03 May 2009 9km
5月2號响長跑網吹吹下水, 亞平師兄就話不如出黎跑下, 咁我地幾個人吹吹下就落實在呢次十二人約跑.
一大清早就起身, 8:40 我就去到鄧記, 換好衫踢埋腿就開始起程, 官方全程係大約19k, 不過我一早就已經約好左way師姐同埋法蘭兄會响中途上輕鐵, 開始跑無耐, 隻左腳又再傳黎陣陣痛, 去到洪水橋稍事休息果陣, 腳痛反而比跑緊果陣重痛, 當時已經決定左, 去到天水圍北就一定要上車回航, 慢慢跑慢慢跑終於都去到流浮山消防局, 隻腳實在係太痛, 所以我就先開口問, 係咪坐叮叮返去呀?法蘭同way就同意一齊坐輕鐵返鄧記.
返到鄧記再同法法 & way一齊踢神腿, 可能大家都有d懶, 只係踢左頭三式就收工去沖涼, 沖完涼各位師兄師姐都已經返齊鄧記, 再等佢地沖完涼就齊齊去左建生既羊城酒家搶包山, 我地叫左個十人餐, 真係估唔到咁抵食喎, 十個點心 + 兩碟(碗)麵/飯, 食到個個都飽飽收工, 席間突然有人提出, 不如上菠蘿山咯, 一陣和應聲之下, 我地十個人就一齊上左菠蘿山, 唔上去都唔知原來真係咁斜, 但係响途中見到七兄un下un下咁跑上去, 我就腳痕痕跟左一少少段, 發覺其實跑上去都唔係咁辛苦咋喎, 心裡即時盤算, 搵日搵亞平師兄私奔下先, 行完山跟住大班師兄/姐又話要去飲茶, 咁我地又去左田景村某餐廳食tea, 嘩...一見到平兄個粉就彈左呢個單字出黎, 真係好大碗, 由於我真係唔係好肚餓, 所以就只係叫左個雞扒薯條沙律就算, 飲飽食醉之後, 因為一早應承左帶亞way同法法去新威, 其他d師兄姐聽到就話一齊去, 跟住又一班人落左新威, 佢地兩個都買到心頭好, 而我都睇到心思思想買返對, 不過心諗今日玩左成日先返屋企, 如果重帶對新鞋返屋企, 容乜易得對鞋可以入境, 而我就要响車訓架, 所以就忍一忍手, 等有好機會先至再去新威買. |