|
今日玩完壞人同盟試玩團後, 終於親身體驗到乜嘢叫做跑山, 頭段10k用咗五十幾分鐘, 一路跑一路諗原來毅行速度係咁快既, 幾乎等於我的半馬平路速度, 心想唯有跟到幾多得幾多, 終於未到北潭坳就同wty ching齊齊爆咗, 幾乎兩段都玩唔晒, 真係失禮.
原來壞人隊長係好好人既, 沿途貼身照顧我哋兩個初哥, 等完又等, 幾乎想幫我哋揹埋背囊, 仲連自己條膝帶都借埋比我用. 最後到赤徑時我哋兩個發覺同三位高人的pacing實在相差太遠, 於是求隊長放過我哋, 隊長責任心重, 極不願意拋低我們, 但我對他說我們兩人有照應, 又熟悉那段路, 並將會於北潭坳退出, 最後他才放心離開我們, 快步追趕馬王及batbat, 讓我們二人hae跑完成第二段. 小弟在這裏要再次多謝隊長的照顧! 並承諾會努力練習上斜, 日後再參加壞人同盟練習. |
|