|
|
毅行十卜心聲 -- 濛
由一開始應承屈老(我記得當日我既回覆係"如果我重未比人炒既話, 我就一定會幫手做十卜"其實當時我連毅行係做乜都唔多清楚), 再到就濛查查做左 A 隊十卜, 再由司機變成十卜隊隊長, 其實我一直都係咁濛!! 而家回頭再諗, 都依然有D濛濛地, 哈哈!!
24 /10 分組完成後, 我便一心諗住依靠曲奇做好預備功夫(除左我懶之外, 其實佢上年已經做過十卜, 有經驗). 8/11 前往各個CP視察, 認好哂所有需要十卜的據點, 心想我的任務基本已經完成. 但當收到曲奇未能全程十卜的時候, 心裡實在晴天霹靂, 一直都無上心既我即時調整自己既定位, 將整晚的行程在腦中預演一次. 那裡買飯...那裡接人...如遇甚麼情況該用甚麼策略....可惜日頭份工工作量突然增加, 而自己夜晚亦要返第二份工, 所以去到毅行前都未能負上隊長應有既責任.
毅行前的一星期內, 每天都與曲奇保持聯絡, 其實一直都好擔心當晚會出任何亂子, 引致影響 A 隊的進度, 幸好曲奇一直派定心丸給我, 才不致引發精神錯亂. 在這一星期內她還精心為隊員及十卜隊列制物資表及行程安排, 甚至代我向各個隊員或十卜成員查詢問題, 在此真的需要由衷的向佢講聲多謝.
19/11 晚上私約曲奇到港島某處(作為長跑網既成員, 當然要以跑會友, 響執野之前都同佢私奔左十幾K, 並且比佢扯爆左 =.=)整理各個成員的行李, 為屈老購買藍色難飲水特, 再向各個十卜成員作最後召集. 做好所有預備回到家裡上床睡覺的一刻, 床邊的鬧鐘的時針已經指著3字了.
20/11 手執車匙既我, 靈光特然一閃曲師妹前一晚所講既說話"果幾枝藍精靈會唔會漏架?" 真係好既唔靈醜既靈, 果然三枝藍精靈當中, 有兩枝漏到亞力士個袋一袋都係(呢件事我到行完毅行都無勇氣同佢講), 即時拿拿臨連袋帶樽去沖洗乾淨. 相約 EE 於荃灣會合, 與 B 隊支援一同於茶餐廳閒聊過後, 便開始到惠康入貨, 杯面...水特...古古力...清水...湯丸..............盡情購物之後, 便與 EE 前往彩虹邊嘆茶邊等曲奇, 時間一分一秒過去, 曲奇以及 EE 的兩個朋友都已經齊集彩虹, 接著便向十卜第一點 CP3 進發.
到逹水浪窩, 一陣陣的寒風吹過, 但都沒有嚇到各個成員, 即時將所需物資缷下, 時來運到之下居然比我等到一個標準既泊車位(唔洗學柏爸咁, 冒住比人拖車既風險之下泊好架車). 上到去公廁旁, 見到好心急既神童及B哥哥, 聽佢地講 B 隊將會好快到步, 心裡即時興奮起來, 再等多大約二十分鐘, A 隊首位成員力士亦都到達, 上前鼓勵一翻之後, 勝哥亦都抵步, 我先將兩人帶到 EE 霸佔既十卜據點, 再奉上仍有餘溫既叉燒飯, 當二人食左半個飯既時間KOPO同屈老亦都到達, 屈老當時好似已經無左半條人命, 於是我便為屈老獻上今次毅行首次京式按摩, 按摩過後無耐, 便上演了百年難得一見既經典節子戲"勝哥怒喝勿食飽, 屈老淚目喊大快", 一輪擾攘之後 A 隊再次踏上征途, 而我們三人亦於赤子隊伍食飽後離開 CP3, 向沙田出發接載鬼影, 之後再到荃灣晚飯.
半夜兩點既城門水塘, 寒風加上低溫, 實在令熱血生物既人類驚怕, 與各位十卜隊員找到一處比較細風的位置, 便開始烹調薑茶, 經過大半個小時, 整煲薑茶亦已經到達沸點, 再向力士查詢 A 隊的位置, 回覆是仍需要個多小時才到達城門, 固此各人亦都同意放下薑茶, 回到車內暫避寒風. 吹吹水看看書過了好一陣子, 終於收到力士快將到達的訊息, 一心諗住再著爐火為薑茶再度加熱, 可惜由我外母借出的GAS爐終不敵天冷(返去唔知點交代...><), 成為是次毅行的第一捐軀者. 由於力士所報告的時間出現太大的差距, 以致未能在此十卜點奉上溫暖的杯面, 而我們一行約十人, 亦响 A B 隊相繼離開此地後陸續離開, 此時我再將車子駛到荃灣, 稍事於車內休息及待高佬上車後, 便飛車往大圍接載法蘭.
七點多既時候, 我們便順利進入大霧山大會支援泊車場. 由於我們的GAS爐已經壯烈犧牲, 所以便向 B 隊請救為我們煲水煮面, 等呀等望呀望, 終於等到 A 隊所有成員到達, 我地幾個十卜成員全數下車讓出暖暖既車廂, 給各位隊員安坐車內食其早餐, 當我於車外偷看屈老的表情, 知道他已經盡了最大的能力, 但自私既我絕對不能夠比佢就此放棄, 只可以响佢面前不斷送上鼓勵既說話, 時間一分一秒過去, 再次出發既時間已經接近, 我再行到屈老面前, 送上多句鼓勵的說話, 便目送他們再次出發, 其時我既眼睛, 其實已經流了一滴眼淚, 當然作為男子漢既我, 點可以比大家見到呢, 哈!!
離開大霧山, 放低 EE 及曲奇, 與鬼影在等候瘋瘋的時候, 談及高佬與法法從未走過第九至十段的新路, 恐防 A 隊會迷路, 所以便決定於掃管笏再次送鬼影上山, 讓他於山上與 A 隊再次會合, 而我與瘋瘋亦按計劃前往毅行終點--大棠. 於山腳接到拍爸來電, 大棠內車位充足, 於是我便與瘋瘋在山腳的茶餐廳先享用早餐(呢餐並由瘋瘋找數, 在此向瘋瘋謝過), 再上山進入大棠保良局渡假營.
於終點前守候, 其時亦不敢再次致電力士, 以免影響他們的行程, 好不容易才等到 A 隊的首位成員勝哥到達終點, 之後再等多約十五分鐘, 我所期待既屈老終於都出現我的眼前, 此時我的喉嚨雖然已經隱隱作痛, 但都不由自主地高呼起來, 結果 A 隊以廿二小時十多分鐘完成是次毅行.
由於小弟墨水有限, 令到文章有D雜亂無章, 敬請各位見諒. |
|
[複製鏈接]
發表於 2009-11-26 13:44:46