特步大派定心丸 新一年跑衫設計保證唔會嚇親大家

bunbun

蘋果日報 2013-12-23

中環在線： 特步贊助不離馬拉松        
李華華

一年一度嘅渣打馬拉松，出年2月又嚟喇，強國品牌特步（1368）連續三年成為服裝贊助商。不過，對於特步設計嘅跑衫，相信唔少跑手都猶有餘悸，事關第一年綠襯藍嘅史力加裝，實在太深入民心！

提起呢件事，特步首席財務官何睿博就大派定心丸，話已經順應民意，將綠色含量減低，新一年設計保證唔會嚇親大家，佢仲賣花讚花香，話今年第二年贊助港大馬拉松隊隊衫，隊員都好滿意個設計咁話喎。

何睿博仲話，特步要喺強國品牌中突圍而出，打造跑步產品龍頭形象，除咗渣馬外，過去一年喺中國已經贊助咗逾十場國際性馬拉松，嚟緊仲會全力催谷鞋類產品，希望未來佔比可以去到一半。呢場品牌比賽絕對係一場超級馬拉松，唔知特步夠唔夠氣跑晒佢呢？