啤啤的跑步日誌之第二章～廣州馬拉松

arvid

https://www.facebook.com/groups/www.longrun.hk/permalink/540499393133858/

啤啤的跑步日誌之第二章～

今年廣州馬拉松終於成功報仇：3:03:14

2014-11-23：3:45:52（估計早餐飲咗豆漿出事，25k要入廁所 + ITB痛）
2017-12-10：3:48:42（渣打馬拉松後一直受傷無得練，老本唔多，差啲跌出4小時外）

無記錯應該係今年5月28日做完推拿之後，傷患開始好轉，亦可以開始跟返訓練。

但無跑成年，心肺體能速度都一落千丈，唯一上升嘅只係體重，4月份竟然去到77.7kg。

之後有新丁班前進師兄和其他師兄師姐指導和夾住操練，慢慢地開始上力，體重亦喺比賽前減至69kg。

之前報咗創新競走10k試時間，可惜因為自己嘅比賽經驗而搞砸了，綠色半馬又臨時取消咗，所以對於今次廣州馬拉松有種患得患失嘅感覺。

每次跑馬前都要食咗飯先，今次都唔例外，三點半起身，用帶嚟嘅電熱煲加熱飯，食到熱飯成個感覺完全唔同晒。

今日氣溫9°C，微雨。每年廣馬都熱到爆廠，今年真係有晒「天時」。

廣州賽道算係比較平坦，「地利」都可以叫做齊備。

比賽前一星期去做推拿，結果按完之後全身酸咗兩日，最大鑊係，唔知點解每次慢跑完內收肌都酸痛。

之前日子嘅操練，我應該要有信心，只係長課唔夠耐力爭啲啲，但目標3:05:00應該無問題，在於臨場發揮，不過始終有啲擔心內收肌情況。

乘搭長跑網車去到會場已經6:30，距離起步時間只得返1個小時。有上年經驗，已經預先熟讀行李車位置，一落車見到半馬行李車，知道舐嘢，全馬行李寄存係喺會場嘅另一邊，就即刻出發。由於唔可以喺會場中間穿越，只能沿住外圍，冒住大雨向人群嘅反方向不停向前走。寄存好行李，經過安檢，入到起跑A區時間已經所剩無幾，人群已堆滿喺起跑線前。

鳴槍後，足足用咗36秒先經過起跑線，有上次10k賽經驗，預先喺手錶set咗最高及最低步速警告（4’10”同4’30”），但頭兩k人多路窄，只能維持大約5’-5’30”左右，一直跑到較寬闊路面，先至開始加速。

預先將印好咗嘅3小時配速帶戴喺手上，5k過去，比預定時間慢咗2分幾鐘。唔心急去追，嘗試提速到4’10”，首要追返310大隊。

10k過去，腳仍然無乜異狀，呼吸暢順，體力仍然充足，信心大增，只係仍然未見310大軍。

過完15k水站，喺16k終於追過310，精神為之一振，繼續順住去嘗試搵返300大軍。

終於，19k左右，喺對面線見到300大軍，但估計有1k距離，計算要喺餘下嘅半馬要加快4分鐘追上300大軍有啲冒險，決定放棄追趕，保持圴速跑返自己。

經過20k CP，時間1小時25分，仍然比配速帶慢1分鐘。

半馬過後，對腳都無乜投訴，有少少攰，但一轉返以前唔抬腿嘅細密步跑姿，步速馬上跌出4’15”，用咗一陣俾四頭肌休息吓馬上抬返腿跑。

30k開始覺得攰，但一諗到今次有晒天時地利，分分鐘下次再無咁好彩，咬一咬牙又提速捱落去。

去到34k左右，應該又係我衰靚仔，有條粉皮無啦啦走埋嚟同我貼住肩跑，又不停同我講嘢，我終於頂唔順答佢一句「我聽唔明」，佢仍然繼續貼住我跑，極度唔慣同人貼到咁埋，慢返少少提早35k食gel由得佢過我，呢個時候隻錶響，顯示：Low Battery。

37、38k上橋位前停咗架救護車，前兩次都喺呢個位置停低，有少少陰影，但今日似乎狀態ok，沿住橋一直跑上去。

去到40k，隻錶第二次響，我心裡面講：今次我可能係最好時間嘅一次，幫我頂埋佢呀，同時感覺四頭肌開始有啲異樣。

過埋41k牌，見到前面有3隻拱門，一想提速右腿四頭肌即刻抽筋，停低10秒之後，感覺消失，再唔敢加快，只係用返馬速繼續跑。

準備衝過3隻拱門，離遠望到個牌寫住仲有500m，心入面乜嘢粗口都想爆出嚟，望返遠啲，真係見到終點喇。

終點大鐘已經顯示03:03:20，最後喺03:03:49衝線，想㩒錶但隻錶唔知幾時原來已經熄咗。

返到去，馬上攞返行李，就走去攞即食麵、食雪條、刻字⋯⋯

坐低食麵嗰一刻，隻腳立即抽筋，抽到我想大聲叫出嚟⋯⋯