渣打馬拉松只值廿蚊

bunbun

http://www.am730.com.hk/column-181673
am730 2013-11-15

渣打馬拉松只值廿蚊         
園丁

繼引入強國品牌「特步」後，今年渣打馬拉松「再獻新猷」， 頭一百個買夠廿蚊Snickers朱古力，然後WhatsApp收據的顧客，可免費得到價值300蚊的10公里參賽名額。當你7點起身上網，坐在電腦前苦等幾小時報名，翌日才發現原來鬥快買朱古力同樣可以參加，還可以省回280元，為了報名而冒著詐病曠工被炒的你，會否與王維基一樣憤怒？

預留名額給贊助商沒有錯，但歐美日本的賽會，肯定不會像渣打般自我作賤，讓贊助商以跳樓價的廿蚊雞，把爭崩頭的賽事名額如水潑出去，而是把參賽名額用在更有意義的地方，例如為慈善機構籌款，或招募長跑隊伍並提供訓練，提升品牌的檔次。朱古力賽會用咁cheap、咁低水平、咁無意義、兼得罪一眾7點起身跑友的方法派膠，證明搞手都認為：「渣兜最多值廿蚊雞。」暗寸俾300蚊參加就真係傻仔。

辦馬拉松的目的，並不是為了賺錢、不是為了一項例行公事、不是為了給梁特和禿鷹鳴槍、也不是為了少數跑者拼時間、更不是為了人數年年創新高，好讓金主洪丕正繼續呃細路說：「渣打馬拉松超越波士頓！」而是讓馬拉松彰顯人性的真善美，把天堂帶到人間，讓86歲的老婆婆跑手覺得死在路上也不錯。

幸好，香港仍有一些有心人願意踏出第一步。明年3月，觀塘鬧市將會有一個別開生面的路跑，容我引述搞手之一、來自財經界的張亮所言： 「到那一天， 當我們不再認為辦跑步比賽只是為了少數跑者的快樂，而是幫助青年、社區的一個管道，是社會展現慈悲和創意的一個平台；當我們可以在香港每一個社區引領青年人跑步以改變命運，在每一個社區舉辦賽事帶來正能量，到時我們就可能真正做到了領世界之先的全城街馬！」

比賽的詳情，下次再跟大家介紹。

tango

真係想講粗口，咁樣歪曲都得既，依家俾20蚊買排朱古力睇下有冇得跑，贊助商俾錢出黎都係想搞下宣傳，咁都眼紅?

hiuchung406

我覺得筆者有抽水成份。果100個位只係比10公里而唔係半馬或全馬。咁寫係話埋早起身報全半馬果班都係傻仔?

leehyalbert

hiuchung406 發表於 2013-11-15 09:07
我覺得筆者有抽水成份。果100個位只係比10公里而唔係半馬或全馬。咁寫係話埋早起身報全半馬果班都係傻仔?  ...

我又覺得唔係喎! 果100個位雖然係10公里, 但係和半馬全馬一樣原價係要300大元, 拉埋全馬和半馬來講係誇張左!

但的確對一早起身報10公里既人係不公平喎!

hiuchung406

leehyalbert 發表於 2013-11-15 09:23
我又覺得唔係喎! 果100個位雖然係10公里, 但係和半馬全馬一樣原價係要300大元, 拉埋全馬和半馬來講係誇張 ...

其實我又覺得, 呢100個名額, 當係一個bonus又好, 遊戲又好，只係100個名額，而且係用贊助商自己既名額，有咩問題呢。值唔值得筆者以傻仔形容早起身報名(無論成功與否)既人呢? 個主題仲要係講到好似成個渣馬，無論係報全、半定10公里，渣打馬拉松都只值廿蚊   。

如果如筆者所講，為了報名而冒著詐病曠工被炒的你，呢個就係報渣馬同比人炒既機會成本問題。

wlau

leehyalbert 發表於 2013-11-15 09:23
我又覺得唔係喎! 果100個位雖然係10公里, 但係和半馬全馬一樣原價係要300大元, 拉埋全馬和半馬來講係誇張 ...

我又唔覺得有幾唔公平.. 好似世界盃咁.. 屆屆D 人都搶決賽門卷, 又係個個要衝入個網買, 但差不多屆屆可樂都有決賽門卷等你玩遊戲拿..唔通咁又唔公唔平?


見筆者講, 下年三月有個別開生面既比賽, ... 但如果佢係有跑開步, 要有意義, 要別開生面既跑步比賽, 由現在到下年, 根本都有唔少選擇, VTP, 聯合國兒童基金慈善跑, 海洋公園慈善跑, 清水灣10公里等........ 我真係好懷疑筆者自己都唔知有無跑開步既人.. 會唔會又係年跑者, 有渣馬先突然係專家果D 人...
佢俾我既感覺, 自己爭唔到門卷, 就將一D 本身唔係問題既事, 無限放大..

CRE

佢個專欄叫繞著世界跑, 可能佢真係冇玩過其他本地賽都唔奇

patcochoi

這些文章,不用認真看!