|
|
本帖最後由 rockiec 於 2014-1-2 15:09 編輯
記首屆深圳大鵬新年馬拉松
前日約咗馬拉兄一齊入去, 再到羅湖等埋其他人, 居然都有成四﹑五十人,
好墟埳!
雖然要排隊搭公車, 又要轉車, 但都好快到咗大鵬灣, 跟住攞房休息,
其他人去咗視察場地, 我地就瞓晏覺, 1800先至一齊食飯,
八餸無湯, 白飯任裝, 每人人仔60蚊, 都算抵食! 見仲有時間,
又齊齊去shopping!
差唔多2100, 返番賓館攞跑手包, 點知等到2230都未見有人送嚟,
大家都係早啲抖, 明早再攞! 我同馬拉一間房, 大家都好快瞓著,
但自己無嗱嗱點幾鐘醒咗, 仲見頭暈頭赤, 唔知乜野事, 跟住瞓唔著,
捱到三點幾, 竟然嘔吐大作, 頭又暈, 個胃又唔舒服,
心諗第二朝賽事又要泡湯... 飲咗啖熱水試下再瞓, 都係瞓唔著,
到五點幾先至瞌著, 但六點和兄morning call, 話有得拎跑手包,
仲嘈醒埋馬拉, 原來佢尋晚都瞓得唔好, 俾我嘈醒咗, 真唔好意思!
仲同佢講今朝自己狀態極差, 頭暈兼胃唔舒服, 又唔夠瞓,
多數跑唔晒, 可能要上收容車番嚟, 唔駛等我!
拎到跑手包番嚟, 有少少驚喜, 睇得出大會好有心, 唔止有指定東西,
仲有輕便雨衣﹑消毒膠布(乳貼)﹑凡士林同埋利士封! 非常齊全!
搞掂之後, 嗱嗱聲上去餐廳食早餐, 因為餐廳開0700, 好多跑手驚食唔切,
無嚟到, 我同馬拉係第二﹑三個入嚟, 雖然款式簡單, 只有白粥﹑
炒麵﹑咸蛋﹑雞蛋同醃菜... 但澱粉質豐富! 可惜自己無胃口,
食唔多, 馬拉就食到頂晒胃!
0710出發去起點, 氣溫無想像中咁凍, 都有12﹑3度, 而且無風,
應該好好跑, 可以PB添! 原來今次大會實施安檢, 只有兩個進出口,
好在尋晚踩過場, 知道位置, 好快通過安檢, 抵達會場,
但就搵唔到其他人, 咁我同馬拉兩個自行熱身﹑上線﹑拍照!
今次大會居然又學足香港渣馬一樣, 安排咗精英區起步,
凡時間响+400, 都可以進入精英區, 但港澳同胞似乎無呢個安排!
要自己搵位攝, 不過我地都攝到第一排, 响精英區後面!
大會亦安排唔少兔子(pacer), 連裝扮都係兔子, 有男有女! 好易認!
由315到600都有! 領導人長氣, 說話太多, 要遲三分鐘先至起跑!
我同馬拉應聲彈出, 而且配速唔慢, 頭5K接近4'3X", 相當快!
咁跑法隨時PB番嚟, 但自己知自己事, 咁跑法好快上收容車!
但馬拉就越跑越有, 第6K開始甩咗我, 唯有一個人自隊, 為咗穩陣起見,
都係調整到4'4X"~4'5X", 睇餸食飯!
發覺沿途水站好多, 差唔多2K就有, 唔止水, 仲有水特,
22K回程仲有香蕉, 好體貼!
跑到第12K, 自己開始覺得散散地, 朝早又無乜野落肚, 個胃又唔係好妥,
真係隨時要跳上收容車, 但15K上下, 330兔子上咗嚟, 仲有成班人,
大約七﹑八個, 一於跟住佢地, 起碼有人配速﹑擋風, 唔駛諗!
走走下發覺呢個兔子真係好好, 會提點大家邊度留放...
原來佢尋日特登走咗一轉, 而且又會提大家邊度補水﹑補能量膠﹑
邊度係撞牆區, 沿途係咁解畫, 真係專業! 就係咁跟到28K!
其實果七﹑八個跑手都散散地, 開始跌watt, 自己仲keep到配速,
於是甩咗330兔子... 居然見番阿娟(內地國家級跑手)响醫療區跑出嚟,
明明見佢轉折位, 大家相距起碼兩﹑三K, 肯定出事! 原來佢腳傷,
已經跑到拐拐下, 所以入咗醫療區療傷... 同佢跑咗半K,
結果都係要停低繼續行! 真係可惜, 咁就變咗係莫紫X嘅天下!
自己又繼續孤身上路!
去到33K, 要食第二包能量膠, 呢個時候俾330兔子﹑和兄﹑
堅哥同樂華師兄界晒, 相當絕望... 到35K, 真係現形啦, 開始跌watt,
跟住見到兩架收容車經過, 仲有吉位添, 都諗過上唔上車...
其實剩番7K, 就算hea住走, 335點都番到嚟, 一於縮短腳步,
調快步頻, 密密咁走! 吓! 配速居然可以keep 住5'3X",
都唔失禮!
最後兩K, 阿娟忽然界咗上嚟, 仲越走越快, 可能捱過咗痛苦時刻,
轉眼唔見人, 配速應該係4'1X"!! 最後1K, 居然見番330兔子,
於是望下手錶, ~3:22'XX", 真係喜出望外, 仲有機會可以sub330喎!
差唔多500米, 同佢平排, 真係好感激佢帶我番嚟, 跟住就提速衝番嚟...
用時3:29'3X", 真係好開心, 不但唔駛上收容車, 居然仲快過澳馬一分鐘!
雖然賽道有多個地方有上﹑下坡, 但坡度唔大, 只要平日稍稍練過斜路,
一定無難度!
番嚟又有保暖鋁質foil, 個紀念章又好有特色,
而且仲同我掛咗個"C組男子組"獲獎封套, 心諗我呢個時間都有獎?
會唔會攪錯呢? 跟住拎埋福袋, 裡面有三文治﹑香蕉﹑香腸... 相當有份量!
跑族又安排義工煲咗幾煲熱辣辣嘅薑茶, 好暖胃, 啱我!
再同堅哥﹑和兄﹑馬拉吹水, 原來佢地個個都PB, 個個都有獲獎封套,
淨係見到識得嘅都有6﹑7個... 但獎項得6個, 會唔會係流料嚟?
果然, 六個獎項有四個係內地跑手, 香港跑手得兩個, 堅哥同陳海X,
其他都係咖哩啡, 空歡喜一場! 不過馬拉兄真係第七名, 樂華師兄第八兄,
和兄第九名!
忽然諗起菖蒲兄, 本來佢都有報呢個賽事, 可惜因傷缺賽,
否則大家又會一齊跑, 你追我趕, 一齊PB, 相信名次會响10名內!!
講咗咁耐, 其實係話呢個賽事真係玩得過, 無特邀跑手,
全部係內地業餘跑手+港澳同胞, 好有競爭性; 又有分組, 又有獎金,
相當和味! 全場男女子頭兩名仲有得去波士頓馬拉松, 唔駛抽簽! |
|
[複製鏈接]
發表於 2014-1-2 12:07:49
發表於 2014-1-2 12:16:41
)
樓主