林鄭「一哥」主持渣馬起跑

bunbun

明報        2015-01-05

林鄭「一哥」主持渣馬起跑        

2015 年香港馬拉松喺今個月25 號舉行，當中全馬賽事仲會由政務司長林鄭月娥及5 月屆退休年齡嘅「一哥」警務處長曾偉雄「鳴槍」主持起跑儀式。兩人分別係處理政改議題及佔中嘅主要官員，尤其一哥近期發表咗警察對示威者「慈母論」而為人關注；唔知喺渣馬呢個「大型群眾活動」，會否遇到跑手以另類方式表達對政改或佔領運動嘅意見呢，睇嚟Emily 當日要留意留意。

今年渣馬全馬及半馬起點喺尖沙嘴彌敦道，新增嘅少年組就喺灣仔運動場出發，12 至15 歲嘅中學生可參加全長2.2 公里嘅賽事，體驗一下馬拉松盛事。

除咗報名跑手積極備戰，本身體能一流、過往喺唔少長跑賽事奪標嘅懲教署職員亦唔輸蝕，今年參加渣馬嘅仲有唔少女將。總懲教主任周露明話，愈來愈多女職員參加馬拉松，並積極參與長跑訓練。其實懲教署有唔少長跑好手，懲教主任葉東海就係去年渣馬10 公里挑戰賽（紀律部隊盃）嘅冠軍。

周日跑馬地悼「葉伯」

講開渣馬，大家都會想起早前去世、曾經話過「跑到100 歲都要跑下去」嘅馬拉松年長跑手「葉伯」葉倫明，一眾長跑好手為紀念葉伯堅毅不屈嘅精神，會喺周日（11 日）下午3時於跑馬地練習場舉辦紀念活動。