渣馬沿途測空氣 實時公布污染度 三監測點 包括西隧

bunbun

星島日報        2015-01-19

渣馬沿途測空氣 實時公布污染度 三監測點 包括西隧        

本報記者

　　將於本周日舉行的渣打馬拉松，近年不斷加入環保措施，逐步打造為「綠色馬拉松」，今年更在環保署和多所大學協助之下，首次在賽事沿途設置三個空氣監測儀器（小圖），配合一直在銅鑼灣使用的路邊監測站，為當日參賽的跑手提供實時的空氣質素健康指數，以便衡量是否適宜作賽，所得出的數據亦會用作分析日後是否需要微調賽道。

渣打馬拉松的參賽人數近年增至七萬三千人，環境局副局長陸恭蕙在接受訪問時表示，近年注視到大型體育賽事舉行期間，容易產生較多廢物，因此覺得需要多做工夫，今年亦特別與渣打馬拉松籌委會加強合作，希望落實更多環保措施。

　　針對賽道空氣質素，籌委會在環保署和多所大學的專家協助之下，首次在賽道起點、半馬拉松賽事的折返點和過去一直被指有通風問題西隧賽段，分別設置三個空氣監測儀器，連同銅鑼灣現有的路邊監測站，將於本周日賽事開始前，向跑手公布現場的空氣質素健康指數（AQHI），以及溫度和濕度，並會每小時透過在賽道上的顯示板更新數據，讓跑手掌握賽道的實時環境。

　　陸恭蕙坦言，沒有甚麼科技可以改變比賽當天的空氣質素，但卻可以為跑手提供環境資料，讓他們決定「如何跑」或「跑不跑」。她形容，是次沿途量度跑道的空氣質素，做法較為全面及準確，「今次從頭到尾去做，是較為創新，世界不會有太多地方做得到。」

賽後可研究賽道走綫

　　她又表示，賽事完結後，專家還會仔細分析所收集的空氣質素數據，研究是否有需要為賽道走綫作出微調，讓未來賽事在更理想的環境之下進行，「現在每當提到要更改賽道，往往要得到很多人的支持，有了較硬淨的數據，會對將來有幫助。」

　　環保署高級環境保護主任雷國強坦言，在西隧物色合適地點擺放監測儀器，是頗為費煞思量，幸而是次由城大借出的監測儀器，特點是較為細小，有利於收集較為「貼身」的實時數據，經測試後亦確定與現時路邊監測站所使用的儀器效果相約。

　　因應沿途派發多達十三萬隻香蕉，賽會今年亦特別將香蕉皮回收桶數目增至十六個，另設三十二個膠樽回收桶，鼓勵參賽者支持環保。賽事籌委會主席高威林坦言，沿途回收香蕉皮是每屆賽事的最大挑戰之一，今年會繼續派專人預先剝掉蕉皮，以增加回收數量。賽會將與惜食堂合作，將比賽日多出之食物轉贈有需要人士，減少剩食。

無特別活動紀念葉伯

　　人稱「葉伯」的本港最年長的馬拉松跑手葉明倫，早前因病離世，儘管他生前曾是渣馬「常客」，但渣打馬拉松籌委會經考慮後，決定不會在周日賽事替他舉行紀念活動，只會尊重跑手的表達自由，不反對他們在影響賽事舉行之下，表達對「葉伯」的緬懷。

　　另外，賽會今年特別將十公里輪椅賽時限，延長至五十分鐘，路綫亦由原先經由大坑天橋，改為直接經由百德新街進入維園，路段較為平坦。至於大會今年首度增設的少年跑，讓十二至十五歲青少年預先感受馬拉松賽事，最終吸引五百人報名參加，賽道由灣仔運動場至維園，長約二點二公里。

bunbun

東方日報        2015-01-20

空氣差到冇朋友 渣馬盛事有隱憂        

一年一度嘅渣打馬拉松本周日開跑喇，本來呢，呢個活動搞得有聲有色，成為國際矚目嘅體壇盛事，係好值得高興嘅，尤其係佔領後百廢待興，渣馬仲有沖喜作用添。可惜美中不足嘅係，本港空氣污染嚴重，港府又減排無方，搞到跑手被迫做人肉吸塵機，點止醜死人吖，仲分分鐘可能跑死人o架。

嗱，可能環保署都知衰啩，今年首次聯同城市大學特別為馬拉松發布空氣質素健康指數，比賽當日會喺賽道設置四個空氣質素監察站，開跑前及比賽途中實時發放各路段嘅空氣質素情況。當局話喎，呢套指數同現有嘅空氣質素健康指數計算方法一樣，目的係為跑手提供數據，及早做好預防準備，量力而為咁話。

明眼人一睇就知，呢套指數話就話係為跑手健康着想，其實同免責聲明冇乜分別，擺明卸膊啫。講起都醜死怪，渣馬發生過唔少事故，繼○六年跑出人命後，三年前亦有一名跑手暴斃，仲有近四十人送院添。搞成咁，空氣質素欠佳絕對係原因之一。好似馬拉松終點站銅鑼灣咁吖，連日來空氣污染指標爆晒燈，當局唔係努力改善空氣質素，淨係一味提供數據，根本係本末倒置咋。萬一好嘅唔靈醜嘅靈，今年又再搞出人命，盛事變憾事，咁就大件事嘞。

冇計喇，港府搞環保不嬲大隻講，跑手惟有自求多福喇。冇冤枉o架，好似前年推出嘅新空氣質素健康指數咁，話就話取替沿用近廿年嘅舊指數，但標準寬鬆到冇朋友，莫講話跑輸世衞標準九條街，甚至連內地都不如。仲有呀，當局聲稱二○二○年要達到新空氣質素指標水平，點知又係翻兜更換柴油車、重組巴士路線等舊橋，來來去去三幅被，證明黔驢技窮。最諷刺嘅係，當局資助石油氣的士及小巴更換國產催化器，點知更換後廢氣不減反增，簡直愈幫愈忙。

講開又講，係人都知燃煤發電係空氣污染嘅元兇之一，當局增加潔淨能源比例無可厚非，最近仲拋出向內地買電同埋增加天然氣發電比例嘅方案畀市民討論添。不過咁，今時今日咁嘅政治環境，唔止反對派興風作浪，中港矛盾仲愈演愈烈，當局要推行呢啲方案，講就容易做就難咯。

一日最衰都係前特首貪曾，佢老哥當初好大口氣話想要一支魔術棒，順手一畫就畫出藍天白雲，結果藍天白雲就冇嘞，烏煙瘴氣就有。貪曾被列為「空氣逃犯」被人通緝，到家陣都未伏法，你話嘞，香港空氣點可能有改善吖？喺烏煙瘴氣下參加馬拉松，簡直就係搵命博，唔驚出事就假。