徐濠縈喪跑吧！下一站內蒙古

bunbun

http://hk.apple.nextmedia.com/entertainment/art/20140424/18698282

蘋果日報 2014-04-24

【add】名Chat：徐濠縈喪跑吧！         

徐濠縈近年由時裝精變成「肯雅徐」，強項在fashion之外，追加一項：跑！

馬拉松由香港跑到上海、英國，下一站幫微笑行動跑到內蒙古草原；沉迷喪跑程度，追貼、甚至超越對時裝的熱愛，入貨入波鞋、潮裝潮配波鞋，跑步鍛煉出的耐性、恒心都變成賣衫生意的堅持位。「朋友話，跑步係一種修行，跑步已經融入我嘅時裝世界。」其實，時尚和運動都一樣，只有不停go go go，才會永遠向前。

撰文：林妙萍

攝影：郭賢興

髮型：Pi4 Sam

化妝：Vin C Tsang

徐濠縈上星期在白沙道店內宣傳新引入、英國七彩「監躉鞋」JuJu膠鞋。「我本身係fans，又買過畀囡囡，我日日着，真心舒服，好wearable，價錢又好平，四百幾。」鞋經講不到5分鐘，一提到跑步，熱火即時被點燃，fashion passion已被跑步追平？「係呀，你點知呀？咁對時裝，我又無減退到。時裝唔一定要限死行街買衫，可以好lifestyle。」

跑進時裝世界

徐濠縈中毒般的愛跑，「跑步已經融入咗我嘅時裝世界。」最顯眼是時裝店入多了sneakers，穿高踭鞋只限微博上、鏡頭前，「着唔番高跟鞋喇，真係。」更入肉入腦是跑步鍛煉出意志、信心、耐性，改變了她的行事思維。「當然我可以蹺埋雙手唔做啦，我覺得跑步就係要一直堅持，令我喺做生意時，唔會有挫折就放棄，喺時裝上可以繼續好有passion咁行呢條路。」耐性、堅持如何煉成？你未必要跑馬拉松才學會，阿徐是咁的：「跑步唔聽歌，好似將個腦清洗一樣；有唔開心事，藉住步伐發洩出嚟；有諗唔通嘅，利用呼吸節奏，叫自己唔好急，有啲事係急唔嚟。朋友話，跑步係一種修行，有冥想嗰種治療功能。」

下一站內蒙古

徐濠縈希望感染身邊人，試過逼女兒行山，首輪山頂再行返灣仔屋企10多公里，嚇怕了嬌生慣養的阿囡，「佢成日想停，我就話唔得，好似軍訓咁，佢好唔慣，返到屋企已經打橫瞓咗喺度。」女兒逼不來，自己跑自己的路，今年已經跑了兩次全馬，也跑出「名人媽咪＋跑得」的名堂。微笑行動主動找上門，7月希望她「孭飛」跑內蒙古馬拉松，只有一千人，跑草原，跑山路，她真的興奮：「我係咪都跑得咁辛苦㗎喇，我唔介意孭住咁多數，幫人籌款。」她去年在美國跑20幾個小時的馬拉松接力，困在私家車內20幾小時，和洋女、黑人一齊輪流下車接力跑，食飯開餐在車入面，上廁所去山邊，「體能上，我係好能屈能伸嘅，你哋可能睇到我係好fashionable，但我都可以去到邊瞓到邊。」

2014春夏入貨貼士

徐濠縈前幾年掀起過MBT搖搖涼鞋熱潮，今期在平底鞋熱浪中力谷七彩膠鞋。至於春夏入貨貼士，5個must如下:

1.crop top－「襯高腰又得，鍾意低腰露少少肚又得。」

2.粉色短裙－「長度闊度無所謂，闊褲、窄褲都OK。」

3.波鞋－「Chanel成個騷都着波鞋，夏天入定，鋪路一直着到冬天；近期我又鍾意番converse高筒款。」

4.膠鞋－「非常易襯百搭，，輕身舒服又女仔啲。」

5.太陽眼鏡－「夏天一定要有，  家古靈精怪款好多，我反而想搵番classic、timeless，Ray Ban黑框黑超。」