|
毅行訓練紀錄:
訓練3:(5-6-2010,麥徑5-8段,出席:大雄、wty、哈利)
今日哈利如果唔係成日要等同埋就住我同wty兩件騎呢嘢, 肯定5個半鐘有找攪掂. 我哋三人(iceberg因落雨缺席)最後用咗6:26完成全程, 比預計的6:20多咗6分鐘, 主要原因係成日影相及成日休息, 不過又真係影得好過癮! 以下係今日既賽後報告: (下列時間已包括所有休息, 去厠所, 賣飲品, 影相, 抽筋, 拉筋, 聽電話, 食嘢, 蕩失路......等)
1. 由黃大仙地鐵行上麥徑5段沙田凹入口作熱身
2. 麥徑5段沙田凹入口 - 大埔道 (約7k) 1:24
3. 大埔道 - 城門水塘 (約4.6k) 0:42
4. 城門水塘 - 鉛鑛凹 (約6.2k) 2:10
5. 鉛鑛凹 - 大帽山荃錦公路 (約9.7k) 2:10
(全程約27.5K)
哈利今日全程冇爆, 我同wty就照舊爆到七彩, 佢抽小腿, 我抽大腿(因星期三衝完2k及200m對腳的肌肉超酸痛, 乳酸三日都散唔倒, 加上唔記得帶食物, 所以上針山已開始抽) 當時離遠望住大帽山頂, 心諗仲有咁多個山頭, 點捱到上去. 於是攞出秘密武器 - 鹽餅, 啪咗之後果然有效, 但捱到就嚟到大帽山頂時, 終於二人抽到行都行唔到, 要超慢速步行加上不停拉筋先上到山頂, 但落山都繼續抽, 不過好在冇咁勁, 最後終於落到荃錦公路, 三人衝去士多大吃大喝, 渣住飲品慶祝平安完成全程. 今次真係好攰, 三人回程時起地鐵度瞓到流晒口水, WTY仲伏咗起哈利個肩膀上一路瞓一路傻笑, 應該係發緊一個好甜美既夢! 哈利件衫就當然濕晒啦!
今日有個大發現, 原來哈利d EQ真係超勁, 是一件超級毅行好腳, 傍住我哋兩件騎呢嘢都能夠發輝毅行精神, 沿途表現出忍耐, 體諒, 扶持等崇高情操. 起鉛鑛凹開餐時, 睇住哈利咬住個好美味既面包, WTY食住個蛋, 個肚餓到咕咕聲既我口水流到完全控制唔到, 就起喱個時候, 哈利攞出佢唯一既兩包GEL既其中一包比我食, 我開心到幾乎連鍚紙都食埋, 後來佢仲起WTY爆得最勁既時候比埋另外果包比WTY食, 攪到好少喊既我都......哈利我愛你(喱句係WTY講既)!
[ 本帖最後由 大雄2009 於 2010-6-10 23:18 編輯 ] |
|