毅行者2010#0518 蝸牛部隊 (隊員回憶錄已上載,P.50 #989-992)

228華

原帖由 非比 於 2010-11-23 09:28 發表

                               
登錄/註冊後可看大圖

真真正正的外星人隊~~仲會係邊個呢, 哈哈XD

ET@_@嗎？？

花子阿DEE

原帖由 228華 於 2010-11-23 10:39 發表

                               
登錄/註冊後可看大圖

ET@_@嗎？？

小西華長大左啦~~

隊長 : Lulu 姐
隊員B : 大師亨
隊員C : 大佬金
隊員D : 大西華

花子阿DEE

原帖由 swtcheng 於 2010-11-23 09:48 發表

                               
登錄/註冊後可看大圖

仲想打電話問下今晚係唔係真嫁..........

臨時秘書辦事不力~~
今晚仲係外星人@長跑長友隊誓師大會,各位今晚見~~

clerkb

原帖由 花子阿DEE 於 2010-11-23 10:45 發表

                               
登錄/註冊後可看大圖

小西華長大左啦~~ 隊長 : Lulu 姐隊員B : 大師亨隊員C : 大佬金隊員D : 大西華

小西真係玩嗎?! yeah , 十個支持呀, 我想睇佢個死樣呢!! 呵呵呵

228華

原帖由 clerkb 於 2010-11-23 11:01 發表

                               
登錄/註冊後可看大圖

小西真係玩嗎?! yeah , 十個支持呀, 我想睇佢個死樣呢!! 呵呵呵

B哥上次老虎10K已經比你見到啦>_<仲串我飲啤酒La~@_@

花子阿DEE

~家明篇~


其實好多謝你揾我做拍擋,好多謝你睇得起我,令到我可19小時內完成這比賽,我玩咗3年都突破不到20小時,現在終於可以達成這目標!


而梗令我開心嘅事,就是讓我結識到一班好可愛,好稱職嘅朋友,我地玩過很多比賽,但我從未試過衝終點嘅時侯,有想喊嘅感覺,這感覺好特別,好難形容,好開心,好興奮,總之就好感動呀!


隊友們&十卜添真係好多謝你地呀!如果冇你地沿途支持,鼓勵,幫我地按脚,煮嘢比我地食,重有倍住我們跑返終點,我諗我唔會有這深刻感受,因為你地.....令到我有個難忘嘅比賽,回憶,我真係好衷心多謝你地.

家明

[ 本帖最後由 花子阿DEE 於 2010-11-30 14:21 編輯 ]

花子阿DEE

~KF篇~

我的毅行回億錄

正式開始比賽前一天，心情異常平靜，可能因為隊伍裡面發左一些小風波，再加上亮哥受傷需要退隊大休，自己只好準備最佳狀態去應付，一路以黎辛苦練習己盡力做好，無論結果係點都以平常心去看待。

比賽日相約隊友花子、非比、家明以及十卜隊長於彩虹食早餐，餐後再入西貢接埋車手大師兄一行六人屈蛇到達北潭涌起步點，一到達已經見到小叻及蔡兄十卜完由9:00出發o既先行部隊，跟住小弟馬上找早一步到達o既1822隊，因為蝸牛隊十卜陣容太強大，而唔夠衫需要急班多件 (在此多謝1822)，開始進場拎物資穿手帶，完成後見到老實人A隊全員已經齊集，大家拍拍照吹吹水之後亦見比因都到埋，自己心情亦越來越興奮同期待，返到停車場所認識o既朋友亦越多Daniel、赤子、Billy及法蘭等等，當然大家要拍照留念啦，見到時間差唔多打算要上線，去到士多前發現有一遍橙色人海，TKO大隊、o者喱仔、Terry等等亦都到左，時間所限寒喧幾句黎張大合照就真係去上線喇！一如以住台上都唔知講過乜之後10..9..8..7..6..5..4..3.2..1..起步。

一起步都係沿用平路jog o既方法進行，越過一班人之後上斜，於起步階段與1822、老實人A及兆聰互相打氣，唔小得又影返幾張相，向東霸繼續進發，o向呢一段Pacing控制得唔錯，全隊之間距離都幾接近，大部份時間都可以邊行邊講，仲經常受到隊友性so妖，輕輕鬆鬆到達東霸，之後由呢段至到沙田凹，大部份都係上落山，因為各隊員山路o既特點都唔同，所以打算走返自己舒服o既pacing去走呢頭半程，盡量保留體力去應付尾半程o既考驗，一行人向西灣出發，今日天氣尚算唔錯，與夏天三十多度上西灣山完成完兩個世界，心諗非比幾次都熱熔o向西灣山今次應該過到關喇！繼續走到西灣亭十卜點，有位姐姐仔派檸檬，都唔知有乜用不過悶悶地都拎D野咬?啦，再向山下o既西灣士多進發，呢段路係落山段，亦比較塞人，因為好多人在麥一上斜都唔慢仲可以跑上，當時小弟都備到亳無還手之力，而家到我啦掛，飄o下飄o下就到o左西灣士多，到達後第一時間見到CU已經到o左，互拍幾張相之後緊隨其後A隊都到齊，o都完手帶佢地立即出發，轉眼間蝸牛隊都齊人，再一齊向下一站出發。經過士多o既時候見到好多生果及冰凍飲品，真係想坐低慢慢嘆，在末到咸田灣o既山上，見到一大隊強隊，佢地唔係時間做得快，而係意志堅強，佢地就係一大隊失明人仕毅行隊！到達咸田灣冇o左假日o既遊船同比堅尼，換黎左一粒粒為慈善苦行o既身影，行行重行行終於到達北潭凹，而我地強大十卜團o既前進亦都守候多時。

小弟亦都立即請教o下前進，小弟當日著左條新買o既壓力長Tight，好似緊左DD，不過壓力Tight就一定係緊架啦，我個問題奇實都幾古怪，根都末拉完幾位隊友亦都到左，看看錶比預定時間快左1x min，都尚算合格，再走前一小段見到A隊正左休息，而我地食小小野補給完之後同A隊都一齊向三段進發。

A隊一起步已經彈左上山，而我地亦各自向水浪窩進發，o向呢段路頭半程各隊員互有領先，過左一半之後落山我又飄左落去，因為小弟上山較慢，要靠落山追時間，而隊友仔每次都可以o向雞公山過返小弟，開始上雞公山，狀態好似跌左D又有D餓，食左包Gel再望望錶，好似走快o左小小，當上到雞公山，見到一個熟識身影，原來小叻幫毅行教室做十卜，千辛萬苦將大批物資運上雞公山，仲提供埋水同蕉俾我添，不過小弟於水浪窩已有一眾十卜隊員等候，物資都係留俾有需要o既人啦 (o向度多謝小叻先)，而小叻見我一條友問我仲乜自己行? 隊員呢?? (奇實為左分開各自走或者四人一齊走都發生過爭咬，始終都冇一致共識，今次都係隨機應變，靠執生兩個字) 而我就答o向後面就到，一回頭真係見到隊友仔到喇，而佢地一如以住都o向呢度過返我，上到頂之後又到我追隊友啦，沖o左一陣傳黎一句「係咪長跑網ching呀?」互相自我介紹之後原來係荃灣華，別過荃灣華再沖一陣o既時候，PK啦想老抽添....真係不聽壞人言吃X在眼前，比賽真係唔好試新野，停一停鬆返小小之後飄到落去大站水浪窩，看看錶又更加早到o左

嘩~!好多人，蝸牛十卜隊己佔到有利位置，立即坐低休息及開餐，呢一餐有KFC薯容、通粉等等，而對腳又好似冇乜事咁喎，不過runrun都幫我按腳，見到對腳鬆返哂我都放心D，而A隊亦都o向我地隔離休息，小休片刻又要上路。

過左馬路上完樓梯見到大會有好多飲品，又休多小小時間飲返杯熱華田，今次真係行啦。

開始上馬鞍天亦漸變黑，又係上到大半俾隊友仔過頭，呢個時候知道將會出事，要call十卜隊幫我o向行李袋將裡面條跑褲帶去沙田凹更換，上到馬鞍頂都要放慢走，而開始落山終於黎料啦！兩隻大脾一齊大抽，唔通就衰o向條褲手!?就係呢個時候見到前進在不遠處等緊我，好彩小弟之前o既練習都多番試過抽根，可謂家常便飯，簡單拉一拉對腳之後，再走到大金鐘涼亭接受前進幫我大修，一到達涼亭即時訓低，一邊食蕉一邊前進幫我按鬆對腳 (唔該哂前進),此時發覺我可能飲大左有機會唔夠水，不過大家水量都係只夠自己，好彩呢刻涼亭裡面有位好心人有水剩，俾左兩支水我地，補充完水同前進分別之後向基維爾進發(呢個時候要花子幫忙咩住個腰包一陣喇)，又係落山路，都係忍唔到腳痕，帶住抽根o既陰影，飄o下飄o下飄落山。大家同時間到達基維爾，小休幾分鐘飲杯熱湯，就繼續行程，今次聽唔到狗吠聲，可能都吠到冇力喇，過左屋仔離開沙田凹集合點只剩一條下斜路，我亦都行先一步沖落去換返條褲先，到達集合點，Mill姐、CY媽、會長以及E.T.已經到o左，我放一放水於一個o向呢半年黎幫襯無數次o既廁所裡面換褲，呢刻要靠E.T.幫手先能夠成事，條褲太窄啦！WOW 舒服哂，都係一舊水一條o既o岩我著。

小休片刻，補給物資再次起程，與Mill姐、CY媽及會長告別，而E.T.亦加入陪走5-8 (多謝四位支持)，前半程總算有驚無險咁完成，而後半程先致係真正考驗，需要發揮團隊精神，及堅定意志，正所謂「挑哪媽，頂硬上」

呢一段開始非比o向度整電筒，就由家明同小弟帶頭，非比、花子同E.T.留後，轉眼斷開兩截，一路上我都係跟隋家明步伐，呢個新隊員真係估佢唔到，由開操至今只係練左10日，而由於養傷關係由渣打至一個月前先回復跑步，每次都係10K8K，而最近呢10日裡面其跑180K.....今次毅行由三段己經開始話冇力，黎到五段都仍然冇慢到，完全睇唔出己經走左五十多K，我心諗有冇咁堅呀?得10日時間要黎回復都唔夠用啦！由呢段開始，所遇到o既隊伍亦越來越小，開始擔心會行錯路添，走o下走o下見到一串燈光，已經到達畢架山CP，而隊友亦o向呢個時侯到達，入到去見到有糖水食即時整返碗蕃薯糖水先，感覺係冇乜味唔知有冇落糖，但係都要多謝一路以黎咁多位毅行義工o既支持，冇左佢地所付出，點可能完成呢100K呢? 就o向呢個時候，花子忽然走到救護站對住一班妹妹仔扯高件衫露出佢o既兩點....細看之後都係不外如是姐，到底攪乜鬼，唔通跑到痴左線!? 原來佢係甩o左膠布要痴返，最後救護站都俾左幾塊膠布我地，由非比同花子慢慢玩！又夠鐘起程，不過E.T.仲未飽食多陣再追上黎，一行四人向大埔道前進，轉眼己經到達，過埋天橋進入第六段，前行不久E.T.亦都歸隊，時間都唔早但係成班馬嬲仲末肯訓，差不多上到頂見到泊滿車輛，十卜Team坐滿路邊，加油聲亦此起彼落，而下一CP亦離此不遠，大家一口氣走到o都一聲又攪掂，不過要勞煩E.T.幫忙加水再趕返上黎，沒走多久就到達我地十卜大站城門。

隋即找到十卜點，玩場V娃鬼叫好鬼熱鬧，此處十卜有小西華、Kito及蕉仔加入，o向呢個時侯耳邊傳黎一聲「訓低」，原來係蕉仔幫忙作按摸，梗係唔好執輸第一時間訓低先，當時本人帶住既驚且喜o既心情，忽然間小腿傳黎一陣酸痛感覺，我不自覺發出一聲慘叫「呀~!呀~!」估唔到辣蕉妹人仔細細咁Q大力，平時應該有舉鐵，而慘叫聲接二連三由非比及花子發出，o向遍燒烤場。吃過熱辣辣靚粥同薯容(多謝各位十卜一番心機煮熱)，1822呢個時候亦都到達，等o左咁耐終於等到啦，呢班友就係可以用傳說之中唔駛點跑都可以快o既隊伍，不過三缺一!? Timmy隊長呢? 原來Timmy隊長受傷已於四段退出，不過Timmy有班好隊友隨時都可以再報仇，蝸牛隊黎張大合照之後，小西華亦加入做陪酒份子7-10段。

出發，有小西華幫忙拎水，再加上剛才按摸之效 (唔該哂蕉仔)，成個人輕鬆哂，與1822一行九人齊挑針山，由山腳至山頂各人毫無疲態，開開心心吹住上山，話咁快就到左針山頂，大家氣到唔駛回就劈埋落山先算，落到石屎路竟然有水特補給！？ (都係自己冇睇清楚毅行手冊)，今日由開始至今絕大部份都只係補給水都可以黎到呢度，咁小弟對補充電解質o既重要性又有新睇法。由呢刻開始大多數都係小弟同家明一齊走，不過與各人相距亦都不遠，行o下行o下見到有個太古Logo o既十卜點，小弟心諗呢個係咪供太古員工o既毅行隊伍呢? 家明告知唔係之後走入去幫襯，而我同小西華就冇入去，後來知到走o左寶，原來校董在裡面做義工十卜大家，仲有熱辣辣o既香腸食添(辛苦哂 Rebecca同義工十卜)，最可惜係冇左個吹水合照o既機會，再行不久亦到達鉛金廣凹o剌。呢個CP物資豐富仲有杯麵食，不過我都只係飲杯技簾湯暖o下肚就攪掂，此時1822已經到達，而家明按摸完亦都已經先行一步，而小弟準備起行o既時候非比話要多休一陣，咁小弟亦走前追趕家明，前面追唔到，後面有追兵！往後望有三支燈急速接近，正是1822是也！我地四人亦慢慢追上家明一同前進，正當開心地聽住天鬼繙出o既歌前行，不過都末夠兩首就冇o左電，再行一陣之後1822亦先行一步，沒多久小西華亦都黎到。我地三條友又繼續往前行啦，終於到達石屎路，而各隊友都到齊，開始進攻呢條大長甘，而家明終於都開始放慢左。不竟只有10日時間，黎到呢度都可算係奇績，小弟亦都乘機小休一會，休息完都係慢慢咁上山，上到頂黎過深呼吸，我地兩人都放鬆雙腳，準備三..二..一..劈落去。而呢段路小弟亦都初試傳說中果三段小SC，再劈落去終於又再見到一串串發光o既電燈泡，望到CP啦，此時離遠見到一個熟悉o既身影，一件牛仔布恤衫，外穿一件網Tee，原來最重要人物亮哥都到左啦。記得蝸牛部隊o既成立係源於五月一日o既毅行試腳活動，由非比同亮哥傾o下傾o下而成立o既，之後小弟第三個加入，花子第四個，當日冇亮哥亦唔會有蝸牛部隊，而家終於全員齊集麥徑，我第一時間向亮哥上下其手，然後知道花子有大事要辨就同亮哥吹水，原來亮哥一早已經坐巴士上左黎，俾個意外驚喜我地。再等左一陣非比眼訓走去救護站訓覺，好彩呢刻花子辨完事，大家即刻捉返非比起身o都一聲就落停車場會合大隊。

今次十卜Team又佔到有利位置 (亦要多謝金金赤手空拳砌低幾個警察我地架車先入到黎)，今次到LULU姐都我同非比按摸，蕉仔幫家明同花子按，小不免又傳黎一陣慘叫，而o向呢度亦見到小學生隊四大護法之其三Danial，人仔及Stan，另一護法Andrew就爭取時間小睡，而法蘭亦出現幫大家影相，簡單進食補給之後黎張大合照，之後一行八人向住最後兩段前進，此時LULU姐、金金、蕉仔加入，E.T.離隊，最後呢兩段花子vs金金、非比vsLULU、家明vs小西華以及小弟vs蕉仔。

一開步上斜辣蕉妹一馬當先沖前...我唯有死跟啦，轉完個彎已經見唔到後面隊友，好快又開始落山當然係劈落去啦，劈到落底又梗係劈返上去啦，喂喂..阿蕉等等....上緊斜俾條生路行o下，有貨剩都留返10段用，何況冇乜剩，都係用返急步行上，落斜劈，今晚月圓之夜，o向沙灘漫步或者幾浪漫，不過係劈緊落山，劈呀~!呢段路唔知點解見親都係鬼佬隊，我地經過o既時候都會同佢地講聲「add oil」，到最後果隊竟然對我地講「加油」......(係咪有野攪錯o左)，差唔多去到吉慶橋，見到前面仲有一隻鬼...天鬼，辣蕉妹即時沖前施龔，就在電光火石間有兩個黑影閃過，原來家明同小西華都殺到，別過1822我地亦都追上去，不過都係追唔到，而o向吉慶橋前亦見到力士，打個招乎之後都到達吉慶橋o剌。到達之後遇上燉奶、喪Ken等3PS十卜隊及一班新界西ching，家明劈完呢段面有難色咁訓o向坐椅上，燉奶亦幫家明按摸，此時非比同花子都到達o剌，非比大呼「LULU姐LULU姐」

因為對腳好痛需要幫忙按摸，由於LULU姐未到由蕉仔頂上，(非比呢個隊友開操以黎經常都係傷住忍痛操練，唔肯休息，真係冇佢辨法)好快又夠鐘喇。

半年以黎o既辛苦練習到o左最後一段，已經忘記左乜野係累，一起步就向終點衝去，呢段路係自已預計之中最辛苦o既一段，不過今日去到呢度反而好似有用唔完o既氣力，每次都覺得長o既6K，今次覺得特別短。出到水塘大上斜，對腳話俾我知真係累啦，隻蕉急急步走上斜，我想追亦都有心無力，唯有一步一步追上去，行o下行o下前面傳黎「前面有燈就到CP啦」，終於到最後一個CP(多謝蕉仔陪走)，呢度有D唔同可以分開o都手帶，不過o都完當然等齊人先啦，(不過呢度好鬼凍)，冇o野好攪就影o下相同CP義工傾o下計，亦都再遇1822、力士及3PS等，見到SUE兄雖然受傷，不過都忍痛不屈咁步向緊終點。隊友到達後獨欠家明，花子亦走回頭陪家明同小西華上返黎，小休一會一齊向大棠終點前進。

一行八人一齊走最後呢一程，沒有久忽然遠處傳黎叫聲「家明！家明！」，臨天光出現D咁o既野，大家聽到都唔敢望回頭，加快腳步走左去。去到石屎路段家明再次返生，一馬當先劈上劈落向前衝，到最後3K會合埋亮哥同E.T.就直衝終點。去到燒烤場原來仲有一大段路，不過大家越跑越快一齊開開心心衝過終點。時間18:38收貨！

到達之時前進,Kito,大師兄同小西華女友都到o左(特別多謝小西嫂零晨三點起身自己一個過黎幫大家影相)，而在場亦有大班相識o既各隊隊員及十卜互相道賀，換過件衫黎張大合照，進場後與各隊寒喧一番，沖返個良拿證書大合照等等，同場加影金金生日會，多謝金金生日都黎參與我地活動。隨後大隊到附近早餐，離開大棠天已全光，亦完成左呢畢生難忘o既24小時。

完成毅行最重要都係四位隊員能夠做到互相支持體諒，需要多溝通先可以開心完成，時間係一個目標，但亦只係一組數字，完成之後回望最開心係同其它隊伍亙相支持以及同4位隊友及所有十卜嘻嘻哈哈走過每一段路。呢半年受太多幫助及各善長損助不能盡錄，在此向各位講聲多謝！

開始比賽前心諗好大機會係第一以及最後一次參加，不過完成之後我相信末來會再參加，亦希望每年都可以以其它身份參與。

毅行者 I'll be back！




[ 本帖最後由 花子阿DEE 於 2010-11-30 14:26 編輯 ]

花子阿DEE

~公主篇~




最近工作太忙, 毅行者已完成了10天, 連寫後感的時間也没有, 今晚終於可以的起心肝寫後感.

毅行的哲理很多人也明白, 但有多少人能夠實踐呢!? 對於毅行, 唔同的人會有不同的目標, 4位隊員要目標一致才能一齊衝過終點, 一個團隊由個體組成, 大家會有各自的個性, 所以互相包容及體諒非常重要, 由操練到比賽前, 一波三折, 最後總算"解決"了問題..

因為腳痛, 走了上麥徑, 因為緣份, 誕生了蝸牛部隊, 自此這半年間幾乎每個周未也在山中度過, 遇上惡劣天氣, 或者通宵操山, 當眼訓腳累時, 會問自己, 好顛呀, 一個女子夜嘛嘛唔留係屋企訓覺, 要通山走, 無解, 我享受操山的過程, 當有有苦與樂, 就如人生一樣, 無論苦的甜的, 我也照單全收.

為了毅行, 半年的操山, 為著一直向西走, 放了很多的時間, 心機, 汗水, 金錢, 還有要放棄了做其他事情, 所花費的心血還真不少, 這一次, 我比做任何事還要更認真. 比起結果, 更享受當中的過程. 不怕失敗, 只怕失去意志, 所以我要學習堅持!

比賽前18日隊友因受傷決定退出比賽, 家明臨危受命, 成為了蝸牛隊的新隊員,
10天寺間總共自隊了280多公里, 加上苗圃比賽日, 家明陪走, 狀態看似不太好, 心裡實在擔心, 究竟對於一年没有操山的新隊友, 我們的目標時間要怎去定呢!? 最初大家暫定做最好時間, 如果家明跟唔到, 我們就會放棄家明, 最後大家商議後, 最終以4個人齊齊整整返終點為目標, 時間是其次, 比賽途中任何一個人也有可能唔掂, 總之, 大家要幫助最唔掂的那一位完成比賽.

毅行正日, 和隊友仔一齊食過早餐就向北潭涌出發, 心情非常輕鬆愉快, 感覺好似去郊遊一樣, 很快地做好登記程序, 向100公里出發!

過程中幾件難忘事: (跟發生的時間排序)
1. 由登記到衝終點, 十卜隊員仲緊張過我地xd
2. kf著左條超sexy"抽筋褲", 搞到我係第1段走唔郁, kf之後係沙田坳換返跑褲, 居然可以神奇返生!
3. 在大金鐘附近時, 開始天黑, 月亮又圓又光, 近在咫尺
4. 城門十卜蕉仔幫按腳, 痛到叫到”媽媽”聲
5. 鉛鑛坳休息後, 突然熄燈, 勁眼訓, 咩都唔想拿, 連電筒都掉埋俾花子, 上大帽山時以為靈魂出竅, 夢遊緊, 好在上到亂石堆醒返, 個種感覺好恐怖…
6. 出環塘後上到control point, 唔理三七二十一, 怒ZXY隊友花子
7. 家明比賽時多次欺騙我無貨, 結果派下派下, 派到終點仲有貨剩, 對於一年無操山的人, 食老本也能做到這個時間, 真係佩服!
8. 100公里的旅程遇上很多朋友仔, 你介下我, 我介下你, 都幾過癮
9. 超強十卜team, 每個十卜點及陪走也比滿分更高分!

過程中雖然遇上了困難, 但總算順順利利完成, 一分耕耘一分收穫, 如果有足夠的練習, 過程絕不比想像中辛苦, 究竟呢100公里有幾難忘及幾好玩!? 非筆墨能夠形容, 如果心思思想走毅行的話, 請不要猶疑, 只要相信自己能夠做到, 永不放棄, 堅持堅持再堅持, 就凡事也有可能!

多謝各位善長的讚助
多謝各位十卜隊員的無限支持: lulu姐, 大師兄, 前進, runrun, ET, mill姐, 會長, CY媽, kito, 小西華, 蕉仔, 大佬金 (***排名分見面先後次序***)
多謝各位隊友仔成就蝸牛部隊, 多謝大家在操山的時候對我愛護有加^^
多謝狗哥一直的支持
多謝根根攝記為大家留下美好的回憶
多謝各位麥徑上的朋友仔

毅行過後, 傷的傷, 痛的痛, 希望大家能夠早日康復!



[ 本帖最後由 花子阿DEE 於 2010-11-30 14:17 編輯 ]

花子阿DEE

~花子篇~

蝸牛隊今年既target 係大約19hr,賽前十幾日突然要搵替補隊員,有練開既都埋晒班,無練開既應該唔係咁易做掛,傷透腦筋~~
好在有位黐線佬,就係我多年好多好多比賽既隊友仔家明,咁都肯制,哈哈~~

其實家明都唔係一口應承,咁o岩幾日後係苗圃比賽,就叫家明同公主一齊走下,順便同埋KF 三位磨合一下~~

家明大半年無練野,跑番都唔夠一個月,苗圃果日跟公主都跟得好辛苦,但係到果時已經剩低12日,無第個傻佬肯制啦,所以點都捉住佢~~

我太熟識家明既特性,佢應承得就死都死埋俾你,問題係,我地都操左成半年,我都唔係好信十幾日佢可以做得到...

話咁快就到左正日,八點幾,四位隊員加埋台柱Lulu 姐一行5人晌彩虹小巴站附近食早餐,KF 準備好豪華房車送我地去起點,專車去可以增加士氣,去到迴旋處屈蛇兜埋大師兄,就齊齊整整去起點~~

去到起點出奇地大把車位,因為慳番等位開壇既時間,令時間十分充裕,各人心情輕鬆,KF 神態自若,公主直情好似幼稚園去旅行,唯獨家明好似有D 擔心樣~~
北潭涌撞到好多好多老友,小叻,蔡兄,港島A/o者喱仔/TKO AB既成員,影下相,裝下身,熱鬧到不得了~~

快活不知時日過,好快就起步啦,大家都唔駛多講,蝸牛隊已經好有默契,連新加盟既家明都好快融入大隊,走得好順利~~

第一段不斷有好多參加者晌身邊掩掩樣樣,我感覺有點不耐煩,幸好精神領袖公主將我拉住,令我第一二段花少好多氣力,亦令我後段保留到好多,玩左咁多年反而要個新人帶住...佢似經驗毅行者多D 喎~~
一二段總算順利,KF 同家明各自輕鬆提步,我都仲係有D 煩躁,就係咁走下行下,好快走到北潭涌,第一位十卜人員前進兄已經晌廁所門口等緊我地,令原本都走得唔錯既隊友精神更加振奮~~

又見老實人同佢地既十卜添,大家打打招呼,又繼續走啦.有前進兄幫大家孭左D 水同埋照顧公主,我就走得更舒服,大家好似仲有氣有力,不知不覺第三段就走快左,中途仲介左老實A,1:38,仲快過練幾段既時間,好似唔係幾好囉...

落水浪窩,雞公腳又見到法蘭影相,仲有灰灰打氣,原來我地既壇就同老實A 一齊,好似一隊咁~~

我地精銳既三位十卜添成員,Lulu 姐,大師兄同Runrun 已經恭候多時,隊長Lulu 姐一邊晌度鬧D 賊仔走黎偷水特,一邊係咁餵公主寶寶食野,大師兄同Runrun 師姐就照顧我地三個~~

但見公主面色紅潤,好似化左庄咁,好精神,家明就好似開始有少少疲態,走左3分1 啦,咁既準備,都無辦法,希望佢頂住,最奇怪係KF 面色都好似無飲白蘭樹雞精咁,青青地,當時唔明點解...總之都算唔太差,有十卜添幫我地叉叉電,大家都精神番唔少,繼續走~~

前進兄繼續陪我地走,傾下講下,俾人介下,好快就上馬鞍啦,家明同KF 之前先走,好似拉遠左唔少,但係去到馬鞍一半,KF 好似好謝,呢個時候佢終於和盤托出,原來係佢晌倭國訂來既抽筋褲作怪,傷風藥食到人傷風,走光褲著到人走光,抽筋褲真係著到人抽筋,情況有D 不妙,不過無辨法,KF 對腳仔大家有份,去到昂平就坐低俾前進兄馬殺雞左一陣~~

拉完情況有所好轉,呢個時候前進兄都功成身退,我地又繼續走,家明同公主為免太凍先走,我就同KF 壓後,好快又四人走在一起,當時我同日落後既公主情況比較好,為免扯爆隊友,我地兩個壓後,KF 同家明先走,另外打左電話俾大隊長叫佢帶埋KF 條士啤褲俾ET 晌獅子亭俾佢換.又為免俾壓力佢地,俾左一D 空間佢地走,但係我地好快又跟左晌家明,而KF 就叉完又跑到係影啦~~

三個人家明帶頭,好似越行越慢,可以jog 既地方都無jog,我以為家明爆晒啦,但係機智既公主呢個時候就問家明:"家明你係無力定係等我地呀?"家明:"你地晌後面行我咪行囉,你地晌前面走我咪追囉." 咁得啦,我地走~~ 唔好理,我地走家明又真係追到喎,呢段跑到可以慳好多時間,呢個時候發覺我地兩位隊友KF 係要人推,家明係要人扯架~~
順利到基維爾,又順順利利到獅子亭,又有我地強大既十卜添令Mill 姐,會長同CY 媽晌度等候啦,ET 就食緊餐蛋麵,KF 急不及待搵ET 攞褲,換番條"仆灑",舒服晒~~
叉叉電又繼續走,ET 係快腳,唔駛理佢,俾晒野佢孭.KF 同家明又好似無咩咁,上獅子OK 快喎.中途公主電筒甩鏡,整左分幾鐘,跟住一路追,追到畢架山CP 先追到佢地,一個話無力,一個話抽筋,又快到係影...

有風駛盡,有ET 乜都俾佢搞晒,我地順順利利好快到城門啦~~
期待的point,露露隊長,大師亨,傑佬,小西華,蕉仔,仲有其他隊既十卜添,好熱鬧,除左冷熱飲食,仲有馬殺雞服務,招呼好到不得了~~
唔敢榴槤太耐,夠鐘就走,俾大家照顧後又係四條好漢,加埋小西華同ET,六條好漢上呀~~

兩位支援人員繼續招呼周到,我地真係輕鬆好多~~

順利過針,跟住上草,落草,家明繼續好似捱下捱下既衰樣,但係都走得唔慢,KF 換左條孖煙囪之後就無晒問題啦,但係平時碌落山既公主,點解落山慢左既...

落到鉛礦坳...呢次到公主變臉...青到眼耳鼻和口都無晒,原來係最澤駛既膝頭痛+腳板痛...
都無咩好講,大家抖左一陣就繼續上路上大帽,KF 同家明先行,面青青公主抖多一陣又出發啦~~

見公主好似唔多舒服,我就用電筒幫佢照埋,呢段應該係蝸牛隊主場,但係一D 都唔快,有時仲俾人介,去到山路一半,公主突然話要自己揸番電筒,呢個時候知道,公主番黎啦~~

去到石屎路,四位隊員又會合啦,家明照舊話自己唔係好掂,我就照舊當佢吹水走先,KF 陪佢~~

差不多到波波時,發覺公主有團火~~
呢個時候到我出左問題...好似搞搞地肚,開始要好似快要塌下來咁...我問小西華有無紙巾,小西華無,無就算,死忍到荃錦吧,最衰小西華又生得令仔,晌波波頂俾佢借到成包黎,呢次註定要中途爆啦~~

劈落去臨廁時又遇見1822,多得佢地鼓勵,又話要照住我做大事又盛,真係多謝晒~~

六分鐘後成事,再劈番落去同大隊會合,只見其餘三位隊友仔已經到齊,同十卜添有講有笑~~

咇完手帶落去十卜點,各十卜添工作已經熟到好似F1 換呔既人員咁,又快又週到~~

繼續走,9-10段我地請到四大護法,實行一跟一,小西華拍家明,蕉仔拍KF,Lulu 姐拍公主,大佬金拍我,第9段,順利到不得了,自稱唔得既家明同埋KF 兩對人快到無影,吉慶橋見~~

去到吉慶橋,見到一大班十卜其他隊既老友,又精神起黎,見到舊隊友奶奶晌度幫家明馬殺雞,我總係覺得佢只係晌山邊見到老隊友晌度撒嬌,就好唔俾面咁叫佢"米扮野!!快D 走!!"

俾我催得兩催家明都無辦法要起身走人,仲有10K 左右咋,好大機會做到滿意時間~~
去到環塘,只見KF/蕉仔/公主/Lulu姐分別過左我頭,大佬金就幫我拎埋水跟住我走,呢個時候我真係眼訓都不得了...跑跑下見到Lulu 姐好似同個女仔慢左(事後先諗起,Lulu 姐仲話我講左句叫佢跟住公主),但係我唔知點解夢境潛意識話我知公主同KF 都仲晌我前面,我就一路訓,一路追~~

感覺好快就到左石屎路,咦?點解KF/蕉仔同公主都唔見左既?我以為佢地上左CP9.5等,於是我就嗌番轉頭叫家明,有把女聲應我家明未到,我以為係Lulu姐,我一向對家明好有信心,當時超眼訓,就同大佬金一路傾一路夢遊上斜,事後先知原來應我既係公主...

上到半路,大佬金接到Lulu 姐電話,話家明要gel,就叫左大佬金落去,我就自己繼續上CP9.5...

上到去,咦? 得KF 同蕉仔既...

當時我神智不清,就坐左晌度hup眼訓等...

無幾耐,見到公主...跟住既劇情令全場既人同花草樹木都O晒咀(過份暴力),唔出得街,呢個時候我如夢初醒,係我無照顧到家明,於是就落番去搵家明補鑊...

快樂既時光過得特別快,貶下眼就快到終點啦,各位隊友越來越精神,越跑越快,沖呀~~ 過終點,18小時38分~~

05-08玩左4年,未有一次達到目標時間,今年終於做到~~

鳴謝 : 排名分見面先後


隊友仔們 : 盡在不言中~~
Lulu 姐 : 妳辦事,我放心,我地無咩時間籌備,交晒俾Lulu 姐就搞掂晒~~
大師兄 : 大師兄一早問我有咩做,我答佢講唔到俾你聽,不過好忙,就係咁,大師兄就做左毅行最出色既車手...
前進兄 : 陪走3-4.5,照顧公主同我地,令我地可以保留體力,終點仲番黎送大家番屋企,真係唔話得~~
Runrun 師姐 : 水浪窩我地唔係好夠十卜人員,好在Runrun 黎到幫手~~
ET兄 : 陪走獅子亭至荃錦,唔駛講野,就係做野,乜都幫我地做妥~~
Mill姐,會長,CY 媽 : 爬上獅子亭幫我地打氣同十卜,令我地精神起來~~
傑佬 : 帶來煮食用具令我地有熱辣辣既食物~~
小西華 : 陪走城門至終點,骨骼精奇,o岩晒走山,上上落落,前前後後,無得彈~~
蕉仔 : 能令KF 釋放出無窮力量既女仔...
大佬金 : 照顧小弟,無微不至...

仲有太多太多有趣快樂事,已藏心中,永遠回味,明年再見~~






[ 本帖最後由 花子阿DEE 於 2010-11-30 14:17 編輯 ]

非比

原帖由 花子阿DEE 於 2010-11-23 10:49 發表

                               
登錄/註冊後可看大圖

臨時秘書辦事不力~~hgjD092" />" />hj
今晚仲係外星人@長跑長友隊誓師大會,各位今晚見~~hgjD115" />" />hj

終點都過左, 仲要我咁勞氣 ...

非比

原帖由 花子阿DEE 於 2010-11-23 11:20 發表

                               
登錄/註冊後可看大圖

~~快將推出 公主感想篇 密切留意~~

我想申請遲交功課呀>"<....執起支筆一粒字都嘔唔出

swtcheng

等睇真情流露.........唔好jar流灘

[ 本帖最後由 swtcheng 於 2010-11-23 11:48 編輯 ]

kf

毅行者2011  外星人@長跑長友

隊長 : Lulu 姐
隊員B : 大師亨
隊員C : 大佬金
隊員D : 大西華

十卜team: cc

swtcheng

原帖由 kf 於 2010-11-23 11:56 發表

                               
登錄/註冊後可看大圖

毅行者2011  外星人@長跑長友

隊長 : Lulu 姐
隊員B :         <-----有位呀............
隊員C : 大佬金
隊員D : 大西華

十卜team: cc
十卜team: 大師亨

唔好玩我啦.......我玩唔倒呢d外星人既玩意嫁..... 你地出年挑戰超行吧....

kf

比 ))))

拎埋樂善d野出黎比lulu姐呀

runrun

原帖由 花子阿DEE 於 2010-11-23 11:20 發表

                               
登錄/註冊後可看大圖

~~快將推出 花子感想篇 密切留意~~

好期待呀！

shogikin

各位大大
要睇住lulu呀

今晚要上課
來不到見證
這個歷史時刻:
外星人@長跑長友隊誓師大會

Kin in Running