|
8月14日 星期六 天氣OK熱(市區最高氣溫31度) 操麥徑3段至獅子亭 Part II
因為3段分左兩截走,同埋賓哥因為俾鞋玩水浪窩切左,所以要分兩個小報告~~
事前日本仔話想試下走三段走快D,所以一起步就跑上石級,賓仔話奉陪,30秒後就剩番我同未訓醒既韓妹...
頭段韓妹因為仲同周公傾緊計,慢左少少,上左一半牛耳速度開始正常番~~
太陽伯伯一直睇住我地,風哥哥就潛左水,未係好醒既韓妹對住太陽伯伯又開始扭計,牛雞之間嗌辛苦,有時慢走,o岩o岩上雞公時直情想停咁滯...
好在上上下太陽伯伯行歪左少少,韓妹又可以走番正常速度~~
順利上到雞頂就即刻jog 落山,走走下我口多話未帶膝帶,韓妹話一定要帶好先可以落山,又停左1-2分鐘,可惜搵唔到,相信條跟左我年幾既膝帶從此流落左晌麥徑,祝佢以後生活愉快~~
停完之後韓妹窒左道氣,慢慢走埋果大半K,落到去時間都唔太差,1:48~~
見到灘到凍晒既日本仔同賓哥已經準備定相機等我地,原來佢地既時間係1:24 同1:33,咁鬼熱,crazy...
可惜賓哥因為新鞋刮腳起左泡泡,但佢仲堅持要繼續,我同其餘三位隊友仔為大局著想,將佢踢走左,個個星期都有山操,無謂要對腳仔受D 無謂傷害~~
阿芝阿佐,唔覺唔覺抖左十幾分鐘,日本仔,韓妹同我劈低左賓哥繼續行程,太陽開始落山,韓妹繼續帶走,大家速度都keep 得幾好,幾順暢,無咩好講~~
出到last 石屎路,我沉睡左兩星期,今日算做狀態好D,見日本仔劈完個M3,韓妹又爆完黎,諗住自己跑快D 衝落去,點知佢地又跟到喎,好快就劈到去餐蛋麵,原來 last 1k 只係用左4min...
總時間4:43 連休,總算快過上次~~
一去到豆腐花店就開始最後一關--胃口測試,日本仔同韓妹一入去就整支"紫xxx",我就攞左支豆漿,日本仔再黎一碗豆腐花,然後黎一個round 餐蛋麵,日本仔好似倒落個肚咁,食完仲想食菠蘿冰,老細唔肯賣俾佢先至作罷,測試滿分; 我就為左攞高分,搶左韓妹半碗餐蛋麵食,合格; 韓妹就一粒米食三餐,又話唔中意食公仔麵又盛,勉強食晒半碗,唔理咩理由,fail~~
|
|