R之跑步日誌

rtang

二零一零年二月廿八日，對於我嚟講係一個重要嘅日子，因為我完成咗我人生首次嘅半馬比賽，時間係兩小時零九分（大會時間為兩小時十四分）。雖然比我自己心中想做出嘅成績，慢咗九分鐘，但係我無因為咁而唔開心，反而因為自己完成咗呢個比賽而感到驕傲！21.0975公里，我相信係我練跑前一世仔加埋都無跑到咁多！比賽之後，我已經幫自己係下年渣馬訂下一個目標，唔係要突破兩小時呢個關口，而係我要進軍全馬！我希望我可以係三十歲前，完成人生首次嘅馬拉松，而且要完成Sub 4嘅目標。

半馬比賽之後，身體無乜大礙，只係大腳肌肉痛咗三日。相信係因為比賽之後無好好咁cool down自己，又無拉筋，只係坐咗係維園休息，同埋同我嘅跑友講吓笑吹吹水。（我話如果唔係要陪佢跑，我一定可以做到兩小時之內嘅成績！不過其實我估以嗰日嘅天氣，我都無乜可能快多九分鐘！哈哈！）不過，值得高興嘅係我可以同我個朋友以同一個時間一齊完成個比賽。

休息咗幾日就投入番訓練，落咗運動場鬆鬆筋，慢速係運動場跑咗十個圈，目的係唔想俾自己懶落嚟同快啲投入番狀態！一路跑，一路回味番廿八號比賽當日嘅情境！之後就係Hal Haigon個website見到個18個禮拜嘅全馬訓練計畫，我就訂下咗目標，希望係五個月完成呢個訓練計劃，係八月前試吓一次過完成42.195公里呢個距離！

三月頭兩個禮拜我嘅訓練如下︰

2010年3月4日 — 4 公里 （跑運動場）
2010年3月7日 — 10 公里 （跑街五公里加五公里運動場）
2010年3月9日 — 5 公里 （跑運動場）
2010年3月10日 — 10 公里 （跑運動場加公園）
2010年3月11日 — 4 公里 （跑街）
2010年3月13日 — 13 公里 （荃灣西來回深井，經青山公路）

我會一直係呢到更新我嘅跑步日誌，希望同大家一齊努力，完成我哋嘅下一場挑戰！

rtang

三月第三個禮拜嘅訓練記錄︰

2010年3月16日 — 10 公里 （跑運動場加公園）
2010年3月17日 — 3 公里 （跑運動場加公園）
2010年3月18日 — 7 公里 （跑運動場加公園）
2010年3月20日 — 14.5 公里 （跑運動場加公園）

三月已經跑咗80.5公里！

下個禮拜開始要加入速度訓練，希望10公里可以係50分鐘內完成！

feifanchun

恭喜師兄開Blog大吉,小弟屯門友,多多指教.

rtang

多謝feifanchun師兄到訪！大家一齊努力呀！

三月第四個禮拜嘅訓練記錄︰

2010年3月24日 — 5 公里 （跑運動場加公園）
2010年3月25日 — 8 公里 （跑運動場加公園）
2010年3月27日 — 5 公里 （跑運動場加公園）
2010年3月28日 — 6 公里 （跑運動場加公園）

三月已經跑咗104.5公里！下個禮拜嘅目標係37公里！