救命，喺跑馬地更衣室內漏低咗嘢！

rl0497

慘，頭先(2015/04/19)六點幾喺跑馬地更衣室一時大懵，應該喺換衫嗰陣將條Garmin HRM Run心跳帶除低咗放喺櫈時唔小心喺啲長櫈罅度跌咗落地，又冇為意就走咗，返到屋企先發覺冇咗條心跳帶，其實已經打過去問啲職員，有關職員話即時去睇冇發現，如有任何跑友發現，煩請PM通傳一聲，非常感激！

我諗我今晚（2015/04/20）放工都會去再望望，因為可能係攝咗喺啲罅冇人發覺亦唔定，如果要買返，我諗要七百幾八百，好肉赤！！

洛虎添

不如重新買個隻apple watch,最平~2700又有內置心跳帶功能

kokyan_lam

洛虎添 發表於 2015-4-20 09:28
不如買番隻apple watch,最平~2700又有內置心跳帶功能

虎哥, 個師兄而家首要係想搵失物, 唔係買新野呀

小叻

其實我在香港公園體育館都留低過, 好快打電話返去都無咗~

lewischan

預左無啦! 搵到當中獎羅
就算銷住都有人爆格

dn21

樂觀估計 :  俾人執咗, 好開心用緊 !
悲觀估計 :  俾清潔阿伯當垃圾掃咗, 堆填區見 !

rl0497

兩樣都係我估計在內，不過俾我執到都唔會用，黐晒汗咁核突。不過我一陣放工後會去望吓，其實係凶多吉少嘅。

rl0497

Apple Watch就一定唔會諗，我係一個雙平台嘅電話用家，成日唉瘋Android兩邊走，二來，我唔係淨係要計心跳，我嗰條帶係跟隻620嚟嘅，唔係普通心跳帶，所以搵唔返我就唯有買過，都冇法，自己大意可以點。多謝上面各位嘅意見先。

rl0497

終於都係冇運行，去到當然乜都冇喇。行去問簽場嗰度，睇場個職員嬸嬸問咗我一輪，佢竟然認得我係尋晚打去問嘢嗰個，佢問多幾問，話真係執到一樣類似我形容嘅嘢，不過要我簽咗啲嘢先，因為失物認領，好多失主失嘅嘢都類近，我要先簽咗啲嘢佢先會俾我睇，簽完後佢喺櫃入面拎咗條帶出嚟，結果係空歡喜，係一條Polar帶嚟，不過我都有心理準備乜都冇㗎喇，所以冇特別失望。哩個嬸嬸好好人，記低咗我啲資料，話再有發現會搵我，態度一流，真係抵讚！
不過，都係奉勸各位，小心為上！嗰個嬸嬸態度再好都好，都唔想因為失物而見佢嘅。

bunbun

1) 買bundle版, 最抵;
散買 HRM帶, 好貴

2) "跑馬地更衣室"幾號電話?
作個記錄, 雖然, 希望未來都用不到

rl0497

我喺某間嘢可能有折買，可能六百幾落到樓都唔定嘅，要走去問問先，買bundle版，你走去放隻錶，一來未必有人要，二來保養亦係一個問題，哩個方案我都應該唔會考慮喇，多謝你嘅提議先。

至於跑馬地運動場個電話係：2895 1523，我嗰晚十點九打去都有人聽，佢地應該跟個場嘅時間收工嘅，即係大概晚上十一點，希望大家都用唔著喇！

不過人間係有愛嘅，我喺度同個職員傾緊我單嘢嘅時候，有人執到個電話，都交咗俾個職員，我諗執到嘢拎咗去都係個別例子啫，又或者真係學樓上跑友話齋，打掃嘅當垃圾掃咗都唔定，因為佢地唔會知係乜嚟，尋晚個職員都問我「哩啲乜嚟？好貴㗎？」咁樣。