2014.10.02 殭屍路跑 Run for your lives @ Hong Kong

dcdc2004

睇番 facebook 留言, 大會比人插到開花.  

bunbun

https://www.facebook.com/video.p ... ;type=2&theater

我係賽道上負責監察zombie 的工作人員，同時係一位義工，唔收錢既。

大會今次E個 Event 賺左400幾萬，不過場地隨左入口既廣告之外，咩怖置都無，D野好兒戲，岩小朋友玩。

第一，選址其實唔錯，有大草地，但點解要係石屎地做zombie zone?

好多，係極多人係走避既時候跌到爆哂江，人踩人，骨折，D真血滴到周圍都係呀，個負責人就係架離卡卡咁笑! 而且大會請來既First Aid 完全無幫手，不肯行出佢地既位置「個度有人骨折呀!!!」「下，我地唔會離開急救站架wo，你叫佢行唔行到過來啦」個下真係忍唔住屌佢老母，佢地仲要係staff來架!

PS 急救站有人同我講，佢係唔識急救，話過來只係幫下手，「癡塊膠布唔洗牌啦~」

我地每個point 唔係得一明人手架，仲有大會請來既保安，負責執行場規，當有參加者發生踫撞，去分開佢地同埋中止佢地既參加權利，但sorry ，佢地咩都無做過，眼見有人打交，踢人，推人，佢地話「人地比左錢就唔好唔比佢玩，算數啦」，佢都唔幫手，我完全係咩都做唔到!

有參加者Zombie向我投訴，佢地被放入場區，但無人話佢知要企邊，而當佢地問負責人(新加波人)的時候，反被佢大罵，話佢地咩都唔知就入來，無規無舉，事實係我地工作人員都唔知，大家都忙於奔命

活動組織及安排粗糙得很，參加者付費得不到像樣的服務，而大部分維持活動的人，也是付費協助；即是等同一個自行組織的細型團體，只負責事前準備工作和收費，活動時就由你地兩個parties、俾左錢個班人自己搞掂佢

大會有道聲名，將『最主要的問題是昨日超過250名志願者未到場』呢個理由放在第一，顯然是強調大會自己有危機意識，但無諗過你地會咁多人甩低，話多人甩底搞到大會做唔到野，你都只係想話係參加者問題架啦，與大會無關架啦！完全是不負責同無恥的答覆

成個event 由開頭報名，去到每一part，係每一part 都係咁亂，我都唔明ActionX 係世界搞咁多場，香港場真係差爆，不能接受.....

kanokanok

bunbun 發表於 2014-10-3 13:41
https://www.facebook.com/video.php?v=471778866297549&set=vb.394053597403410&type=2&theater

完全認同!!!!!

gxchen

我也掛了彩

bunbun

https://www.facebook.com/rfylhk/ ... ?type=1&theater

《閃避回應不滿，贏得價值HK $6,000,000之港人血汗》

得獎結果公佈！

在眾多參加者不滿下，大家都能憑被玩、排長隊和暴曬想到如何受到一個高利潤和多厚臉的on 9 單位。太利害了！ 恭喜* Run For your Lives Hing King *贏得港人血汗價值港幣$6,000,000的革命性新遊戲 。 我地會將不滿詳情通過Facebook 通知香港人。請想玩既朋友留意。

（ 注意：喪屁有機會再次出現，把你的真實傳送到 Facebook , 損失者多加注意）！

bunbun

bunbun

壹週刊 2014-10-09

ZombieRun貼錢買難受         

近年香港人對跑步的熱愛有增無減，人人都話報渣馬，至少都要跑5km，咁先夠健康。

來自美國的障礙式跑步賽「Run for your lives」（俗稱喪屍跑），首次喺香港舉行。適逢踏入十月，可以化妝做喪屍，乘機當係萬聖節前哨戰扮鬼扮馬一番。有得玩當然開心，不過幻想總是美好的，在終點聽到的都是參賽者的怨言，玩完似乎仲唔開心，大呻貼錢買難受！

排兩個鐘曬到暈

活動由朝早9點開始，不過真正人流高峰期喺中午時分，有好多參賽者呢個時間嚟到，登記處已經要打蛇餅，目測起碼有過百人，登記都要排成一個 鐘，入到去放keep bag，因為安排混亂，又要排一個鐘，真係未見官先打三百，烈日當空無遮無掩乾曬，參賽者好多都已經無晒mood。賽事原本分好晒時段，預計6點玩完所有賽事，最後因為嚴重超時，5點都仲有成百人未有得玩。

玩半個鐘危險處處

5公里嘅賽道喺西九近海旁的跑步徑及一帶空地，每隔100至200米就有一個障礙或喪屍，目的係令到參賽者腰間的紅帶脫落。先講障礙，規模跟大學O' camp無異，轆地沙、爬繩網、車軚陣等等，好似去咗康樂營地，最好玩水滑梯，走上氣墊滑梯，滑下時有工作人員向你射水，三十幾度高溫下真係好爽。至於賣點喪屍，真係慘不忍睹。我必須稱讚各位年輕人非常「敬業」，以為自己企喺喪屍區，就真係喪屍上身，不停威嚇參賽者，表情演技交足戲，奈何化妝及服裝實在配合唔到，呢方面真係要請教吓海洋公園嘅專業人士。另一點係賽道的安全性，除咗跑步徑之外，大部分賽道都設在石地上，當參賽者經過喪屍區時，總會發生意外，見到救傷站有很多參賽者以及喪屍受傷，擦傷、跌傷甚至拗柴，救護人員都應付不來。最後必須要講，無論捉人定被捉的，都要俾$369至$659不等的參加費用，吓？唔係你俾番我咩？

玩完啤一啤

好喇，咁究竟點分贏定輸？參賽者玩完之後，如果身上仲有一條或以上的紅帶，就係生還者，可以有一個「survivor」嘅勳章；如果一條紅帶都無，就係變成咗喪屍，一樣有勳章，不過係「infected」，而且拎勳章之前會被懲罰─—向你噴吓水囉，That's it! Why so serious? 不如去嘉年華區飲番杯啤酒下火。嘉年華區設有大舞台，駐有DJ現場打碟，又有live band演奏，氣氛唔錯。除咗有啤酒之外，現場仲有5個小食攤位，唔係一般賣貴夾唔飽嘅junk food，有日式手卷、kebab等等，價錢雖然比一般貴，不過味道不俗，更加有攤位配合大會的喪屍主題，特製血包及針筒特飲，啱晒一班喪屍口味。玩足一日，聽到最多參賽者講的說話係：「咁就完喇？」係呀，曲終人散喇！

背景

「Run for your lives」源自美國，喺2011年開始，今年開始落地亞洲，之前已經去咗新加坡同台灣，第三站嚟到香港，比賽地點選址西九長廊。開始買飛後已經迅速爆滿，個個爭住做喪屍或被喪屍追。

玩法

好簡單，參加喪屍跑，首先你要揀，你想做「人」還是做「喪屍」？如果你平時喜歡睇鬼片、玩鬼屋，享受被人嚇被人追的快感，就要揀做「人」；至於做「喪屍」，應該係平時生活壓力好大，希望可以藉住扮喪屍，將憤怒發洩出嚟。喺全長約5公里嘅跑道，有多個障礙區及喪屍埋伏區，人類要拼命保護喺腰上代表生命的三條紅帶，唔好俾喪屍搶到，三條紅帶被搶光，代表無生命，參賽者最後如果仲有生命，就可以得到勳章一個。