法拉筋, “FULL” 冰同埋足夠休息, 過左三四日膝頭的痛冇左好多……
7/2 晚, 早D 去訓..但其實係訓唔到…因為真係太緊張 …..訓2個鐘都冇就出發去維園.
5:20AM順利去到維園, 換衫, 寄行李, 真係好多人…..去起點前, 做足拉筋, 雖然左膝頭痛已經冇乜, 但始終有D 擔心
….跟住6AM出發…..去到熱身區, 左膝頭冇痛..但右小腿好緊 …唔通會出事? 即刻拉多幾野……
時間好快到6:30AM, 起跑了,
前面的人慢慢行了….過了起點, ,,,開始跑了….
始終驚自己膝頭的痛..好驚完成唔到10 公里,只好慢慢跑, 自己預計1 小時30 分鐘應該可以完成吧…
跑左1KM, 用左七分鐘(好慢, 對不對), 腳的感覺良好….再慢慢跑..但期間都要閃避好多人, 去到4KM, 第一個水站, 感覺都仲幾好…始終擔膝頭的痛KEEP 住大約7MINS/KM 的速度…應該可以完成吧…如是者慢慢走….到了8KM 的水站, 飲了水, 發覺自己的膝頭冇痛! 未夠一個鐘..我自己都唔信…我可以一個鐘跑到8KM
見仲有2KM, 試一下..跑快D!….對腳都仲OK! 跑呀跑….去到東廊落橋….見到最後1KM 的 指示…終點在望! …再上最後一條橋..開始見到打氣的人了…..自已跑呀跑…..見到終點…..時間係1:10:XX……
跑到了!!!
我終於跑到10KM! 完成左一生人的第一個10KM !
比我自己預計的時間快左好多!!! 跑到終點的感覺原來係好滿足…好開心!
下年我一定會再參加…… 今年的準備一定要做得更好….
寫得太多了, 寫得唔好請見諒! 
..
|
+1
0
上一篇︰KKF 的跑步日誌下一篇︰不止十公里•山比遊樂blog
|
[複製鏈接]
發表於 2009-2-19 18:04:17
收藏
分享
Like
Unlike
分享
樓主
